1 Tesalonaika 3
3
1Pea faifai pea ‘osi ‘emau kātakí, pea mau pehē leva ke mau nofo ai pē ‘i ‘Ātenisi 2kae fekau ‘a Tīmote ke ‘alu atu. Ko homau kaungāngāue ia he ngāue ‘a e ‘Otuá, pea ‘okú ne malanga‘i ‘a e ongoongo lelei ‘o Kalaisí. Na‘e ‘uhinga ‘emau fekau ke ‘alu atú, koe‘uhí ke ne tanumaki ho‘omou tuí mo fakalotolahi‘i kimoutolu. 3He na‘a mau faka‘amu ke ‘oua ‘e fakalotosi‘i kiate kimoutolu e ngaahi faingata‘a ko eni ‘oku mau fepaki mo iá.
Na‘a mou ‘osi ‘ilo pē ko e vā‘ihala ia kuo pau ke tau fou ai. 4He na‘a mau ‘osi fakahā ia kiate kimoutolu ‘i he‘emau ‘a‘ahi atu ko eé. Pea na‘e hoko, ‘o hangē pē ko ia ‘oku mou ‘ilo‘í. 5Ko hono ‘uhinga ia na‘á ku fekau ai ‘a Tīmote ke ‘alu atú. He na‘e ‘ikai te u toe lava ‘o fakama‘uma‘u, peá u fekau leva ke ne ‘alu atu ‘o vakai pe ko e hā e tu‘unga ‘oku ‘i ai ho‘omou tuí, na‘a kuo ma‘u kimoutolu ‘i ha tauhele ‘a e Filí, pea iku launoa ai ‘emau ngāue ‘i hená. 6Ka ko eni kuo foki mai ‘a Tīmote ‘o fakahā kiate kimautolu ‘a e ongoongo fakafiefia ki ho‘omou tuí mo ho‘omou ‘ofá. Na‘á ne tala mai ‘e ia ‘oku mou ‘ofa mai, pea mou fie fe‘iloaki mo kimautolu, ‘o hangē pē ko ‘emau fie fe‘iloaki mo kimoutolú.
7Ko ia, kāinga, neongo ‘emau lolotonga mo‘ua he ngaahi faingata‘á mo e ngaahi mamahí, ka ‘oku fakafiefia pē kiate kimautolu ‘a e tu‘unga ‘oku ‘i ai ho‘omou tuí. 8‘Oku hangē ha vaikau‘aki ki he‘emau mo‘uí ‘a e tu‘u ma‘u ho‘omou tui ki he ‘Eikí. 9‘Oku mau masiva lea ke fakafeta‘ia ‘a e ‘Otuá he fu‘u fiefia kuo mau a‘u ki ai koe‘uhí ko kimoutolú. 10‘Oku mau lotu he ‘aho mo e pō ki he ‘Otuá ke ne tuku mai ha faingamālie ke tau toe femātaaki ai mo kimoutolu, hei‘ilo te mau lava ‘o fai atu ha poupou ‘i ha tafa‘aki pē ‘oku vaivai ai ho‘omou tuí. 11‘Ofa ke tofa hala ‘a e ‘Otuá ko e Tamai mo e ‘Eiki ko Sīsū Kalaisí kae lava ha‘amau ‘a‘ahi atu. 12Pea ‘ofa ke tokoni‘i kimoutolu ‘e he ‘Eikí, kae tupulekina ho‘omou fe‘ofa‘akí mo ho‘omou ‘ofa he kakai kotoa pē, ‘o hangē pē ko e tupulekina ‘emau ‘ofa ‘iate kimoutolú. 13He ‘oku pehē ‘a e anga ‘o ‘ene ‘ai ke tau tu‘u ma‘ú, koe‘uhí ke toki hā‘ele mai hotau ‘Eiki ko Sīsuú mo e kakai kotoa ‘oku ‘o‘oná, pea ‘afio atu ‘a e ‘Otuá ko e Tamai ‘oku ma‘a mo haohaoa ho‘omou mo‘uí.
Currently Selected:
1 Tesalonaika 3: TCNT
Highlight
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
