NASEPTE 24

Paul uhpipa Felix masangah

1Ninga nuain Siempu lien Anania, upate leh dansiem Tertullus toh ahing peisuh ua, Paul amawsahna thute uh uhpipa kungah ahing tun uhi. 2Paul hatlut ahitahin, Tertullus in Paul aheh pan pai a, zatat huoi Pu Felix aw, “Nangma vangin Kouten lemna leh muonna thupitah ka neita ua, mailam hun na mulawhna in tam nam a dingin nopsahna ahing tun a, 3Bangchih lai pouin mun chin ah, lungdam tahin ka kipah ngitnget uhi. 4Ahivang in nang dinga chimtahhuoi ka hilouna dingin, na hepina a, ka thu uh themkhat hing ngaikhiet pieh dingin, ka hing ngen hi. 5Aziehpen kouten tam mi muda huoitah, leitunga Judate zousie tohbuoipa leh Nazareth mite pawl a alamkaipen khat uh ahi, ka thei uhi; 6Aman biehinnpi nangawn suhbua atum a, tualeh ama ka man ua, kouma dan toh kituoh a atunga thukhen ka sawm uh ahi. 7Hinanleh galkap lamkai lien Lisia ka kung uah ahing pei a, thagum hat in ka khut ua kipat ang lah piehta hi; 8Ama hehte nangma kunga hing pei dingin thu ahing pie hi. Nangma mama in ama dongchien lachin, ka hehna thute uh na thei ding hi. 9Tualeh Judaten zong, ama ahehna thu zousie adih ahina chi’n apang uhi.

Felix masangah Paul in adihna agen

10Tuachi’n uhpipa’n thugen dingin Paul akhutzap a, Paul in adawnna agen a: “Kum tam tah tam namte thukhen piehpa na hi chi ka thei ziehin, kipahtahin ka dihna thu ka gen ding hi. 11Jerusalem a Pasian be dinga ka peitou nua ni sawm leh ni ni val ahi nai sih ding chi na thei thei ding hi. 12Kei hing hehte’n biehinnpi a mi toh ka kiniel ahiei, ahisihleh kikhopna inn leh khopi sunga mipi ka chiilsietna bangma amu sih uhi. 13Tuin zong ahing hehnate uh, kichientahin abul asuikhe thei sih uhi. 14Hinanleh tam thu na kungah ka phuong ahi, Amaun bieh dan tuom achi uh Lam zui in ka pu leh pate uh Pasian ka bie a, dan leh guolneite laibu a kigiel zousie gingta ka hi. 15Mi dihtatte leh mi dihtatloute thawkiana a um ding chia amaute’n zong agintat uh, tua khu ken zong Pasian ah ka kineppi ahi. 16Tambang ahiziehin, Pasian leh mihing lama sie leh pha theikhenna nei a suhkhiel bei a um dingin ka kipaubawl vevaw hi.

17 # Nasep. 21.17-28 Kum tampi nuain ka nampite kunga, silpiehte pe ding leh sillatte lan dingin ka hing pei a, 18Alah uah Asia gam a hing kipan Juda miten ka kisiensuo laitah ahing mu ua, mipite toh ka umkhawm nai sih a, buoina zong a um sih hi. 19Tua miten ka tunga thubuoi nei ahi uleh tanah na masanga um in, hing heh u’leh ave le. 20Ahisihleh tam mite ngel in zong vaihawm mite masanga ka din laiin, ka bawlkhelna mu anei u’leh tua na masanga ka din laiin gen uheh. 21#Nasep. 23.6Amaute mai a mishi thawkiana thu ah, tunia noute masang a thukhenna tuoh dinga din sah a ka um, chia ka kikou khu ahiloungal leh chiin adawng hi.”

22Hinanleh Felix in tam thute azah tahin, tua ‘Lam’ thu khu atheichien deuta a, amaute kung ah, “Galkap lamkai lienpen Lisia ahing tun suh chiengin na thu uh, thutanna ka bawl ding hi,” chiin akhawlsah ta hi. 23Tuachi’n aman galkap zahoutu khat kungah, Paul khu venga zalen deu a um sah a, alawmten aneh leh dawn abawlpieh uleh ahing ve ding uh, khaam lou dingin thu apie hi.

24Ni bangza ahiei nuain Felix khu azi Judami Drusilla toh ahing pei ua, Paul ahan sah a, Khrist aginna thu angaikhie hi. 25Paul in dihtatna thute, kidehna thute leh vaihawmna hing tung ding thute agen leh Felix khu zau in achitun a, “Tuin peikia phot inlen, hun lem ka nei chiengin ka hing han kia ding” achi hi. 26Tuabangkaal ah ahakhietna dinga, Paul in sum apieh ding bang akinem a, Paul ahan sah mun mama a ahoupi thimthem hi. 27Hinanleh kum ni zouin Porsia Festus in Felix ahing hengta a, tualeh Felix in Judate kipahsah a ut a, Paul khu kaansa in anuasieta hi.

Currently Selected:

NASEPTE 24: ZOUBSI

Highlight

Copy