NASEPTE 25

Festus mai a Paul adinna

1Festus tua gam ahingtun nua ni thumin Kaisaria apat in Jerusalem ah ahaw tou hi. 2Tuachi’n siempu liente leh Juda lamkaiten akungah Paul tungthu ahilou lam a atheisah kawm un hehna apie uhi; 3Lampi a ana buhdap ua, atha theina dingun, akungah Paul khu Jerusalem a ahattouna dingin deisahna angen uhi. 4Hinanleh Festus in Paul pen Kaisaria a kep ding ahi, Keima zong khum langa peipai ding ka hi, chiin adawng hi. 5“Tuachi’n” aman, “Paul in gitlouna nei ahileh na lah ua thuneiten hing zui suh u’henlen, heh uheh” achi hi. 6Festus alah ua ni sawm val ataam nuain Kaisaria ah apei suh kiata hi. Azingniin thukhenna toupha ah atou a, Paul hing pui dingin thu apie hi. 7Paul ahing tun tahin, Jerusalem akipata hing peisuh Judate akim ah ading ua, atungah agen chien theilou uh hehna nasatah tampiin aheh uhi. 8Paul in adihna thu agen a, “Judate dan thu hiin, biehinnpi thu hitaleh, tualeh Kaisar tungah hitaleh, bangma ka bawlkhiel mawngmawng sih hi,” achi hi.

9Hinanleh Festus in Judate deilam bawl a ut a, Paul adawnga tualeh akungah, “Jerusalem a peitou a, khunah ka mai a tam thute ngaituo hileh na ut ei?” achi hi. 10Tuachi’n Paul in, “Kaisar thukhenna toupha mai a thukhenpieh a um dingin ka ding hi; Judate tungah bangma ka bawl khiel sih chi nang chientahin na thei hi. 11Migilou ka hi a, shina khop a sil bawlkhiel ka hileh, shi zong ka niel sih hi; hinanleh tam mite hing hehnate adihlou ahi nua in, Koiman amaute khut a ahing pieh thei uh ka hi sih, Kaisar kungah ka tut ding,” achi hi. 12Tuachi’n Festus in avaihawmpite toh akikup zou un, adawnga, “Kaisar kungah tut na tum maw? Kaisar kungah na tung ngei ding hi” achi hi.

Agrippa mai ah Paul

13Tualeh ni bangza ahiei nua in, Lengpa Agrippa leh Bernisi Kaisaria ah Festus nousiet dingin ahing pei uhi. 14Amaute khuna ni tampi atam nua un, Festus in leengpa kungah “Paul tungthu agen a, Felix in, suongkul taangmi khat anuasie a; 15Jerusalem a ka um laiin siempu liente leh Juda upaten athu ahing theisah ua, siemlou tangsah dingin ahing ngen uhi. 16Ken akung uah, ahehpa u’leh ahehte akimaituo ua, ahehna thu ua, ama adihna thu genna hun lemtang anei masangin, mi koima gawt dinga piehdoh pen Romemite dan ahisih hi, chiin ka dawng hi. 17Tuaziehin amaute tam mun a ahing peikhawm tah un, zekai louin, azingni in thukhenna toupha ah ka tou a, tua mipa hing pui dingin thu ka pie hi. 18Ama hehtute ahing din tah un, ka gintat bangtahin atung ah gitlouna hehna bangma agen thei sih uhi. 19Hinanleh amauh bieh dante leh, mi khat, ashisa, Paul in ahing kia hi chia agen thu a, kinielna nei ahizaw uhi. 20Tualeh ken tuabang dohnate ka theisiem lou ziehin, Jerusalem a peitou a, khuna tam thute khen a ut leh utlou ka dong hi. 21Hinanleh Paul in athukhen dinga Augustus kunga thu atut zieh in, Kaisar kunga ama ka sawldoh thei masangsie ama veng dingin thu ka pie hi,” achi hi. 22Tuachi’n Agrippa in Festus kungah, “Ken zong tua mipa thugen ka ngaikhe nuom hi,” achi hi. Aman “Zing chiengin” “Ama thugen na ngaikhe ding” achi hi.

Agrippa mai ah Paul

23Tuachi’n azingni in Agrippa leh Bernisi thupitah in ahing pei ua, galkap lamkai liente leh khopi miliente toh thugenna inn ah alut ua; Festus in thu apie a, Paul ahing pui uhi. 24Tualeh Festus in “Leengpa Agrippa leh tammun a ka kung ua um mi zousiete aw, tam mipa na mu uhi, ama pen Juda mipite zousie in Jerusalem leh Kaisaria mun ah, ka kungah aheh ua, hing taah ahi nawn sih chiin akikou uhi. 25Hinanleh shina ding khop hiel bangma abawl sih chi ka thei hi, aman Augustus kunga athu tut atup ziehin sawl dingin pha ka sat a hi. 26Hinanleh ka toupa kunga ama tungthu gel ding kichientah bangma ka nei sih hi. Tuaziehin na masang uah ka hing puikhie ahi; leengpa Agrippa, adiehin nangma masanga hing pui tuonse ka hi, aziehpen athu na dohchien nua a gel ding themkhat ka nei theina dingin. 27Aziehpen hehna kichientah genlou a, henta khat hing sawlpen kei adingin bawldan kilawm hiin ka thei sih hi,” achi hi.

Currently Selected:

NASEPTE 25: ZOUBSI

Highlight

Copy