SIEMCHILBU 9
9
Noah kunga Pasian thuhun
1 #
Siem. 1.28
Tuachi’n Pasian in Noah leh atapate guol azawl a, akung uah, “hah leh suon tampi nei in hing pung unlen, leitung luodim un. 2Nouma giinna leh zauna leitunga gamsate zousie, vanlaizawl a vate zousie, leitung a piathei zousie, tualeh tuipi a Ngate zousie tungah um vanin, amaute na khut ua piehkhiet ahita uhi. 3Silhing piathei zousie na ann ding uh ahiding a, annte louhing kahing pieh bangin sil zousie a unin kahing pie hi. 4#Siempu. 7.26,27; 17.10-14; 19.26; Danp. 12.16,23; 15.23Hinanleh sa ahinna asisan toh na nehkhawm ding uh ahisih hi. 5Tualeh pellouin na hinna uh sisan phuba ka la ding a, gamsate chinteng lah akipat ka la ding a, michin a unaupa tungah mihing hinna phuba kala ding hi. 6#Pawt. 20.13; Siem. 1.26Koipou mihing sisan suote mihing ma in ama sisan asuo ding hi. Pasian in Ama mel banga mihing asiem ahi ziehin.
7 #
Siem. 1.28
Tualeh noute ga tampi suongin hing chipha unlen, hing pungta un. Leitung ah hahlesuon tampi hing nei unlen, atung ah hing pungta un,” achi hi.
8Tualeh Pasian in Noah leh akunga um atate kungah, 9“Ngai un, Kei mama in nouma leh na nua ua nahah nasuonte uh kungah zong ka thuhun ka sukip ahi. 10Na kung ua na umpi uh silhing zousie, vate, gantate, kuong apat pawtdoh, lei a gamsa chinteng kung nangawn ah zong. 11Tambang in na kung uah, ka thuhun ka sukip ding, ganhing zousie zong tuichim a suhmang in aumnawn sih ding a, leitung suse dingin tuichim zong atung nawn sih ding”. 12Tualeh Pasian in “tami keima leh nouma leh na kung ua um silhing zousiete kikaal a hahlesuon tawp neilou a umzelte dinga thuhun chiemtena ahi ding hi,” achi hi. 13“Meilum lah ah ka sakhituihup kazamsah a, tuakhu kei leh leitung kikaal a thuhun chiemtena ahi ding. 14Tualeh hichi ahi ding a, leitunga meilum ka kaisah chieng in meilum lah ah Sakhituihup akimu ding hi. 15Tualeh kei leh noute leh sate leh silhing zousie kikaal a ka thuhun um theizing vangin, tuachi’n Sa zousie sumang ding in tuisang alet nawnsih ding hi. 16Tuachi’n sakhituihup pen meilum lah ah zamjel van in, tualeh Pasian leh leitunga um sate leh ganhing zousie toh kikaal a tangtawn thuhun theizing nading in tuami enzing vang” achi hi. 17Tualeh Pasian in Noah kungah, “Tami kei leh leitunga um sa zousie kikaal a ka thuhun chiemtena ahi,” achi hi.
18Tualeh Noah tapate, kuong apat a pawtdohte Shem, Ham leh Japheth ahi ua, tualeh Ham pen Kanaan pa ahi. 19Tamte Noah tapa thumte ahi ua, ama ua kipat in leitung pumpi luodim in ahing umta hi.
Ham khelna
20Tualeh Noah lou houmi in ahing panga, grep huon abawl hi. 21Uoin a dawn a, a kham ta a; tuachi’n a biehbuh sungah a lum khiel ta hi. 22Tualeh Kanaan pa Ham in apa guoh tanga lum amu a, inn pulang aum a unau tegel ahil hi. 23Tuami’n Shem leh Japheth in puonkhat ala ua, a liengkou uah ajawng ua, nuatawnin apa uh guohtang alum akhu ua, tuachi’n amai uh nualam ngasa’n apei ua, apa uh guohtanna amusih uhi. 24Tuachi’n Noah a uain kham ahing hal a, atapa neupen in atung a abawl dan athei hi.
Kanaan hamsietna
25Tuachi’n aman, Kanaan hamsiet in um henlen, a unaute silate sila ahi ding achi hi. 26Tualeh aman, Mangpa Shem Pasian guolzawl in um heh, Kanaan asila in um heh achi hi. 27Pasian in Japheth khu sulien henlen, puon inn ah teng hen, tualeh Kanaan pen a sila hihen achi nalai hi.
Noah shina
28Tualeh Noah tuichim tunnua in Kum zathum leh sawmnga a dam a. 29Tuachi’n Noah damsung Kum zakuo leh sawmnga ahia, tuachi’n ashita hi.
Currently Selected:
SIEMCHILBU 9: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
