SIEMCHILBU 45

Joseph in a unaute aki theisahna

1 # Nasep. 7.13 Tuachi’n Joseph pen a kunga dingte masangah akideh zou nawn sih a, “Mi zousie ka kung apat in pawt khesah un” chiin akikou a, tuachiin Joseph a unaute kunga akitheisah lai in a kungah koima ading sih hi. 2Tualeh ngaitahin akap khie a, Izipt mite leh Pharoah innsung miten zong aza uhi. 3Tuachi’n Joseph in a unaute kungah “Keima Joseph ka hi, ka pa adam nalai ei mah?” achi hi, tualeh a sanggamten a dawng thei tasih ua, amasangah abuoita uhi. 4Tualeh Joseph in a unaute kungah “Hepitahin hing nai un” achi hi, tuachiin a nai ua, Aman “Kei Joseph na unaupa uh Izipt gam a na zuapa uh ka hi.” 5Hinanleh tuin tambanga na hing zua ziehun, lungkham sih unlen, zong kilungthah khum tua sih un, Pasian in mite hinna humbit dingin na masang ua ahing na sawl masah ahi. 6Kum ni sung tam gamah kiel atung pan nalai a, kum nga in asam nalai hi, tua hun sungin lou akihou sih dinga bu zong akila sih ding hi. 7Tualeh, leitunga nahah nasuonte uh hing kepbit pieh ding leh hutkhietna thupi taha na hinna uh hundam dinga Pasian in na masang ua kei ahing sawl masah ahi. 8Tuaziehin, tana hing sawl noute na hisih ua, Pasian ahizaw hi. Aman keima Pharoah dinga pa leh a innsung mi zousie dinga lamkai leh Izipt gam pumpi tunga vaihawmin ahing bawlta hi.

9 # Nasep. 7.14 Manlangin ka pa kungah peitou unlen, tualeh a kungah, Na tapa Joseph in tambangin achi hi, Pasian in Izipt gam pumpi tunga lamkai in ahing bawlta hi, ka kungah sawt kiheh louin hing peisuh heh. 10Tuachi’n Goshen gamah na teng dinga, ka kungah na um ding hi; nangma leh na tate leh na tate tate leh na belamte leh na bawng honte leh na nei zousie toh. 11Khunah keiman ka hing vaa dinga, kiel na ding kum nga aum nalai ziehin. Khuchilouin nang leh na innkuonpite leh na nei zousie na hing tasam kha ding uhi, chiin va genta un.

12Tualeh ngaivawi un, namit mu u’leh ka naupa Benjamin mit ngelngel in na kung ua keima kam ngelngel a ka thugen lai na mu uhi. 13Tuaziehin ka pa kungah, Izipt gam a ka thupina leh na sil mu zousie uh na hil ding ua, gangtah in kapa tammun ah hing puisuh un, achi hi.

14Tuachi’n a naupa Benjamin ngawng kawiin a kap a, Benjamin zong ama ngawng kawiin a kapta hi. 15Tuathamlouin a unaute zousie atawpa, akakhum chiet a, tuazouin a unauten a houlimpi uhi.

Pharoah in Jakob leh a innkuonpite goshen a teng dingin ahan hi

16Tuachi’n “Joseph sanggamte ahing tung uhi,” chi thuthang Pharoah inn sungah ana zata uhi. Tua thuin Pharoah leh a suohte akipahsah mama hi. 17Tualeh Pharoah in Joseph kungah “Na sanggamte kungah tambangin bawl un, na gante uh bu posah unlen, Kanaan gamah pei un, 18Tualeh na pa u’leh na innkuonpite va pui unlen, ka kungah hing pei un, Izipt gam a silhoite hing pe vangin gam sung thauna na ne ding uhi chi’n genin achi hi. 19Tuin, thu ka hing pie hi, tami bawl in, na taneute u’leh na zite uh dingin Izipt gam a kipat sakollengte keng unlen na pa uh hing pui unlen hing pei un. 20Na neitahte u’zong ngaituo data un, Izipt gam sunga silhoi pouma nou a ahi,” achi hi.

21Tuachi’n Israel taten tuabangin abawl ua, Joseph in Pharoah thupieh bangin sakollengte a puia, tualeh lamkaal a neh ding zong apie hi. 22A bawn un puonsil kihen nading ape chiet a, hinanleh Benjamin pen Dangka za thum leh puonsil kihenna ding nga apie hi. 23Tualeh apa kungah tambangin ahah hi, Izipt gam silhoi puo sabiltung sawm, tualeh lamkaal a apa uh ding bu, tanghou leh neh thei puo sabiltungnu sawm ahah hi. 24Tuachi’n a unaute asawl kheta a, apeita uhi, tualeh aman, akung uah, “Lampi a kihau lou dingin pilvang un” achi hi.

25Tuachi’n Izipt gam a pat in apeitou ta ua, Kanaan gamah apa uh kung atungta uhi. 26Tualeh apa u kungah “Joseph ahing nalai hi, Izipt gam pumpi ah vaihawmin apang hi chiin ahil uhi. Hinanleh a thugen uh a tahsan lou seng ziehin Jakob alungtang ana vawt hi.

27“Tualeh Joseph in akung ua athu gente ahilta ua, tualeh ama puoh na dinga, sakolleng Joseph in ahing sawlte amu in apa uh Jakob lungtang asu hal kiata hi. 28Tualeh, Israel in, ahunta hi; ka tapa, Joseph adam nalai; peivangin ka shi masang in va muta vang,” achi hi.

Currently Selected:

SIEMCHILBU 45: ZOUBSI

Highlight

Copy