NASEPTE 23

1Paul in vaihawm pawlte a en pimpem a, sanggamte aw, tuni tan in Pasian masanga ka sie leh pha theina siengtah toh ka hinkhuo zangtou zel ka hi, achi hi. 2Tuachi’n siempu lien Anania in Paul kunga dingte kungah akam behpieh dingin thu apie hi. 3#Mat. 23.27,28Tuabep in Paul in akungah, nang baang kinungoupa Pasian in nangma hing beeng ding ahi aw! Dan toh kituoh a ka tunga thukhen dinga tou hinapi chin a, dan palsan a kei beeng dingin thu na pie maw? achi hi. 4Tualeh Paul kunga dingte’n, nang Pasian siempu lien, na hichi phawh ngam vielmaw? achi uhi. 5#Pawt. 22.28Tuachi’n Paul in sanggamte aw, ama siempu lien ahi chi ka thei sih a ahi; Na mite uh tunga vaihawm mite tungah thu hoilou gen sin, chi gel ahima ve, achi hi.

6 # Nasep. 26.5; Phil. 3.5 Hinanleh Paul in amaute lah a pawl khat Saddukaite ahi ua, adangte Pharisaite ahi uh chi athei tahin, vaihawm na ah akikou a, Sanggamte aw, Kei Pharisai ka hi a, Pharisai tapa ka hi, kinepna leh mishi thawkiana thu toh kisaia vaihawmna masanga dinsah ka hi, achi hi. 7Tam thu agen tahin, Pharisaite leh Saddukaite kaal ah kiselna a pieng a, vaihawm pawlte akilangkhenta uhi. 8#Mat. 22.23; Mak. 12.18; Luk. 20.27Aziehpen Saddukaiten, thawkiana mawngmawng a um sih a, vansawlsiengte leh hagau zong a um sih hi, achi ua, hinanleh Pharisaiten tuate gel a um ahi chi ahum uhi. 9Tuachi’n nasataha kiselbuoina a umta a, Pharisaite lam a pang laigiel mite adingdoh ua, tam mipa ah gitlouna bangma i mu sih uh, hinanleh hagau ahiei, vansawlsieng ahiei in akunga thu gen hikha leh, Pasian i dou sih ding uh, achi uhi.

10Ahing kiniel sang deudeu tah un, galkap lamkai lienpenpa’n Paul abawtel khah ding uh azau a, galkapte va pei suh a, amaute lah a kipat Paul va pummat a, galkapte giehbuh a hing zawpi dingin thu apie hi. 11Hinanleh azingni zanin, Paul kungah Mangpa ava dinga, Paul hamuong tahin um in; Jerusalem khuo a ka thu theipina thu na gen bangin, Rome khopi ah zong ka thu na theisah ding hi, achi hi.

Judaten Paul atha sawm uh

12Zing khuo ahing vah tahin Judate pawlkhat thu akikum ua, Paul atha masangsie ua, bangma ne leh dawn lou dingin, akichiemta uhi. 13Tambanga thu phiel dap a pawl kibawlte mi sawmli sanga tamzaw ahi uhi. 14Amaute siempu liente leh upate kung ah ahing pei ua, Paul ka tha masangsie ua, bangma nelou dingin kichiemna dettahin ka kichiem uhi. 15Tuaziehin nouten vaihawm pawlte toh, athu dong chien zawsem ding kipang unlen, zing chienga na kung ua hing puikhe suh dingin galkap lamkai lienpenpa kungah vagen un, tualeh ama na kung uh ahing tun masanga na that ding a mansa ka hi uh, achi uhi.

16Hinanleh Paul sanggamnu tapa in, ana dapbuh thu uh aza a, galkapte giehbuh ah avalut a, Paul kungah avahil ta hi. 17Tuachi’n Paul in galkap zahoutu khat akung ah ahan a, Tam tangvalpa, galkap lamkai lienpenpa kungah va zawpi in, aman akungah gen ut anei hi, achi hi. 18Tuachi’n aman galkap lienpenpa kungah azawpi a, hentapa Paul in akungah ahing han a, tam tangvalpa na kunga zawpi dingin ahing ngen hi. Aman na kungah gen ding bang ahiei khat anei hi, achi hi. 19Tuachi’n galkap lamkai lienpenpa’n akhut in atu a, atuomin apuidoh a, ka kunga na gen ut bang ahiei? chi’n adap doh hi. 20Aman, Paul thu kichien sema dongchien nuom kipangin zing chienga vaihawm pawlte kunga puisuh dingin Judaten hing nget lem asata uhi. 21Hinanleh athu uh na zop sin, aziehpen alah ua mi sawmli sanga tamzawten adap buh ua, tua miten Paul atha masangsie ua, bangma nelou leh dawnlou dingin akichiem uhi, tualeh tuin na thu ngah in mansa in a um uhi. 22Tuachi’n galkap lamkai lienpenpa’n tangvalpa apei sahta a, Tam thu na hing theisahta chi, koima hil sin, chiin thu apie hi.

Paul hutkhietna

23Tualeh galkap zahoutu ni ahan a: keng galkap zani toh, sakol tungtuong galkap sawm sagi toh, teipi tawi galkap zani toh, tuzan nai kuona a Kaisaria zuon a pei dingin kisa un. 24Tualeh Paul tuonna ding sakolte mansain guot unlen, uhpipa Felix#Felix-Juda gam uhpipa ahia, amin khiehna pen kipah or lungdam china ahi. kungah ama bittahin tunpi un, achi hi. 25Tualeh aman tambangin laithot agiel hi. 26Klaudia Lisia in, azatat huoi mama uhpipa Felix, chibai abuh hi. 27Tam mipa, Judate’n amat ua atha ding kuon un, ama Rome khopi mi ahi chi ka za a, galkapte toh kuon in kava hunkhie hi. 28Ama ahehna uh thei nuom in, avaihawm mite uh kungah ka peipi a; 29ahehna thu uh amauh dan toh kisai ahi a, shina ding khop leh khainienga kaanna ding khop hehna ahi sih, chi ka mu hi. 30Tualeh Judaten ama alambuh uh chi, mi’n ahing hil tahin, na kungah ama ka hing sawl pai hi, tua ban ah, ama ahehna uh nang kung tun dingin ama hehte zong thu ka pie hi, Mangpha.

31Tuachi’n athupieh bangin galkapten azan azan in Paul azawpi ua, Antipatri atun uhi. 32Azingni in sakol tungtuong galkapte’n Paul azawpi ua, adang teng giehbuh ah akinuale ta uhi. 33Amaute Kaisaria atun tahun, uhpipa kungah laithot apie ua, Paul zong amasangah ading sah uhi. 34Uhpipa’n laithot asim a, Paul umna gam adonga, Sisillia gam ahi chi atheitah in; 35Nang hing hehte ahing tun chiengun, na thu ka ngaikhe ding achi hi. Tualeh Paul pen Herod vaihawmna innsunga koi dingin thu apie hi.

Currently Selected:

NASEPTE 23: ZOUBSI

Highlight

Copy