SIEMCHILBU 8

Tuichim kiemta

1Tualeh Pasian in Noah leh kuong sunga ganhing zousie leh ganta zousie athei zinga, Pasian in leitungah hui alaangsah a, tuachi’n tui ahing kiem panta hi. 2Tuithuhpi nahte leh van kottate zong kha ahita a, van a guo zong theusah ahita hi. 3Tualeh leitunga tui khu awlnou noua leitung apat kilekia in, Ni za leh sawmnga nuain ahing kiemta hi. 4Tuachi’n kuong khu aha sagina ni sawm leh sagi ni in Ararat muol ah akingata hi. 5Tualeh aha sawmna dongin tui khu akiemsuh zel a, aha sawmna ni khat ni in muol vumte ahing kilangta hi.

6Tualeh ni sawmli nuain, Noah in kuong kotta abawl khu ahong a. 7Tuachi’n va-ah khat aha doh a, lei a tui kan sieng masang sien aleeng kawikawi hi. 8Tualeh leitung apat tui akiemtai mah chi theina dingin Vakhu khat aha kia hi. 9Hinanleh Vakhu in tuh nading mawngmawng amulou ziehin akung ah kuongah ahing kile kiata a, leitung pumpi a tui aum nalai ziehin. Tuachi’n akhut apulam ah aha khie a, a kungah kuong sungah alalutta hi. 10Tualeh ni sagi dang angah kia nalai a, tua Vakhu khu kuong apat ahadoh kia hi. 11Tuachi’n Vakhu khu nitahlam in ahing tunga, tualeh ngai vawi, anephu ah Olive singna kilou tha khat ahing taw hi. Tuachi’n Noah in leitungah tui akiemta chi atheita hi. 12Tuachi’n nisagi ma angahkia nalai a, tualeh Vakhu ahadoh kia a, tuachi’n akung ah ahing kile tasih hi.

13Tualeh hichi ahing hi a, Kum zaguh leh khatna aha khatna ani khat ni in Tuite leitung apat akangta a, tualeh Noah in kuong khuna aladoh a, a en a, leitung ahulta hi. 14Tualeh aha nina ani sagi niin leitung ahul siengta hi.

15Tuachi’n Pasian in Noah kungah thu agen a, 16“Kuong akipat pawtdoh inlen, nang leh na zi leh na tapate leh na tapate zite zong na kung ah pawt uheh. 17Sa zousie lah a, vate lah a, gantate lah a, lei a awma kitholte lah a, na kunga um silhing tengteng hing pawtpiin, lei a hahlesuon tampi nei a, tualeh lei tunga ga tampi suonga, ahing pun theina ding un,” achi hi. 18Tuachi’n Noah, atapate toh azi toh, atapate zite toh apawtta uhi. 19Gamsa chinteng, abohvah ganhing zousie, va chinteng leh leitunga aboh a vah zousie amauh chi bang chiet in kuong akipat apawtta uhi.

20Tuachi’n Noah in Mangpa kungah, maitam abawl a, sa sieng zousie lah leh va sieng zousie lah ah ala a, maitam ah haltum sillatte alan hi. 21Tualeh Mangpa’n tua gimnamtui aza-a, tuachi’n Mangpa’n alungsim in “mihing ziehin leitung hamsiet lawnawn vawt sihvang, mihing lungtang ngaituonate khu aneu lai a kipat gilou mawng ahi thuoi a, tua kabawl bangin silhing chinteng zong ka sumangthang nawn vawt sihding hi. 22Leitung umlaisie haichi tu hun leh haichi lah hun khovot leh kholum hun, nipi leh phalbi, sun leh zan abeisih ding” achi hi.

Currently Selected:

SIEMCHILBU 8: ZOUBSI

Highlight

Copy