SIEMCHILBU 37
37
Jakob khantan sutzopna
1Tualeh Jakob khu apa mikhuol hina gam, Kanaan gamah atengta hi. 2Tamte Jakob hah leh suonte ahi uhi, Joseph in kum sawm leh sagi ahi in, a ute toh ganhon aching ua, tam valnou pen apa zite Bilhah tapate leh Zilpah tapate toh a umkhawm uhi. Tualeh Joseph in a gitlouna uh apa kungah ahing tun zel hi.
3Tualeh Israel in Joseph khu ateh nua-a ata ahi ziehin ata dangte sangin a it zaw hi. Tuachi’n Puon ah tuol ze tuom tuom a pawl khat abawl pieh hi; 4Tualeh apa un amapen a ute dang teng sangin a it zaw chi amaun a theitah un, ama amuda ua a kungah kampha mawngmawng a houpi aum sih uhi.
5Tualeh Joseph in mang anei a, tuami a ute a hil a, tuachi’n amaun amuda deu deu ta uhi. 6Tuachi’n aman akung uah, “Hepitahin ta kamang thu ngaivawi un, achi hi. 7Ngaiun, lou ah buphai ina kaan ua, tualeh ngaivawi un, kei buphai ahing thou a, ahing ding hi. Tuachi’n ngaivawi un, nou buphaite khu akimvel ah ading ua, kei buphai chibai bawl in akhupboh uhi,” achi hi.
8Tualeh a uten a kungah, “Nangin ih ka tung ua vai na hawm phuat ding? Ahisihleh nang ih ka tung ua thunei phuat ding?” Achi ua, tuachi’n ama mang zieh leh a thugente ziehin amuda deu deuta uhi. 9Tuachi’n aman mang dang khat anei kia a, tuami a ute ahil kia a, “Ngai un, mang dang khat kaman kia hi. Ni leh Ha leh aasi sawm leh khat ten chibai ahing buh ua, abohkhup uhi” achi hi.
10Tuachi’n aman tam thute apa leh a ute a hil a, tualeh apa’n aphawh a, a kungah, “Bang mang na mat valong ahiei? Kei leh na nu leh na ute na masanga lei a khupboh in chibai kang bawl talawm ding uh amah?” achi hi. 11#Nasep. 7.9Tuachi’n a uten ama athangsiet ua, hinanleh a pa’n athugente alungsim ah a vom zing hi.
Joseph izipt gam a zuana
12Tualeh a ute, apa uh ganhonte ching dingin Shekem ah apei uhi. 13Tualeh Israel in Joseph kungah, “Na uten Shekem gamah ganhon ching hilou uh ahiei mah? Hing peivawi, a kung uah hing sawl vang,” achi hi, tuachiin aman “Tanah um inge,” achi hi.
14Tuachi’n aman a kungah, “Hepitahin pei inlen, na ute leh aganhonte uh adamna uoi mah va en inlen, tualeh athu hinghil kia in” achi hi. Tuachi’n ama khu Hebron phaiguom akipat in apei a Shekem avatung hi. 15Tuachi’n koi ahiei mi khat in gamlah a vah kawikawi amu a, tualeh tua mipan a kungah, “Bang ahiei na sui” chi’n a dong hi.
16Tuachi’n aman, “Ka ute sui ka hi, heitah ahiei aganhon chinna uh hinghil in” achi hi. 17Tua mipan, “Tana patin apawt kheta uhi. Dothan ah peivai akichi uh kaza hi,” achi hi. Tuachi’n Joseph in a ute anuadel a, ava muta hi.
18Tualeh amaun gamlapi apat in ana galmu ua, akung nai uh ahing tun masangin, ama tha ding thu ana phiel ta uhi. 19Tuachi’n amauh khat leh khat kikumin, “En un, mang neipa hing pei e. 20Tuaziehin hing pei un, that vaiin kokhuh sung khat ah khe vaiin, gamsa gilou in aneta chimai vai, tuachi’n amangte bang ahing suoh eimah envai?” akichi uhi.
21Hinanleh Reuben in tam thu aza a, akhut ua pat a hunkhie a, “That talawm sih vai,” achi hi. 22Tualeh Reuben in akhut uapat a hunkhie a, apa uh kunga anuapei kia theina dingin, akung uah, “Sisan vang suo sih un, gamlah a guomkuoh sungah khie un, a tungah khut havawt sih un” achi hi. 23Tuachi’n hichi ahing hia, Joseph a ute kunga ahing tunin, amaun Joseph in puonahtuol zetuom tuom a pawl asil khu asutpieh ua. 24Tuachi’n apui ua, kokhuh sung khat ah akhie uhi. Tua kokhuh khu aguoh ahia, tui aumsih hi. 25Tualeh ann ne dingin atou ua, tualeh dahdoh in a en ua, tualeh ngaivawi, Ishmael mite pawl khat Gilead gam akipat a sangawngsau ua gimtuite, Singnai damdawite leh murrahte puo a Izipt gam a peisuh dingte ahing pei uhi. 26Tuachi’n Juda in a unaute kungah “I naupa uh that in imlei bang e aphattuom na ding? 27Hing peiun, Ishmael mite kungah zua vaiin, tualeh a tungah khut hasih vai, ama lah i naupa uh, i tahsa vawt ahi thuoi a,” achi hi. Tuachi’n anauten a thukimpi ta uhi. 28#Nasep. 7.9Tualeh Midianmi summet bawlte ahing pei ua, Kokhuh apat in Joseph alakhie ua, Ishmael mite kungah Dangka sawmni in azuata uhi. Tualeh amaun Joseph pen Izipt gamah atutta uhi.
29Tuachi’n Reuben khu kokhuh ah ahing pei kia a, tualeh ngaiun, kokhuh sungah Joseph ana umta sih hi. Tuachi’n aman a puonahte abotkeh ta hi. 30Tualeh a sanggamte kungah ahing kile kia a, “I nau lah aum nawn sin, kei heisung suding kata diei?” achi hi.
31Tuachi’n amaun Joseph puonah tuol ala ua, kelnou khat athat ua, apuonah tuol khu sisan lah ah adie uhi. 32Tuachi’n puonah tuol zetuom tuom a pawl ahah ua, apa uh kung ahing tut ua, “Tami maimai ka mu uhi, na tapa puonah tuol ahi nai? ahi siei? en in” achi uhi.
33Tualeh aman athei pai a, “Tampen ka tapa puonah tuol hina, gamsa gilou khat in a neh hitaven maw, Joseph zong bawtel gawpa um hitaven maw?” achi hi. 34Tualeh Jakob in a puon sillaite abotkeh a, akawng ah la-ip puon a tenga, a tapa ni tampi asuun hi. 35Tualeh a tapate leh a tanute zousie ama henem dingin ahing pei ua, hinanleh amapa henem ding anuom sih a, kap kawmin akung uah “Kei zong ka tapa kungah han ah, #Haan ah: Hebruham in Sheol ahi lunggim pumin ka peisuh ding,” achi hi. Tambangin apa’n ama akaa hi.
36Tuachi’n midianten Joseph khu Izipt gamah Pharoah nuoia milien Potiphar, veng pawlte lamkaipa kungah azuata uhi.
Currently Selected:
SIEMCHILBU 37: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
