PAWTDOHNA 18

Jethro in Mosi avena

1Tualeh Midian gam siempu Mosi sungpa, Jethro in Pasian in Mosi leh ami Israelte dinga asil bawl zousie ana za a, tualeh Mangpa’n Israel Izipt gam a pat apuidohta chi aza hi. 2#Pawt. 2.21,22Tuachi’n Mosi sungpa Jethro in Mosi zi Zipporah anua sawlkia#Anua sawlkia zouin zou in ahing pui a. 3#Nasep. 7.29Zipporah tapate ni toh, tuate lah a khat pen min Gersom#Gersom: Mikhuol, gamdang mi china ahia, azieh pen aman “Theilou gam ah mikhuol in ka va um hi,” achi hi. 4Adang khat pen min Eliezer#Eleazar: Ka pasien panpi china ahi, aman “Ka Pasian khu ahing panpi ahia, Pharaoh namsau apat ahing hunkhieh ziehin” achi hi. 5Tualeh Mosi sungpa Jethro khu, Mosi tapate leh azi toh, Pasian muol a, a giehphuol ua Mosi kungah ahing pei ua. 6Tuachi’n Mosi kungah, “Kei na sungpa Jethro na zi leh na ta pa tegel toh na kungah ka hing pei uhi” achi hi. 7Tuachi’n Mosi a sungpa dawn dingin ava pei a, kun in chibai abuh a, atawp a, tualeh atanchin uh akidongtuo ua, apuonbuh sungah a lutta uhi. 8Tualeh Mosi in asungpa kungah, Israelte zieh a, Mangpa’n Pharaoh leh Izipt mite tunga, asil bawl zousie leh lampi a hamsatna atung ua hing tung zousie leh, tuate akipat Mangpa’n bangchibang a, amaute a hutkhiet zel ahiei chite zong ahil hi. 9Tualeh Jethro in Izipt mite khut a kipat ahutdoh a Israel tate tunga Mangpa’n silhoi a bawlpieh zousie ziehin akipah mama hi. 10Tualeh Jethro in “Izipt mite khut a kipat leh Pharaoh khut a kipata hing hundohpa leh Izipt mite khut nuoi akipat amipite tankhepa Mangpa’n thupha ngata hen, achi hi. 11Tuin pasien dang zousie sangin, Mangpa a thupi zaw hi chi ka thei ta, aziehpen kisatheitah a asilbawlte zousie tung ah Ama a um hi.” 12Tuachi’n Mosi sungpa Jethro in halmang sillat leh kithoinate Pasian a dingin alan a, tualeh Aaron leh Israel upate zousie Pasian masangah Mosi sungpa toh nekhawm dingin ang pei uhi.

Vaihawm ding guot na

13Tualeh azing ni’n hichi ahing hia, Mosi mite vaihawm dingin a tou a, tuachi’n mite zingmawnga kipat kitah dongin Mosi kung ah a ding uhi. 14Tuachi’n Mosi sungpa’n mite kunga asilbawl zousie a muin, Mite kunga na silbawl khu bang a hiei? “Bang dinga, na tang a tou a, mite zingmawng a kipat nitah dong na kung a na dinsah ahiei?” achi hi.

15Tualeh Mosi in asungpa kungah, “Mipite Pasian tungtang dong dinga ka kunga hing pei ahi uhi. 16Thubuoi anei chiengun ka kungah ahing pei ua; tuachi’n ken khat leh khat kikaal thu ka khen pieh zel a, Pasian thupiehte leh adante ka na theisah zel hi,” achi hi.

17Tualeh Mosi sungpa’n akungah, “Na silbawl dan ahoi sih hi. 18Nang leh na kunga um, mipite kisu gimgawp ding hi uteh, tam silte nanga dingin agih taluo hi, nangma ngen in na bawl zou sih ding hi. 19Tuin ka gen ngai khie in, lem hing guot pieh vang, Pasian na kungah umta hen; nang Pasian leh mipite kaal ah mite palai in pang inlen, athu buoite uh Pasian kungah na tut ding hi. 20Tualeh danthupiehte leh dante ah na hil ding a, apeina lampi ding u’leh ana sepding uh na kohmu ding hi. 21Tuathamlouin, mipite lah apat, Pasian zaumi leh mi thudih leh huoihamlou, mi kizen deu deu na teldoh dinga, tuabang mite, tul tampi tunga vaihawm ding, za tampi tunga vaihawm ding, sawm ngate tunga vaihawm ding, tualeh sawm khat tunga vaihawmtu ding bangin na koi ding hi. 22Tualeh tam miten bangchihlai pouin mipite vaihawm pieh uhenlen, tualeh hichi ahi ding hi, thu lien pouma nang kungah ahing tut ding ua, hinanleh thu neu zousie amauten angaituo ding uh ahi, tuachi’n nanga dingin jangkhai vanin, na puohgih ahing puohpi ding uhi. 23Tam sil na bawl a, tualeh tuabanga Pasian in thu ahing pieh leh, khuchin napang sawt zou ding a, tualeh tam mipite zong lungdam in amun chiet uah apei ding uhi,” achi hi.

24Tuachi’n Mosi in asungpa aw angaikhie a, agen zousie abawlta hi. 25Tualeh Mosi in Israelte zousie lah akipat in, mikizente atel khie a, mipite tunga lupen vaihawm abawla, tul te tunga vaihawmtu, za te tunga vaihawmtu, sawmngate tunga vaihawmtu leh sawmte tunga vaihawmtute in akoi ta hi. 26Tuachi’n amaun, bangchihlai pouin mipite vai ahawmpieh ua, thu hamsate Mosi kungah ahing tut ua, hinanleh thu neu deu pouma, amaun thu a kikhen ta uhi.

27Tuachi’n Mosi in a sungpa peisahin akikhenta ua, agam langzuon in apeita hi.

Currently Selected:

PAWTDOHNA 18: ZOUBSI

Highlight

Copy