PAWTDOHNA 19

Sinai muol a Israelte hing tunna

1Israel tate Izipt akipat a apawtdoh nua uh, aha thumna khumi ni mama in Sinai gamdai ahing tung uhi. 2Rephidim a kipata pawtkhie in Sinai gamdai ahing tung ua, tuachi’n gamdai ah a puon innte uh a zah ua, tuamun tangbul ah Israelten giehphuol a satta uhi. 3Tualeh Mosi Pasian kungah ahaw tou a, Mangpa’n muol a kipat in ama ahing han a, “Tambangin Jakob innkuonte kungah na gen ding a, Israel tate na hil ding hi. 4Izipt mite tunga ka bawl dante na muta ua, tualeh muvanlai ha tunga ka hing puoh a, keima kunga ka hing tut dante na theita uhi. 5#1 Pet. 2.9#Danp. 4.20; 7.6; 14.2; 26.18; Tit. 2.14Tuaziehin tuin ka thu na man ua, ka thuhun na zui tahtah u’leh, kei a dingin noute leitung mizousie te lah ah Gou manpha teltuom na hi ding uhi, aziehpen leitung pumpi kei a ahi. 6#Kihil. 1.6; 5.10Tualeh noute kei a dingin, nam siengthou, lenggam siempu nahi ding uhi. Tam thute Israel tate kunga na gen ding thute ahi,” achi hi. 7Tuachi’n Mosi ahing pei a, mipite lah a upate ahan khawm a, Mangpa’n akunga apieh tam thute zousie amasang uah aluita hi. 8Tuachi’n mipite zousie’n kituohtahin adawng ua, “Mangpa’n agen zousie ka bawl ding uh achi uhi,” tuachi’n Mosi in mipite thu gente Mangpa kungah atut kia hi.

Israelte kisuh siengna

9Tualeh Mangpa’n Mosi kungah, “Ngaivawi, miten na kunga thu ka gen chienga, azah theina ding u’leh, kumtawn a nang ahing gintat den theina dingun, meilum satah lah ah ka hing pei hi,” achi hi. Tualeh Mosi in mipite thu gen Mangpa kungah a hilta hi. 10Tualeh Mangpa’n Mosi kungah, “Mipite kungah vapei inlen tuni leh zing chiengin amaute susiengthou inlen, apuonte uh sawp uhen. 11Tualeh ani thum nia dingin mansa in um uheh, ani thum niin Mangpa khu mizousie mitmu a Sinai tanga hing peisuh ding ahi zieh in. 12#Heb. 12.18-20Tualeh mite akimvel ah dai nakai pieh ding a, muol a kaltou lou ding leh muol kiim thamkha lou dingin pilvang un, koipou muol thamkhate shi ngei ngei ding ahi. 13Koima khut in akhoikhah ding ahisih, tuachilouin suonga selia ahisihleh thal a kap pailet ahi ding, ganta hiin mihing hitaleh, ahing sih ding hi. Pengkul sawtpi agin chiengin, muolah ang kaltou ding uh hi,” a chi hi.

14Tuachi’n muol a kipat in mite kungah Mosi apei suh a, mipite asusiengthou a, tualeh amauten apuonte uh asawp uhi. 15Tualeh aman mipite kungah, “Nithum nia dingin mansa in um unlen, na zite utoh hing lumkhawm sih un,” a chi hi.

16 # Kihil. 4.5 # Danp. 4.11,12 Tualeh ni thum ni zingmawng in, hichi ahing hia, vanpi ging leh tunphe tualeh muol tungah meilum satah a hing kai a; pengkul angai a ngai ahing gingta a, tuachi’n gieh phuol a mipite zousie achitun ta uhi. 17Tualeh Mosi in gieh phuol a kipat in mipite Pasian toh kimu dingin ahing puidoh a, amaute muol nuoilang ah a ding uhi. 18Tualeh, Sinai muol a Mangpa khu meikuonga ahing kumsuh ziehin, muol khu meikhu’n apum tuom ta hi, tualeh amei khu haltuina meikhu bangin ajamtou a, tualeh muol pumpi nasatah in akiling hi. 19Tualeh pengkul gin a sawt a angai semsem bepin, Mosi in thu agen a, Pasian in aw gingin adawnga. 20Tualeh Mangpa khu Sinai muol vum tunga kipat in ahing kumsuh a, tuachi’n Mangpa’n Mosi muolvum tungah ahan tou a, Mosi ava peitou hi. 21Tualeh Mangpa’n Mosi kungah, “Kumsuh inlen mipite thu hilin, tuachilouin en dingin Mangpa lam ahing phuvang kha ding ua, alah ua tampi’n amanthai law kha ding uhi, achi hi. 22Tualeh Mangpa kung nai a hing pei siempute zong ki susieng thou uheh tuachilouin Mangpa amaute tungah lungkimmaw khava,” achi hi.

23Tualeh Mosi in Mangpa kungah “Mipite Sinai muol ah ang peitou thei sih dinguh, Muol kimvel ah dai kai inlen, susiengthou in chia nang hil zieh in” a chi hi. 24Tuachi’n Mangpa’n akungah, “Pei inlen, kum suhin, tualeh Aaron toh nang hing kaltou kia un, hinanleh siempute leh mipite, Mangpa kunga hing pei dingin, hing phuvang sih uheh, tuachilouin amaute tungah Mangpa lungkim maw khava” achi hi. 25Tuachi’n Mosi mite kungah akumsuh a, mite kungah thu agenta hi.

Currently Selected:

PAWTDOHNA 19: ZOUBSI

Highlight

Copy