SIEMCHILBU 42

Joseph unaute Izipt gamah bu lei in akuon uh

1Jakob in Izipt gamah bu aum chi athei a, tuachi’n Jakob in a tapate kungah “Bang dinga khat leh khat ki entuo na hi uoi mah?” achi hi. 2#Nasep. 7.12Tualeh aman “Ngaivawi un, Izipt gamah bu aum chi ka za hi, khunah peisuh unlen shi lou a i hin theina dingun, ei a ding in bu valei ta un,” achi hi. 3Tuachi’n Joseph unau sawmte Izipt gamah bu lei dingin ang peisuh ta uhi. 4Hinanleh Joseph sanggampa Benjamin pen Jakob in aunaute toh a zawhsah sih hi, silsie khat a tungah tung khava achi ziehin.

5Tualeh Israel tapate zong Izipt gam a pua suidingte toh azawhkhawmta uhi. Kanaan gam a zong kiel atun ziehin. 6Tualeh Joseph pen Izipt gam sung pumpi vaihawmpa ahia ama ma khu gamsung mite zousie kunga azua a pang ahia, tualeh Joseph unaute khu ahing pei ua, leisu in a masang ah akunta uhi. 7Tualeh Joseph in a unaute amutah in athei pai a hinanleh akung uah atheilou bang in aum a, midang bangin a unaute ana houpi a, tualeh akung uah, “Hei a kipat a hing pei na hi uoi?” achi hi, amaun, “Kanaan gam apat bu lei dinga hing pei ka hi uhi” a chi uhi.

8Tuachi’n Joseph in a unaute a theia, hinanleh amaun athei sih uhi. 9#Siem. 37.5-10Tuachi’n Joseph in amauh teng tungtang thu a manga amatte ahing theikheta a, akung uah, “Galguh na hi ua, mi enkhie a pang hiva uteh, tam gamsung umdan en a hing pei hibou uteh,” achi hi.

10Tualeh amaun, akung ah, “Hi vawtsih ung, ka mangpa uh, na suohte bu lei dinga hing pei hibou ung. 11Ka unpi un mi khat tate ka hi ua, midih hi ung, na suohte galguh bawla mi enkhie hisih ung,” achi uhi. 12Hinanleh aman akung uah, “Tahsang sing gam sung guohtang hidan en dinga hing pei hi uteh,” achi hi.

13Amaun “Na suohte unau sawm leh ni kahi ua, Kanaan gam a um mi khat tate ka hi uhi. Tualeh ngai in, tuin a tumpen ka pa uh kungah aum a, khatpen aum nawn tasih hi,” achi uhi.

14Hinanleh, Joseph in akung uah, “Ka gensa mabangin noute galguh na hi uhi. 15Tambanga etchienin na um ding uh, na nau tumpen uh tam muna ahing pei sihleh tana pat in pawtkhe nawn sih va uteh chi Pharoah hinna a kichiem in ka hing chi ahi. 16Nouma ah thutah aum ei aum siei etchien ahina dingin nalah ua khat sawl unlen, na naupa uh vapui sah un, tualeh noute pen suongkul ah na um phot ding uhi. Tua ahisihleh Pharoah hinna louin ka gen ngam ahi, noute galguh na hi uhi,” achita hi. 17Tuachi’n aun un ni thum suongkul ah akhumta hi.

18Tuachi’n Joseph in ni thum ni in akung uah, “Tami bawl unlen hing un, aziehpen Pasian ka giing hi. 19Midih na hi u’leh na u naulah ua khat na suongkul lutna uah tangden henlen; noute pei unlen, kiel a um na unaupite ua dingin bu puo un. 20Tualeh na nau tumpen uh ka kungah hing zawpi un, tuachi’n na thu uh akitheichien dinga, na shi sih ding uhi,” achi hi. Amaun tuachi’n abawl uhi. 21Tualeh amauh khat leh khat akihou ua, “I nau tunga i silbawl uh i na bawlkhiel tahtah uhi, hepina a nget va ngua lai a achimaw dan munapia, i ngaisah nuom vawtlou uh, tuazieh a tambang mangbatna itung ua hing tung ahita hi” aki chi uhi.

22 # Siem. 37.21,22 Tualeh Reuben in “Naupang tungah sil bawlkhiel sih un, chiin na kung uah ka gen sih amah? Na ngaikhe ut sih ua, tuaziehin ngaivawi un, asisan phuba hing kila ahi” chiin amauh a dawnga. 23Ahivang in a thugen uh Joseph in athei chi amaun a theisih uhi. Aman akung uah hamlet zanga thu agen ziehin. 24Tualeh aman amauh ale ngatsan a, akapta hi. Tualeh akung uah ahing pei kia a amauh ahoupi a, tualeh alah uapat Simeon apui tuom a, amitmu uah akanta hi. 25Tuachi’n Joseph in a ipte uah bu thundim ding leh a ipte ua amauh sum chiet koikia ding leh lampi a aneh ding uh pe dingin thu apia a; tambangin atung uah abawlta hi.

Joseph sanggamte Kanaan gamah akile kia

26Tuachi’n abute uh a sabiltungte un aposah ua, khum mun apat apei ta uhi. 27Tualeh alah ua khat in giehbuh a sabiltung ann pe dinga a tumbu ahon leh a sum ahing mukhie a; a tumbu gong ah ana um hi. 28Tuachi’n aman a unaute kungah, “Ka sum ana nuakoi kia mawh uhi, achi hi, envawi un ka tumbu sunga na um ahi achi hi,” tualeh amaun, Pasian in tambang talawma ahing bawl “Bang chidan adeh aw? chia lung himaw leh zau kawmin aki entuo uhi.”

29Tuachi’n Kanaan gamah apa uh Jakob kungah ahing tung ua, atung ua sil tung zousie ahil uhi. 30“Tua gam vaihawmpa’n khautahin ahing houpi a, agam uh enkhie galguh dingin ahing na ngaw hi. 31Hinanleh kouten akungah, midih hi ung, galguh ka hisih uhi;’ 32Unau sawm leh ni kahi ua, Pa khat hah ngen ka hi ua, khat aum nawn sih a, nau tumpen tuin ka pa uh kungah Kanaan gamah aum hi kachi uhi.’ 33Tuachi’n tuami gam vaihawmpa’n ka kung uah Tambangin midih na hi uh chi ka theina ding in na unau khat uh ka kungah nuasie unlen, na innkuonpi kielte a dingin bu puo unlen peita un,’ achi hi. 34Tualeh na nautumpen uh ka kungah hing pui un; tuachi’n galguh na hi sih ua midih nahi zaw uh chi ka hing thei dinga, tuachi’n na naupa uh ka hing pekia dinga, tam gamah summet na bawl ta ding uhi” achi hi.

35Tuachi’n hichi ahing hia, a ipte uh ahing buh khiet u’leh, a sum tun chiet uh a ipsung uah ana umchiet hi; tualeh amauh leh apa un sum tunte amu un azauta mama uhi. 36Tualeh apa uh Jakob in akung uah, “Nouten ka tate hing taansah hi uteh; Joseph lah aum nawn sih a, tualeh Benjamin puimang sawm na lai uchia, tam silte zousie in kei hing buohkhum ahita hi,” achi hi.

37Tuachi’n Reuben in apa kungah, “Ama na kunga kahing tut kia sihleh ka tapa nite that maiin; ama ka khutah hing pien len na kungah hing puikia na vang,” achi hi.

38Tualeh aman, “Ka tapa pen na kung uah hing peisuh sihva, aziehpen a upa ashita a, ama maimai ahita hi. Na peina lamkaal uah tuohsie tuoh taleh ka lu kaang pen lungkhamna toh han ah tung suh sah ding hi uteh,” achi hi.

Currently Selected:

SIEMCHILBU 42: ZOUBSI

Highlight

Copy