MALAKI 3
3
Baptispa Johan leh Mangpa Jesu hing peina ding genlawhna
1 #
Mat. 11.10; Mak. 1.2; Luk. 1.76; 7.27 “Ngai in, ka thangkoupa ka hing sawl dinga, aman ka masang ah ka lampi asiel masa ding a, na suipa uh Mangpa a biehinn ah thakhat in ahing pei ding hi; na kipahna uh, thuhun thangkoupa, Ngai un, hing pei ding ahi, galkapte Mangpa’n achi hi.
2 #
Joel. 2.11; Kihil. 6.17 Hinanleh koi ahiei Ama hing pei na ni thuoh zou ding? Tualeh ahing kilat hun chiengin koi ahiei ding zou ding? “Aziehpen Ama khu halsiengpa mei bang leh puonsawppa sabon bang ahi. 3Ama khu dangka halsiengpa leh siengthousahpa bangin atou dinga, Aman Levi tapate a susieng dinga, Mangpa kunga dihtattah a sillat alat theina ding un, sana leh dangka bangin a susieng ding hi. 4Tua hun chiengin Juda leh Jerusalem sillat khu ni danglai a bang leh tanglai kumte a bangin, Mangpa a dingin alungdam huoita ding hi.
5“Tualeh vaihawm dingin na kungnai uah ka hing pei ding a, ai san siemte, angkawmte, zuou a kichiemte, sum thalaw a nasemte, sugenthei a athaman nehpieh mite, tungah leh meithaite leh pa neiloute, nelsiete leh gamdang mite sugenthei mite leh kei hing giing loute tungah theipitu gangtah ka hi ding hi, galkapte Mangpa’n achi hi. 6“Aziehpen Kei Mangpa ka hia, ka kiheng sih hi; Tuaziehin nou Jakob tate aw suhchimit a umlou na hi uhi.
Miten Pasian a suom uh
7Hinanleh napu na pate uh hunlai akipat in ka thugousiete apat in na pielmang ua, na zui sih uhi. Ka kungah hing kile kia unlen, Kei zong noute kungah kang kile kia ding hi, galkapte Mangpa’n achi hi. Hinanleh nouten Bangchi kilekia ding nachi uhi. 8Mihingin Pasian asuom ding ahiei mah? Hinanleh nouten kei na hing suom uhi. Hinanleh nouten Nang kang bangchi suom ua ahiei? Nachi uhi. Sawm a khatte leh sillate ah kei nang suom uhi. 9Hamse law a samsiet na hita uh, nang suomtah ziehun, na nam pumpi nangawn un kei nang suomta uhi. 10#Siempu. 27.30; Kisim. 18.21-24; Danp. 12.6; 14.22-29; Neh. 13.12Ka inn a neh ding ann a um theina dingin, sawm a khat zousie bu pangah hing koi unlen, tamte in hing enkhie un, van kotkhate hongin, akoina ding umlou khop in na tung uah guolzawlna ka hing sungbaw sih mawng eimah, galkapte Mangpa’n achi hi. 11Noute ziehin na haichi uh negamte#Negamte: Khauphete china ahi. ka phawh dinga, amaun na lei gate uh asuse sih ding ua, na lou ua grepguite zong nou a dingin galouin a um sih ding hi, galkapte Mangpa’n achi hi. 12Tuachi’n nam zousieten noute mihampha ahing chi ding uhi, aziehpen gam kipah umtah na hi ding uh, galkapte Mangpa’n achi hi.
13“Kei douna a na thugente uh akhau thei mama hi, Mangpa’n achi hi. Hinanleh nouten, Nang douna in bangthu ka gen ngel uoi? na chi nalai uhi. 14Nouten Pasian nasep amawhna ahi, adan thute izui a, galkapte Mangpa mai a shisunte banga i um ua adeilam isui uh, bang phatuom ahiei? nachi uhi. 15Tuaziehin tuin, akiliensahte hampha isa ua, ahi, gitlouna bawlte alawching ua, Pasian ze ette nangawn hutkhiet in aum uhi.”
16Tuachi’n Mangpa zau mite khat lekhat akihou ua, Mangpa’n angaikhie a, aza hi. Tuachi’n thei ngitngetna laibu khat Ama mai ah, Mangpa giing mite leh amin ngaituote a dingin akigiel ta hi. 17“Amaute ka goumanpha a ka bawl nichieng in, amauh kei a ahi ding uhi. Mi’n anasem atapa akhawi bangin amaute ka khawi ding hi.
18Tua hun chiengin, nouten midihtat leh migilou, kikaal leh Pasian nasem mi leh semlou mi kikaal thu na theikhen theita ding uhi.
Currently Selected:
MALAKI 3: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
