2 Tesalonaiká 1
1
Ko e Fakafe‘iloaki
Si‘i kāinga lotu Tesalonaika, ‘a kimoutolu ‘oku kau he kakai ‘a e ‘Otuá ko ‘etau Tamai pea mo e ‘Eiki ko Sīsū Kalaisí.
1Kimautolu eni ko Paula, Sailosi mo Tīmote ‘oku mau tohi atú. 2‘Ofa ke mou ‘inasi he ‘ofa ‘aufuatō mo e tāpuaki ‘a e ‘Otuá ko e Tamai mo e ‘Eiki ko Sīsū Kalaisí.
Ko e Fakamaau ‘e Fai ‘e Kalaisi ‘o ka Liuaki mai
3‘Oku mau fakafeta‘i ma‘u pē ki he ‘Otuá koe‘uhí ko kimoutolu, koe‘uhí ko e fakautuutu ai pē ho‘omou tui ki he ‘Otuá mo ho‘omou fe‘ofa‘akí. 4Ko hono ‘uhinga ia ‘oku mau fa‘a talanoa pōlepole ai kiate kimoutolu ‘i he ngaahi siasi kotoa pē ‘o e ‘Otuá. ‘Oku mau fa‘a talanoa ki ho‘omou kei kātaki mo tui mālohi, neongo ‘a e lahi ‘a e faingata‘a mo e fakatanga ‘oku mou fehangahangai mo ia ‘i ho‘omou mo‘uí.
5Ko e ngaahi fakamo‘oni pē ia ki he fakamaau totonu ‘a e ‘Otuá. Ko e anga ia ‘o ‘ene teuteu kimoutolu ke mou hoa mo hono Pule‘angá, ‘a ia ‘oku mou lolotonga kātaki‘i ai ‘a e ngaahi mamahi ko ená. 6Ko e ‘Otuá, ‘oku fai totonu pē ia, pea te ne tautea ‘a e kakai kotoa pē ‘oku nau fakafe‘ātungia kimoutolu, 7-8kae fakafiemālie‘i kimoutolu. Te ne fakafiemālie‘i foki mo kimautolu ‘i he ‘aho ‘e hā‘ele mai ai mei langi ‘a e ‘Eiki ko Sīsuú, mo ‘ene hou‘eiki ‘āngeló, pea mo ha afi ‘oku kakaha.
‘E tautea ‘e hotau ‘Eiki ko Sīsuú ‘a e kakai kotoa pē ‘oku nau fakasītu‘a‘i ‘a e ‘Otuá mo ta‘e fie tali ‘ene ongoongo leleí. 9Pea ko honau tauteá ko e faka‘auha ‘o ta‘e ngata. ‘E fakamavahe‘i kinautolu mei hotau ‘Eikí mo e lāngilangi ‘o hono māfimafí. 10Ko e me‘a ia ‘e hoko ‘i he ‘aho ‘e liuaki mai ai ‘a e ‘Eikí pea fai hono fakāngilangi‘i mo fakahīkihiki‘i ‘e he kakai kotoa pē ‘oku tui kiate iá. Te mou kau ai mo kimoutolu, he kuo mou tui ki he‘emau malanga na‘e fai atú.
11Ko e ‘Otuá pē na‘á ne fili kimoutolú. Pea ‘oku mau hūfia ma‘u kimoutolu ki he ‘Otuá ke ne teuteu ho‘omou mo‘uí ke hoa mo ho‘omou kau he‘ene kakaí. ‘Oku mau kole ki he ‘Otuá ke ne foaki atu ha ivi kae lava ke mou fakahoko e ngaahi ‘ofa ‘oku mou faka‘amu ke fai koe‘uhí ko ho‘omou tuí. 12‘E lāngilangi‘ia ai ‘iate kimoutolu hotau ‘Eiki ko Sīsuú. Pea te mou toe lāngilangi‘ia ai mo kimoutolu ‘iate ia, koe‘uhí ko e ‘ofa lahi ‘a e ‘Otuá, pea mo hotau ‘Eiki ko Sīsū Kalaisí.
Currently Selected:
2 Tesalonaiká 1: TCNT
Highlight
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
