1 Tesalonaika 2
2
Ko e Ngāue ‘a Paula ‘i Tesalonaiká
1Kāinga, ‘oku mou ‘ilo lelei pē na‘e ‘ikai ko ha fakaongosia noa ‘emau ‘a‘ahi atú. 2Pea ‘oku ou tui ‘oku ‘ikai ke ngalo ‘iate kimoutolu ‘a homau ngaohikovi‘i mo ta‘e toka‘i ‘i Filipai pea mau toki a‘u atu kiate kimoutolu ‘i Tesalonaiká na. Na‘e fakafe‘ātungia‘i lahi kimautolu, ka na‘e fakalotolahi‘i kimautolu ‘e he ‘Otuá ke mau malanga‘i kiate kimoutolu e ongoongo lelei ‘o e ‘Otuá. 3Na‘e ‘ikai ke tu‘unga ‘emau fakatafoki kimoutolú ‘i ha‘amau lohiaki‘i kimoutolu, pe ko ha‘amau kākā. 4He na‘e lau ‘e he ‘Otuá ‘oku mau fe‘unga mo ‘ene fakafalala mai ‘a e malanga‘i ‘o e ongoongo leleí. Ko ia ai, na‘e ‘ikai te mau malangá ke loto-lelei mai ‘a e kakaí, ka ke hōifua mai ‘a e ‘Otuá, ‘a ia ‘okú ne ‘afio‘i e loto ‘oku fai‘aki ‘emau ngāue kotoa pē. 5‘Oku mou ‘ilo‘i lelei ‘a e anga ‘o ‘emau ‘a‘ahi atú. Na‘e ‘ikai te mau fakahekeheke‘i kimoutolu. Pea ‘oku ‘afio‘i pē ‘e he ‘Otuá, ko ‘emau malanga kiate kimoutolú na‘e ‘ikai ke fufuu‘i ai ha‘amau sio-me‘a. 6Na‘e ‘ikai te mau kumi lāngilangi ‘i he‘emau nofo mo kimoutolú, pe ko ha toe kakai. 7Kapau na‘a mau pehē ke fakakavenga‘i ā kimoutolu, ‘e tonu pē ia. He ko e kau ‘apōsitolo kimautolu ‘a Kalaisi. Ka na‘a mau loto ke mau anga-vaivai ‘i he‘etau nofo mo kimoutolú, ‘o hangē ko e anga ‘o ha fa‘ē ki he‘ene fānaú. 8Na‘e ‘ikai ke ngata pē ‘i he‘emau tōtōivi hono malanga‘i atu ‘a e ongoongo leleí, ka na‘a mau toe loto fiemālie ke mole ‘emau mo‘uí koe‘uhí ko kimoutolu. He na‘a mau mahu‘inga‘ia ‘iate kimoutolu.
9‘Oku ‘ikai te u tui kuo ngalo ‘iate kimoutolu, kāinga, ‘emau fakaongosia na‘e faí, mo ‘emau tafi pupuhá! Na‘a mau ngāue ‘aho mo e pō ke ma‘u ha me‘a ke tauhi‘aki kimautolu, telia na‘a mou kavenga‘ia ‘iate kimautolu ‘i he ngaahi ‘aho na‘a mau malanga‘i ai hena ‘a e ongoongo leleí.
10Ko e kau fakamo‘oni kimoutolu, pea mo e ‘Otuá foki, ki he ma‘a, mo taau, mo haohaoa homau ‘ulungāanga na‘e fai kiate kimoutolu ‘a e kāinga lotú. 11‘Oku mou ‘ilo lelei ko ‘emau tō‘onga na‘e fai kiate kimoutolu tāutaha, na‘e hangē ko e tō‘onga ‘a ha tamai ki he‘ene fānaú. 12Na‘a mau fakalotolahi‘i ma‘u pē kimoutolu, mo fakanonga, mo na‘ina‘i, ke mou fai e fa‘ahinga mo‘ui ‘oku fakahōifua ki he ‘Otuá. He kuó ne ui kimoutolu ke ‘i ai hamou ‘inasi ‘i hono pule‘angá mo hono lāngilangí.
13‘Oku mau fakamālō ma‘u ai pē ki he ‘Otuá koe‘uhí ko ‘emau malanga‘i atu ‘a e ongoongo lelei ‘a e ‘Otuá pea mou fanongo ki ai ‘o talí. Ko e ongoongo ia mei he ‘Otuá. ‘Oku ‘ikai ko ha ongoongo mei ha tangata. Na‘a mou tali ia ko e ongoongo mei he ‘Otuá, pea ko eni kuo ngāue ia ‘i he mo‘ui ‘a kimoutolu kuo tafoki ‘o tui ki aí. 14Ko e me‘a kuo hoko kiate kimoutolú, kāinga, ko ia pē na‘e hoko ki he ngaahi siasi ‘o e ‘Otuá ‘i Siuteá, ki he kakai kuo muimui kia Kalaisi Sīsuú. Ko e ngaahi faingata‘a na‘a mou mo‘ua ai koe‘uhi ko e tāufehi‘a atu homou kakai tonú, ko ia pē na‘a nau mo‘ua ai koe‘uhi ko e tāufehi‘a kiate kinautolu ‘a e kakai Siú. 15Ko e kakai foki kinautolu na‘a nau tāmate‘i ‘a e ‘Eiki ko Sīsuú mo e kau palōfitá, pea nau toe fakatanga‘i mo kimautolu. ‘Oku ‘ikai ke tali ‘e he ‘Otuá, pe ko ha toe taha, ‘enau ngaahi me‘a ‘oku faí. 16Kuo nau a‘u ai pē eni ‘o feinga ke ta‘ofi ‘emau malanga‘i ki he kakai mulí ‘a e ongoongo lelei te nau ma‘u mo‘ui aí. Ko e toki a‘ua‘u ia ‘enau fai angahalá. Pea ko eni kuo houhau ‘a e ‘Otuá, pea kuo pau ke ne tautea kinautolu.
Toe Fie ‘A‘ahi ‘a Paula ki Tesalonaiká
17Kāinga, na‘e felei ‘emau ‘a‘ahi atú. Ka na‘e ‘ikai ke tuku ai ‘emau tokanga kiate kimoutolú. Na‘a mau ‘ofa lahi atu, pea mau feinga ke ‘a‘ahi atu. 18Na‘e vivili ‘emau fie ‘a‘ahi kiate kimoutolú. Na‘e tu‘o ua pe tu‘o tolu ‘eku feinga ke ‘alu atu toko taha pē mo e felei ai pē ‘e Sētane hoku halá. 19Ko kimoutolu, foki, ‘oku tu‘unga ai ‘emau fakatu‘amelie mo fiefia ko ‘ení. Pea ko kimoutolu te mau fiefia ai ‘i he ‘aho ‘e toe hā‘ele mai ai ‘a hotau ‘Eiki ko Sīsuú. 20‘Io, ko homau pōlepole‘angá kimoutolu, mo homau fiefia‘angá.
Currently Selected:
1 Tesalonaika 2: TCNT
Highlight
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
