LUK 4
4
Jisu Thwontsingkya
(Mat 4.1-11; Mrk 1.12-13)
1Jisu Jordan shua tokya Otsao Chasae awang le chat ilaxle Chasae chix faokha to zunle pao. 2Ikha to chix nyix punyi haxshixe thwontsing le ngo. Ibibi bama chixe chemchu chisax chiling, ikoxle ibu hanpak ashukle hüikya zuma chix woknuak e max.
3Haxshixe chix ang thüi: “Nang Zang Hosa jangchangba, ija long ang an ang achang angkya kax laxkox.”
4 #
Tsk 8.3. Ikoxle Jisu-e lan: “Otsao Lai ma akax ngole: Khünak a süt lanlan khoma ozün ma ngoüi münchang.”
5Chatlechu haxshixe haxnu kho to dün üntoxle mik ajepkya bama wüi chaxwannu Wangting bakle aho. 6Haxshixe thüi: “Nang ang kue ibibi tsakzong hia ngunsyen bakle koxüi. Ibu pangnu ku ang koxle thomdaoa, ku mong atsutsu ang kue ibu abakle kox ang tsuaküi. 7Nange ku to jangshwom thüiba ibibi bakle nang kux ang achangüi!”
8 #
Tsk 6.13. Jisu-e lan: “Otsao Lai ma thüile: Nange Jowanpa, nang Zang tata to shwomlax; chix mwot tix moklax!”
9Ifüima haxshixe chix Jerusalem to pao üntoxle Zangshwom-Hom homkho atsuakya khama angwot laxle chix ang thüi: “Nang Zang Hosa jangchang thüiningle ija makhange nang lualua to tswonle awüt hu. 10#Mts 91.11,12.Chemthüikoxle Otsao Lai ma akax kya tüile: ‘Zange nang to hume ang, kaxtaimixbu füi akaxüi, 11üntoxle nang cha ngaxchu long to nakfut le, hwome nang hale kopüi.’”
12 #
Tsk 6.16. Ikoxle Jisu-e lan: “Otsao Lai e akax ngole: Nang Jowanpa, nang Zang thwon taxtsing.”
13Otue haxshixe pangnu lom ma Jisu thwontsing kya ashuk, chixe chix onox ma danle tox.
Galili ma Jisu-e Chix Mwot Owang Wangkya
(Mat 4.12-17; Mrk 1.14-15)
14Ifüima Jisu Galili to chat. Otsao Chasa tsakzong chix ma tüikya. Üntoxle chix bama Kaxho ija tuitui pangnu khato wüi atat ang kop. 15Chixe Sinagok to hwon-ano üntoxle noke wüi chix achuak.
Nazareth ma Jisu Chilax
(Mat 13.53-58; Mrk 6.1-6)
16Ifüima Jisu chix tsonglokya Nazareth nok to pao, üntoxle nazakle nuikya nyix hwom wanlom ningle Sinagok to ngui ilaxle Otsao Lai e ang ajong. 17Ajepa Isaia laipex chix ang kox. Chixe laitün shakkya ma ile zakya kha bang:
18 #
Isa 61.1,2. “Jowanpa Chasa ku ma tüile;
mütmix shunmix hato,
Kaxho Müikya apüi ang chixe ku kam.
Kople thomkya hato,
dan angkya kax apuk angkya;
Mikduakbu hato,
ngün angkya kax apuk angkya;
mix fang to ngokyabu ang,
khangkho angai kox angkya;
19üntoxle Jowanpa-e chix khünaknu,
khosün pongle koptu nguiüna,
le apuk ang chixe ku ahyenpu.”
20Ifüima chixe laitün ashyep laxle tuzing mix ang kox ilaxle thung, üntoxle Sinagok ma tüikya pangnue wüi chix to mikzaple hu. 21Chixe hwom füi akax ang süt: “Anyix ija Lai Kax hünzom na ma atatle ekya makhange kotok to ngaile ahodaoa.”
22Üntoxle pangnue wüi chix mowün amüi, ilaxle chix tun makhange zingzama dongle akaxkya bama abüt. Ilaxle hwome thüi: “Ija a Jusep sasün münchangkox hia?”
23Chixe hwom ang thüi: “Ija wanwünkax hünzome ku füi akax angkya atsingsho: Kak-humix, nanglualua to müilax! Kue Kaparnaum to mokkya chempang bama hünzome atatdao puix, ibu ma tingsho machu mokle aho hüile hünzome thüiüi. 24#Jhn 4.44.Kue hünzom ang thüipu, ajepa ma tingsho ma otuechu pongle münkop.
25 #
1 Wa 17.1. “Ku kax apa hüi, changpu, Elija tsün ma otue zang azom lyet azok zangding ka hakle thomkya khoma zang chiwatpuix, üntoxle ongai chaxwannu hato chongkya otui-onuak hüipuix, ipongma Israel zomnubu tüihukya. 26#1 Wa 17.8-16.Ikoxlechu Elija Israel haxtok angkya zomnubu owa hatochu chiapao, Sidon angkya Zarefat ma ngokya zomnu tuita hato tata apao. 27#2 Wa 5.1-14.Üntoxle Elisha ajepa tsün ma Israel haxtok ma angwonkyabu tüihukya; ikoxle hwom owachu chiamüi; Siria nok Naman tata amüi.”
28Üntoxle ibu kax atatkya ma, Sinagok ma asukya nok ang wüi mongtsik dong. 29Üntoxle hwom ajong laxle tingsho angkya chix jwonle alai, üntoxle haxhua oja ma hwom tingkhua zingle thomkya hex, ija haxhua akixkya kha tokhange zaksam to tswonle awüt ang chix pao. 30Ikoxle chix khünaknu osungkha makhange laile ikha angkya chix paole azang.
Haxshix Chasa Füikya Mixsün Tuita
(Mrk 1.21-28)
31Ifüima Jisu Galili angkya Kaparnaum nok to pao. Ikha to chixe nazak nyix khünaknu hama hwon-ano. 32#Mat 7.28,29.Hwom pangnu wüi chix hwon-nwot khoma abüt, chemthüikoxle chixe otsak ozong füi apua ano. 33Sinagok ma haxshix chasa füikya mixsün tuita tüikya; 34chixe akhongle thüi: “Ei, Nazareth nok Jisu, nange kwom füi chem mok angkya tüikya? Nang kwom amüt ang hüipia? Nang owahex kue awanle. Nang a Zang Otsao Kaxho mix changle!”
35Jisu-e chix to sale akax: “Dangün, üntoxle ija mixsün angkya laiün!” Haxshixe ija mixsün hwom thünthoma tswonle awüt toxlaxle chix to oma chemchu chimok homle laile pao.
36Khünaknu nok wüi abüt laxle tata füi akax: “Ibu kax chemningkya hex? kaxza zongle ija khünake haxshix chasabu ang kaxkox koxle hwom laile paotüia!” 37Ilaxle ija tuitui pangnu khato wüi chix mo wünle pao.
Jisu-e Khünakbu Kak Amüi
(Mat 8.14-17; Mrk 1.29-34)
38Jisu-e Sinagok toxlaxle Simon hom to pao. Simon honyenu tundün kak kakle ngokya. She kakle ngokya hwome chix hama wün. 39Chix dong üntoxle she jiple ngokya lya hama ajong ilaxle tundün to sa, ikoxle tundüne she danle tox. Ijama wüi zolaxle she e hwom sütling to humele fa.
40Zanghan düt füima, kakmix atüitüi ma zuikhuibu, küjo-küjekya kaklak füikya khünakbu Jisu hato apüi; chixe hwom pangnu towüi chake twon üntoxle pangnu kak wüi amüile fa. 41“Nang a Zang Hosa changpu”, le akhong-khong laxle khünak züitabu angkya haxshihbu laile pao.
Jisu-e hwom ang akax ang jao chikox le sa, chemthüikoxle hwome chix a Messaiah changpule awan.
Sinagokbu to Jisu-e Hwon Ano
(Mrk 1.35-39)
42Anopning swome mix kongkya khato pao. Khünaknue chix lom; ilaxle hwome chix atak kya zuma, chix pao ang chikox le thom ang azong. 43Ikoxle chixe hwom ang thüi: “Kaxho Müikya a kue mama tinghax tochu apuk angkya changle, chemthüikoxle ija mok angkya hanpakma Zange ku tomle apaokya changpu.”
44Ijadaile chixe pangnu tinghax towüi Sinagokbu to nguilaxle hwon-ano.
Currently Selected:
LUK 4: WANCBSI
Highlight
Share
Copy
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
