MALAKI 2
2
Mangpa’n siempute asamsietna
1“Tualeh tuin Nou siempute aw, tam thupieh khu noute a ding ahi. 2Na ngaikhieh sih ua, ka min thupina dinga na lungtang ua navom utsih ua ahileh, na tung uah samsietna ka hing sawl dinga, na guolzawlna tante uh awsie ka lawkhum ding ahi, awsie ka lawkhumta hi, na lungtang ua navom utlou ziehun, galkapte Mangpa’n achi hi. 3Ngai un, nahah nasuonte uh ka house dinga, na maitang uah eeh ka hing nu dinga, na pawibawlna thupite uh eeh mama ka hing nu dinga, tuate toh suoh leh sal a puimangin na um ding uhi. 4#Kisim. 3.11-13Tuachi’n Levi toh ka thuhun a umden theina dinga tam thupieh na kung ua, ka hing sawl ahi chi nathei ding uhi, galkapte Mangpa’n achi hi.
5 #
Kisim. 25.12
Amatoh ka thuhun pen, hinna leh lungmuonna thuhun ahi a, Kei ahing giin theina dinga akunga tuate ka pieh ahi. Tuachi’n ahing giingta ngut ngei a, ka min azatat mama ta hi. 6Thutah dan khu akam ah a uma, amuh ah thudihlou akimu sih hi. Hamuongtahin ka mai ah agamta a, mi tampi gitlouna apat akiheimang sah hi. 7Aziehpen siempute muh in theina akep ding ahi a, tualeh miten akam apat dan asui dinguh ahi, aziehpen ama galkapte Mangpa thupopa ahi.
8Hinanleh noute lampi apat na pielmangta ua, na dan thuhilnate un mi tampi akipalpua sahta hi. Nouten Levi thuhun na suseta uhi, galkapte Mangpa’n achi hi. 9Tuaziehin Ken zong mi zousiete mai ah simmawhuoitah leh zala tahin ka hing bawlta hi, ka lampite na zuilou zieh uleh, deisahtuom nei a dan thute na hil ziehuh ahi.
Mipite khelna
10Eite’n i bawnpi un Pa khat inei sih uh amah? Pasian in ahing siem ihisih uh amah? Bangzieha eite khat leh khat lepchietah a kibawl a ipu ipate thuhun buasah ihi uoi? 11Juda lepchietah in agamta a, Israel gam sung leh Jerusalem khopi sungah, sil kidahhuoi akibawlta hi. Juda in Pasian dangte tanu akitenpita a, a it mama Mangpa munsiengthou abuasahta hi. 12Mangpa’n tambang silbawlpa, ahilpa leh azuipa hitaleh tualeh galkapte Mangpa kunga sillat lanpa khu, Jakob puon inn apat in sattanta hen.
13Sil dang na bawl nahlai uh khat tami ahi, Mangpa maitam kaa leh mauna leh nasatah a kikouna hitui in na dimsahta uhi; tuachi’n sillatte bangma in angai nawn sih a, na khut ua pat lungkimtahin asang nuom nawn sih hi. 14Ahivang in nouten, “Bangzieh ahiei?” na chi uhi. Aziehpen Mangpa khu nang leh lepchietah a na bawl na senzi toh kikaal a theipitu ahi; hinanleh amanu khu na kigoppina thuhun zi ahi. 15Pasian in ni khu khat in ahing abawl sih amah? Tahsa leh hagau ah amautegel ama a ahi ua, bangzieh a nite sakhat a abawl ahiei? Aman amaute gel apat Pasian ngaisah chihah asui zieh ahi. Tuaziehin na hagau lam uah pilvang unlen, Koiman asenzi tungah lepchietah in bawl sih heh. 16“Aziehpen Mangpa Israelte Pasian in kikhul ka huo hi achi hi, tualeh puonsil banga pawngbawlna kikhukhum ka hua hi, galkapte Mangpa’n achi hi. Tuaziehin na hagau lam uah pilvang unlen, na senzi tung uah lepchie sih un.” 17Na thugen un Mangpa na lunggim sahta uhi; hinanleh Nouten bangchi dan a Ama ka lunggim sah uh ahiei? na chi nalai uhi. “Michin in silgilou abawlte uh Mangpa mitmu in ahoi ahi, tualeh ama khu tuate tungah akipah hi” nachi na uah, ahisihleh thudih a vaihawm “Pasian hei a um ahiei?” nachi chieng ua Ama lunggim sah nahi uhi.
Currently Selected:
MALAKI 2: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
