SIEMCHILBU 50

Jakob kivuina

1Tuachi’n Joseph in apa mai leh amai sutuoin, a tawpa a kapta hi. 2Tualeh Joseph in a suoh damdawi siemte apa luong muot theilou a bawl dingin thu apie a, tuachi’n daktorten Israel luong pen amuot theilou dingin a bawlta uhi. 3A luong bawlna in ni sawmli alut a, tuabanga muot theilou dinga a bawlna in ni tuaza lut zel mawng ahi. Tualeh Izipt miten ama ni sawmsagi asuun uhi.

4Tualeh ama kaana nite abei nua in, Joseph in Pharoah innsung mite kungah “Tuin na mitmu ua deisahna katan leh hepitahin Pharoah zah ah thu gen un.” 5#Siem. 47.29-31Ngai un, ka pa’n “Shi ding ka hita, Kanaan gam a ka han dinga ka tawsa ah, khum mun ngeiah na hing vui ding ahi’ chi in ahing kichiemsah hi, tuaziehin, tun hepitahin hing peitousah inlen, ka pa hing vuisah in, tualeh ka hing peikia na ding hi, chiin hing genpieh un,” achi hi. 6Tualeh, Pharoah in, peitou inlen, ahing kichiemsah bangin na pa va vuita in achi hi.

7Tuachi’n Joseph apa vui dingin a peitouta a, tualeh ama toh Pharoah suohte zousie leh a innsung upate Izipt gam upate zousie. 8Tualeh Joseph innsung mite zousie leh a sanggamte leh apa innsung mite zousie a peitou uhi. A ta neunoute u’leh a Belamte u’leh a bawng honte uh maimai Goshen gamah anuasie uhi. 9Tualeh ama toh kangtalai leh sakol tungtuong mite apeitou khawm ua, honchingtah ahi uhi.

10Tuachi’n Jordan gal a um Atad phuol mun ahing tung ua, tuanah kap leh mauin thupitahin ni sagi sung apa suunna abawl uhi. 11Tualeh tua gam a teng Kanaan miten Atad phuolmun a suunna amu un, “Tam pen Izipt mite dingin mishi suunna huoisetah ahi,” achi uhi. Tuaziehin tua mun min dingin Abel-Mizraim#Abel Mizaraim: Izipt lusunna china ahi achita uhi. Tuami Jordan gal a um ahi.

12Tuachi’n a tapaten a thupieh bang zelin, abawl piehta uhi. 13#Nasep. 7.16Aziehpen a tapaten Kanaan gamah a zawnglut ua, Abraham in kivuina mun gou dinga Hitmi Ephron akipat a alou toh alei khawm, Mamre mazawna um Makpelah lou a kokhuh ah avuita uhi. 14Tualeh Joseph in apa avui zouin ama leh a unaute toh apa vui dinga hawtou teng toh Izipt gam ah ahing kile kiata uhi.

Joseph in a unaute a hamuonna

15Tualeh Joseph sanggamten apa uh shita chi ahing ngaituo bep un “Joseph in hing muda vanin, a tunga sil gilou ibawl zousie itung uah phuba hing la khava” achi ua. 16Tuachi’n Joseph kungah patong asawl ua, “Na pa’n ashi masangin tam bangin thu hing pie hi. 17Tuachi’n Joseph kungah na gen ding uhi; hepitahin tuin na sanggamte khelna leh mawnate ngaidam in, aziehpen na tungah sil gilou abawl uh ahi. Tuaziehin tuin ka hing ngen uh ahi, na pa Pasian suohte khelna ngaidam in chiin achi ua, tualeh akung a thu agen lai un Joseph akapta hi.”

18Tuachi’n a sanggamte zong avapei ua, amasangah akhupboh ua “Ngaiin na suohte ka hi uh” achi uhi. 19Joseph in akung uah, “Zau sih un aziehpen kei Pasian thaheng a um ka hiei mah? 20Hinanleh nou vangin ka tungah sil gilou nana ngaituo ua; ahivangin Pasian in tuni bangin, mi tampite hingledam a a humbitna dinga silhoi tunna dinga ana ngaituo zoh ahi. 21Tuaziehin zau vawtsih un, nouma leh na ta na naute uh ka hing vaa nading hi” achi hi. 22Tuachi’n Joseph pen ama leh apa innkuonpite toh Izipt gamah a teng ua, tualeh Joseph kum za leh sawmli adam hi. 23Tualeh Joseph in Ephraim tate akhang thumna dong amu a, Manasseh tapa Makir tate zong Joseph pheitungah akhang lien uhi. 24Tualeh Joseph in a unaute kungah, “Shi ding ka hita hi, hinanleh Pasian in noute ahing ve ngeingei dinga, tualeh tami gam akipat ahing puikhe dinga, Abraham, Isaak, tualeh Jakobte kunga pieh dinga achiem gamah a hing puilut ding hi,” achi hi. 25#Pawt. 13.19; Josh. 24.32; Heb. 11.22Tuachi’n Joseph in Israel tate akichiem sah a, “Pasian in noute ahing ve ngei ngei dinga, tualeh ka gute tana kipat in na potou ding uhi,” achi hi. 26Tuachi’n Joseph kum za leh sawm a upa ahi in ashita hi; tualeh aluong muot theilouna in abawl ua, Izipt gam ah hankuong ah akoi ta uhi.

Currently Selected:

SIEMCHILBU 50: ZOUBSI

Highlight

Copy