JOB 38
38
Mangpa’n Job thugen adawnna
1Tuachi’n Mangpa’n pingpei lah a kipat in Job adawnga,
tambangin agen hi.
2“Theina tellou thute a,
thumawpna mielsah khu koi ahiei?
3Ki pasal sah inlen na kawng gah in,
ka hing dong dinga,
tualeh nangman nang dawng ding hi.
4“Leitung kingahna ka phum laiin hei ah na um ei?
theisiemna na neileh hing hil in.
5Alet aneu tetuoh koi ahiei na thei amah?
ahisihleh atunga tenakhau hung koi ahiei?
6A suongphumte bang tunga kinga ahiei?
ahisihleh aninga suongphum koi ahiei?
7Zingsol aasiten la asah khawm lai u’leh,
Pasian tapate zousie nuom a akikou lai un,
koi phat ahi uoi?
8 #
Jer. 5.22
“Ahisihleh naubu a kipat a,
pawtdoh bang mai a apawhkhiit lai a,
tuipi kotpi va khakhum koi ahiei?
9A puonsil dinga meilum ka bawl lai leh,
atuomna dinga miel satah ka bawl lai in,
10agamgite ka bawl pieh a,
akotpite leh akilna ding ka siem pieh lai in.
11Tam tan chieng nang pei thei dinga,
aban nang pei thei sih ding,
tualeh tanah na tuikihot kisatheite,
akhawl ding uh kachi lai in!
12“Na hing pien ni a kipat in zingmawng kungah,
thupieh na pekha ngaita amah?
Ahisihleh zingkhovah kungah amun ding,
na theisah kha ngai amah?
13Tuabanga leitung aning a tudet a,
khuna kipata migiloute thindoh a a um theina ding un.
14Chiemtena nuoi a tungman bangin amel ahing um a,
tualeh puon alou a kibum bangin zie nei in adingdoh uhi.
15Migiloute apat in avah ukhu tuhtang pieh ahi a,
aban lapsangte u’zong sattawng pieh ahi uhi.
16“Tuipi nahte ah nava lut khat a a mah?
Ahisihleh tuipi thuh kilkawi teng na pha suohta amah?
17Shina kotkhate nang kungah,
ahing ki ensah kha ngaita amah?
Ahisihleh shina limliep kotkhate,
na mukha ngaita amah?
18Leivailam let dan na theikheta amah?
Tamte zousie na thei kim leh hing hil in.
19“Khovah umna lampi heisung ahiei?
tualeh miel umna mun heisung ahiei?
20Tuachia a inn zotna lampite na theina dingin,
amauh tenna gam ah na zawpi thei na diei?
21Tuahun lai a na pientah ziehin na thei ei mah?
Ahisihleh na kum atam mama taah ziehin.
22“Vuate koikhawmna inn ah na lut ngaita amah?
Ahisihleh gielpi kikoikhawmna inn,
na mu ngaita amah?
23Tuate lungkham buoina hunte leh,
gal kidouna nite adinga ka khet ahi hi.
24Khovah hing kihawmzahna mun,
zotna lampi heisung ahiei leh?
Ahisihleh, suolam huite leitunga,
akithezahna mun heisung ahiei?
25“Koi ahiei guotuite luonletna ding tuilam siel a,
ahisihleh tunphe leh keeh peina ding,
lampi sielpieh koi ahiei?
26Koima tenlouna gam leh,
mihing umlouna gamdai a guo zusah leh,
27Bangma umlouna gamsie leh,
mun guoh khu lungtai sah dinga,
tualeh haichite dawn suong sah ding, koi ahiei?
28“Guo in pa anei amah?
Ahisihleh daitui mal hing takhete koi piensah ahiei?
29Vuakhalte koi naubu sunga hing piengkhie ahi uoi?
tualeh van a kipata daituikhalte,
hing sungkhie koi ahiei?
30Tuite suong banga atah chiengin,
tui thuhpi mai ahing khal sieng hi.
31 #
Job. 9.9; Amos. 5.8 “Nang akilawm mama bawmluoite,
khau in na kaankhawm thei amah?
Ahisihleh zuheisuhtun kikankhawmte na sut thei amah?
32Nang aasi sawmleng khu ahuntah a,
kum kihei dungzuiin na heithei ei mah?
ahisihleh ngambawm uital leh,
anoute na pui koi thei ei mah?
33Vanlamte kivaipuohna dan na theina amah?
Amauh kivaipuoh dan khu leitungah,
na polut thei ding amah?
34“Tui tampi in ahing khu khum theina dingin,
meilumte han in na aw na vawhsang thei nangel amah?
35Kawlphete peidoh a na kunga tanah ka um uhi,
chi dingin na sawlkhe theina ei?
36Pilna sunggil lam a koi a,
ahisihleh lungsim sunga,
theisiemna pie koi ahiei?
37Meilumte sim theina pilna nei koi ahiei?
Ahisihleh koi ahiei van tuithawlte,
sungbaw thei?
38Bangchih chienga leivuite hing khal a,
buonte hing kilomkhawm ahiei?
39“Humpibahnei samat ding na sui pieh thei ding amah?
Ahisihleh humpibahnei lunlai gilkielte khu,
na gilva sah thei na diei le?
40A kuo ua aboh a samat ding abuh lai un,
nang ama ua dingin sa nava mat pieh ngai amah?
41Va-ah noute gilkiel a Pasian kunga,
kikou a a ann neh ding uh sui a,
aleen kawikawi chieng ua,
va-ah te ann vape zel khu koi ahiei?
Currently Selected:
JOB 38: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
