LUK 5

Jisu-e Owang angkya Wangshembu Nyakkya

(Mat 4.18-22; Mrk 1.16-20)

1 # Mat 13.1,2; Mrk 3.9,10; 4.1. Nyixta Jisu Geneseret Shinthuk-titung kaxma ajongle ngoponge khünaknu abobosüt le Zang Kax apa ang chix hato hüi. 2Chixe jinu kaxma khua anyi ngün; ikha angkya nyaxkop mixbu thai laxle sha sole ngokya. 3Chix khua tuita, oja Simon kux changkya hex, ija ma ngalaxle, khua shuakax angkya hidaole jimong to ajenkox le chix füi akax. Üntoxle thung laxle khua makhange chixe khünaknu othom hama hwon-ano.

4Chix kax ashuk füima chixe Simon ang thüi: “Khua ji zukya khato chüile paokox, ilaxle hünzome nyax kop ang sha fulax.”

5 # Jhn 21.3. Simon-e lan: “Kwome jamütungle sha thuppu ikoxle tuita ngaxchu chikop; nange ile jangthüiba kue sha thuple anohuhax.” 6#Jhn 21.6.Hwome sha thuple adüt ilaxle shabu kyet ang thüile nyax huanuma kop. 7Ikhoma hwome mama khua ma tüikya hwom füikyabu asun ang hüihüi le chake jep. Hwom hüilaxle khua monyi wüi ji to düt ang thüile awang le nyax dan. 8Simon Pitar-e ile changkyabu ngünkya zuma, Jisu chitong ma akhuxle shwomle chix ang thüi: “Jowanpa, ku ha angkya shongpao fa! Ku a ochax khünak tuita changle!”

9Chix üntoxle chix füikya katthombu hwome kopkya nyax ngünlaxle abüt. 10Simon hozui, Jakop hia Juhan, Zebedi sasün nyichu ilewüi chang. Jisu-e Simon ang thüi: “Taxza! Athax makhange nang khünak kople ngo angkya mix ang achang angkya changle.”

11Hwome khua fa to bele adün tox, pangnu danle tox, üntoxle Jisu füito pao.

Jisu-e Kakmix Tuita Amüi

(Mat 8.1-4; Mrk 1.40-45)

12Hanpak tuita ma ngwon kak füikya mixsün tuita tüikya tingsho to Jisu nguile asu. Otue chixe Jisu ngünle laxpuix, chix alüile chixe Jisu chitong to tswonle awüt le thüi: “Jowanpa, nang mong jangtsuba nange ku amüi ang tsuak!”#5.12: ku amüi ang tsuak: Ija a khünak tuita zanglom ma chitsaokya ang achangkya kak changkya.

13Jisu-e chix chak thui üntoxle chix to twon, ilaxle thüi: “Ku mong tsule, nang müilax!” Ima wüi ija kake ija khünak danle tox. 14#Liw 14.1-32.Ilaxle Jisu-e chix ang owa hamachu taxwün-ole thüi. Ilaxle chixe thüi: “Nang paolax, nang alüile nguapa hato aholax, üntoxle hwom hato nang kak müiüna le aho ang, nang atsaole fakya khoma, Mosa Wanlom ma tüikya ningle to koxle zomzinglax.”

15Ikoxlechu chix bama kax süpu-süpu le pule pao, ilaxle chix kax apa ang hia hwom kak müi angkya hanpakma chix hato khünaknu huanuma asox. 16Ikoxlechu mix kongkya khato paolaxle chixe zangjop.

Jisu-e Faishok le Kak kya Mix Amüi

(Mat 9.1-8; Mrk 2.1-12)

17Nyixta Jisu-e hwon-ano le ngoponge, Galili hia Jehudi üntoxlechu Jerusalem pangnukha tokya nguikya farisibu hia wanlom nwotmixbu ikhama thungle tüikya. Tamchu Jisu-e kaklak amüi angkya hanpakma Jowanpa tsakzongchu hakle tüikya. 18Khünak züizüi e faishokle kakkya mixsün tuita lya ma paile apüi, üntoxle hwome chix hommong to paile anop laxle Jisu thünthoma dan ang azong. 19Khünaknu huanuma tüikya khoma hwome chix hommong to dün ang chitho, ilaxle hwome chix homkho to ngat, loxtok khutle wo, üntoxle chix khünaknu osung khato Jisu thüntho wama lya ma ashale ajo. 20Otue hwom mongong itukux kya Jisu-e ngünle laxpuih, chixe ija mixsün ang thüi: “Shempa, nang ochax thailak koxdaoa.”

21Wanlom tsingpabu hia farisibue hwom-hwom tata füi zangwün ang süt: “Zang adale akax ang chix owa changlaxpuix! Ochax thailak koxtsuak angkya Zang tata wüi!”

22Jisu-e hwom mongjang awanlaxle hwom ang thüi: “Hünzome iningkyabu büthüikoxle ajang ngopu? 23‘Nang ochax thailak koxdaoa’ le thüi ang wüi süchwon pia; chichangba, ‘zolax, üntoxle ahamlax’ le thüi ang wüi chwonpuix? 24Ikoxlechu chaxwannu ma ochax thailak kox angkya Khünak Hosa ma zong tüile le kue hünzom ang awan ang koxüi.” (Chixe faishokle kakkya mixsün ang thüi): “Kue nang ang thüipu, zolax! Nang jiplya koplax ilaxle nang hom to chatlax.”

25Ijama wüi thuile hwom pangnu thüntho ma ija khünak zole ajong, chix jiple ngokya jiplya kop, ilaxle Zang mün achuakle hom to chat. 26Hwom pangnu wüi abütkyae khosam! Zakyae awangle Zang achuakle hwome thüi: “Anyix keme chem ohünotün ngünpuix!”

Jisu-e Liwi Nyak

(Mat 9.9-13; Mrk 2.13-17)

27Ifüima Jisu laile pao ilaxle süisai mix Liwi le amünkya mixsün, chix pa ma thungle ngokya ngün; Jisu-e chix ang thüi: “Ku füito oman.” 28Liwi ajong, pangnu danle tox, ilaxle chix füito pao.

29Ifüima Liwi-e Jisu hanpakma chix hom ma fongkha, üntoxle mixwünbu khama süisai mixbu hia mama khünakbu tüihukya. 30#Luk 15.1,2.Hwom othom khama asukya züizüi farisibu hia wanlom nwotmixbue Jisu wangshembu füi mongtsik mongma kax apüile akax: “Hünzome süisai mixbu hia ochax khünakbu füi tomle büthüikoxle saxling pu?”, le hwome atüi.

31Jisu-e hwom kax to lan: “Müimüi zang-ngai le ngokyabue kak-hu-mix lom angkya chem mwot müntüi, ikoxle kakmixbue tix lomüi wüi. 32Kuchu mong chat angkya hato alixachongbu nyak ang chichangle tu khato e-ma chilaxle thomkyabu ahyen ang nguipu.”

Chisax-chilingle Zangjopkya bama Atüikya

(Mat 9.14-17; Mrk 2.18-22)

33Züizüi khünake Jisu ang thüi: “Juhan wangshembue süt-sax ti chiling homle tele le nui üntoxle zangjople, ilaxle Farisibu wangshem hwomechu ilewüi mokle; ikoxle nang wangshembue sax lingle changle.”

34Jisu-e lan: “Hünzome tuipa hwom füi ngongale aju-asomkya khama tüikya zuikhuibu woknuak-tilan ma thomüi hia? 35Ikoxlechu hanpak nguile hüiüi, otue tuipa hwom kha angkya paoüihex, ifüima hwome chisax chilingle changüi.”

36Anaolechu chixe hwom füi kaxpan tuita akax: “Owaechu nyizün angkya kyetlaxle nyizang to münthap. Ile changkoxle chixe nyizün akyet angkya laiüi, ilaxle nyizün thapkya nyizang füi chiashemüi. 37Chichangba namfyet tankya grep-ti müikhwon sang ozang ma münsho. Ile changkoxle grep tie müikhwon sang akyetüi, ilaxle grepti-ju ashix-khaxüi, üntoxle müikhwon sang amaüi. 38Idaile grepti-ju namfyet tankya a müikhwon sang hozün ma wüi sho angkya changle. 39Üntoxle grepti-ju ozya ling füima owaechu namfyet tankya lingse chitsuüi; chemthüikoxle chixe thüiüi, ‘Ozya wüi sümüi tüia.’”

Currently Selected:

LUK 5: WANCBSI

Highlight

Copy