MATHIU 5
5
Muol tung a athugen
1Tualeh mipite amuin muol tungah apeitou a, atou a, anuazuite akungah ahing pei ua; 2Tuachi’n Aman akam akaah a, amauh thu ahil a:
3“Hagau a gentheite ahampha uhi,
van gam ama-ua ahi zieh in.
4 #
Isai. 61.2
“Da a lungkhamte ahampha uh,
hamuon a um ding ahi zieh un.
5 #
Late. 37.11
“Lungnemte ahampha uh,
lei gouluo ding ahizieh un.
6 #
Isai. 55.1,2 “Dihtatna zieh a gilkiel leh,
dangtate ahampha uh,
tai ding ahi zieh un.
7“Mi hepi siemte ahampha uh,
hepina mu ding ahi zieh un.
8 #
Late. 24.3,4 “Lungsim a siengthoute ahampha uh,
Pasian mu ding ahi zieh un.
9“Lemna bawlte ahampha uh,
Pasian tate chi a um ding ahi zieh un.
10 #
1 Pet. 3.14
“Dihtatna zieh a gawtna thuohte ahampha uh,
van gam ama ua ding ahi zieh in.
11 #
1 Pet. 4.14
“Miten keima zieh a ahing housiet ua, ahing bawlsiet ua, zuou a sietna chinteng a ahing heh hun chieng un, na hampha uhi. 12#2 Khang. 36.16; Nasep. 7.52Kipah unlen, nasatah in nuom un, van ah na nuom man ding uh athupi mama hi, tuamabangin na masang ua guolnei umte zong ana bawlgenthei uhi.
Chi leh meivah
13 #
Mak. 9.50; Luk. 14.34,35 “Noute lei chi na hi uhi, hinanleh chi khu tamta leh bang achi ki al sah kiata diei? tuachi’n paidoh a mite totchil ding loungal in bangma dingin aphatuom nawn sih ding hi.
14 #
Jn. 8.12; 9.5 “Noute leitung vah na hi uhi, muol tunga khopi um khu akiphuol thei sih hi. 15#Mak. 4.21; Luk. 8.16; 11.33Mi’n meivah dein law nuoi ah akoi ngai sih ua, atunna tungah akoizaw uhi; tuachi’n inn sunga mi um zousie ataanvah hi. 16#1 Pet. 2.12Tuama bangin na vah uh mi mudingin vah heh, tuachi’n na silbawl hoite amu thei ding ua, Van a um na Pa uh apahtawi thei ding uhi.
Dan lui leh Jesu dan
17“Dan thu leh guolneite thu sumang dinga hing pei ahi chiin hing ngaisut sih un, asumang dinga hing pei ka hi sih a, asutangtung dinga hing pei ka hizaw hi. 18#Luk. 16.17Chitahtahin na kung uah ka gen ahi, lei leh van aman masangsiein, danthu apat sutvom neunoukhat ahiei, thaivom neunoukhat zong amang sih ding hi, abawn a atangtun kim masangsiein. 19Tuazieh in koihinanleh tam thupiehte laha neupen khat maimai zong susie a, tuabanga bawl dinga mite thuhil pouma vangam ah mi neupen akichi ding hi; hinanleh azui a tualeh tuabanga zui dinga mite thuhil pouma vangam ah milien akichi ding hi. 20Aziehpen ka hing hil ahi, Na dihtatna un laigiel mite leh Pharisaite dihtatna akhup sih leh vangam ah na lut vawt sih ding uhi.
Lungthahna leh tuolthana
21 #
Pawt. 20.13; Danp. 5.17 “Nidanglai a mite kunga tuol na thalou ding ahi, tualeh koizong tuolthat pouma vaihawmna zauhuoitah dinmun ah ading ding uh kichi na zata uhi. 22Hinanleh ken na kung uah ka gen ahi, Koipou azieh bei a a unau tunga lungthah khu thukhenna zauhuoi dinmun ah ading ding a, tualeh koi zong a unau kunga Raka#Raka-Aramaik ham a ki el houna ahia, kolten sal a achite uh ahi. chi pouma thukhen vaihawmte vaihawmkhumna zauhuoitah dinmun ah ading ding a, tualeh koipou “Nang mi mo” chi pouma gawtmun meidil a pai ding zauhuoitah dinmun ah a ding ding hi. 23Tuaziehin maitam bul a na silpieh na lat laitah a, na unau in na tunga lungkimlouna anei chi na theidoh leh, 24na silpieh khu maitam mai ah nuasie inlen, pei inlen na unau toh kilem masa phot inlen, tuachi’n hing pei inlen na silpieh lan in. 25Na langpa toh thukhenna lam zuon a lampi a na peikhawm lai un, kilempi zuai in, tua ahisihleh na langpa’n thukhenmi khut ah ahing pe dinga, thukhen miin, mi manpa khut ah ahingpe dinga, tualeh mi manpan suongkul ah ahing khum kha ding hi. 26Chitahtahin ka hinghil ahi, paisa san khat nangawn na pieh kim masangsie tuana kipat in na pawtdoh sih ding hi.
Angkawmna
27 #
Pawt. 20.14; Danp. 5.18 “Nidang lai a mite kunga, ang na kawm ding uh ahisih kichi na zata uhi. 28Hinanleh Ken vang na kung ua ka gen ahi, koipou in numei khat mawpi utna toh a et leh alungsim ah amanu toh ang akawm zouta hi. 29#Mat. 18.9; Mak. 9.47Tualeh na mit zietlam in ahing khelsah leh kheukhie inlen pai mai in, na tahsa pumpi gawtmuna pai ahi sangin na tahsa hieng khat amanthai nang a dingin ahoizaw hi. 30#Mat. 18.8; Mak. 9.43Tualeh na khut zietlam in ahing khelsah leh sattan inlen nanga kipat paimangin, na tahsa pumpi gawtmuna pai ahi sangin na tahsa hieng khat amanthai nang ading in ahoizaw hi.
Nupa kikhulna
31 #
Danp. 24.1-4; Mat. 19.7; Mak. 10.4 “Tuaban ah koizong zi khul pouma in khulna lai amanu pie heh, ana kichi nalai hi. 32#Mat. 19.9; Mak. 10.11,12; Luk. 16.18; 1 Kor. 7.10,11Hinanleh ken vang na kung uah ka gen ahi: Mi koipou in mi toh lupkhawm zieh hilou a, azi akhul leh amanu angkawm sah ahi tualeh koipou tua khulsanu kitenpi khu angkawm ahi.
Kihahsielna leh thutahna
33 #
Siempu. 19.12; Kisim. 30.2; Danp. 23.21 “Tuachiengin nidanglai, in mite kunga zuouin kichiem sinlen, hinanleh na kichiemnate Mangpa kungah tangtunzaw in, kichi zong na zata uhi. 34#Jak. 5.12; Isai. 66.1; Mat. 23.22Hinanleh ken vang na kung uah ka gen ahi: Kichiem mawngmawng sih un, van lou in kichiem sih un, tua khu Pasian Mangtoupha ahi; 35#Isai. 66.1; Late. 48.2Ahisihleh lei louin zong kichiem sih un, tua khu akeng ngapna ahi, ahisihleh Jerusalem louin zong kichiem sih un, tua khu leengpa thupitah khopi ahi. 36Na lutang lou a na kichiem ding zong ahi tuom sih, aziehpen na samzam khat zong na kang sahin, na vomsah thei sih hi. 37Hinanleh na thugen uh ahite ahi, ahiloute ahilou hi mai heh, akan aval pen gitlouna lah a hing pawt ahi.
Phuba lahna
38 #
Pawt. 21.24; Siempu. 24.20; Danp. 19.21 “Mit taangin mit, ha taangin ha, ana kichi na zata uhi. 39Hinanleh ken ka hing hil ahi, migilou thuh sih un, hinanleh koipou in na bieng zietlam abeh u’leh, alelam zong dawzaw un. 40Tualeh mi koipou in na tunga thusie bawl a na puonah lah atup leh na puongjal zong lasah in. 41Tualeh koipou tai khat pei dinga hing paubawlte kungah ama toh tai ni peikhawm un. 42Mi’n na kunga ang nget leh pie inlen, tualeh ahing leitawi ut leh, kiheimangsan sin.
Itna leh umdan hoikim
(Luk. 6.27,32)
43“Na innvengte it inlen, na melmate muda in kichi na zata uhi. 44Hinanleh kenvang na kung uah ka gen ahi, na melmate uh it unlen, nou hing bawlseta thungetpieh un. 45Tuachi’n na Pa uh van a um tate na hi thei ding uhi; Aman migiloute leh mi hoite tungah ni asuohsah a, tualeh midihtat leh midihtat loute tungah zong guo azusah hi. 46Nou hing itte beh na it uleh kipahman bang ahiei na mu ding uh? Siedongte nangawn in zong tuabang a bawl hilou ahi uoi mah? 47Tualeh na unaute beh uh chibai na buh u’leh midangte sang a bang ahiei na bawl tam tuom uh? Siedongte nangawn in zong tuabanga bawl hilou ahi uoi mah? 48#Siempu. 19.2; Danp. 18.13Tuazieh in van a um na Pa uh ahoibukim mabangin noute zong hoibukim un.
Currently Selected:
MATHIU 5: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.