LUK 10

Jisu-e Puzombün Anyi Tsanle Apao

1Ifüima Jowanpa-e puzombün anyi#10.1: puzombün anyi; züizüi laiza ma tüikya a 70. khünak kam, ilaxle chix pao angkya tingkhua hia chaxwan pangnu khato, chix thoma achale mixhuak anyinyi tsanle apao. 2#Mat 9.37,38.Chixe hwom ang thüi: “Tsax atu angkya tüihu le, ikoxle ija afox angkya mix hidaole wüi. Ijadaile, chix haxtok ma mwotmix akat hüile haxtok hopupa to jopkox. 3#Mat 10.16.Paolax! Kue hünzom shwonzyem khato chun hosabu ningle apaopu. 4Nyithumsa wüi changlax, nyitsong wüi changlax, chisox wüi changlax, tütachu taxkop; üntoxle lomba to owawa füi salam kaxzex ang taxzak. 5Otue hünzom kako to nguiüi hex, pongwang ma, ‘Ija homkha ma mongsom naxtüi’ le thüilax. 6Ikhama mongsom to künkya mix jangtüiba, hünzome fakya mongsom chix ma naxngo; chitüi thüiba hünzome mongsom salam chatle achatle laxdao. 7#1 Ko 9.14; 1 Ti 5.18.Ilaxle ija homkha ma hwome chem fapuix, ija saxling le ngolax, chemthüikoxle mwotmok mix ang hingchak mün kox angkya wüi changle. Ijadaile ata hom tokya ata hom to le taitailai le tax aham ngo. 8Otue hünzom tingnu to nguiüihex üntoxle pongle kopüihex, hünzom ang humele koxkyakya saxkox; 9ija tingnu angkya kakmixbu amüikox, ilaxle ikhama ngokya khünaknu ang thüikox, ‘Zang Wangting hünzom hato soxle nguile tüile.’ 10#Mwt 13.51.Ikoxle otue hünzom tingnu to nguiüihex üntoxle pongle chikop üihex, lomnu ma lai laxle thüikox, 11#Mat 10.7-14; Mrk 6.8-11; Luk 9.3-5.‘Kwom cha to myenkya labu to apüile kwome hünzom füikya mongmae sakle toxpu. Ikoxlechu ija kax akhax koplax, Zang Wangting a hünzom hato soxle nguile tüile.’ 12#Pon 19.24-28; Mat 11.24; Mat 10.15.Kue hünzom ang thüipu, kaxfünkya nyix Zange ija tingnu füi Sodom nok hato wüi chingcha süchongle ahoüi!

Jisu to Mong Chiongkya Tingnubu

(Mat 11.20-24)

13 # Isa 23.1-18; Ezk 26.1—28.26; Jol 3.4-8; Amo 1.9,10; Zek 9.2-4. “Khompua taxatsik, Korazin! Khompua taxatsik, Bethsaida! Chemthüikoxle hünzom khama mokkya ohünotün mwot Taiar hia Sidon nok ma mokpuix jangthüiba, hwome nyitsyen zahom laxlaxle üntoxle labue fu laxle thungle amiba wüi hwom mong chatkya ahodaose. 14Ikoxchu kaxfünkya nyix Zange hünzom füi Taiar hia Sidon hato wüi chix chingcha süchongle ahoüi. 15#Isa 14.13-15.Üntoxle Kaparnaum, nang ding to nwonle thomse texpuix nyi? Nang amalum fang to ajoüi!”

16 # Mat 10.40; Mrk 9.37; Luk 9.48; Jhn 13.20. Jisu-e chix wangshembu ang thüi: “Owae hünzom kax apapuix hwome ku kax apapu; ilaxle opange hünzom pongle chikop puix hwome ku pongle chikoppu; üntoxle owae ku pongle chikop laxpuix, chixe ku tsankya mix pongle chikopkya changpu.”

Puzombün Anyi Chatkya

17Üntoxle puzombün anyi#10.17: puzombün anyi; züizüi laiza ma tüikya a 70 (okhix 1 to hulax). khünak mongmüi atungle chat. Hwome thüi: “Jowanpa, nang mün ma kaxkoxkya zuma haxshix chasabuechu kwom kax ma laxle.”

18Jisu-e hwom kax to lan: “Ding to khange jantsang ajepkya ningle bao dütkya kue ngünpu. 19#Mts 91.13.Hulax, pu hia twonsi dingma aham ang üntoxle zan tsakzong pangnu to lüt angkya kue hünzom ang zong koxdaoa, ilaxle tütaechu hünzom thom münzünüi. 20Ibachu haxshix chasabue hünzom kax ma laxkya khoma hünzom ang mong taxmüi, itülüi zangkangting to hünzom mün zale tüikya khoma mongmüilax.”

Jisu-e Zang Achuak

(Mat 11.25-27; 13.16-17)

21Iponge Jisu Otsao Chasa#10.21: Otsao Chasa makhange; züizüi laiza ma tüikya a Otsao Chasa-e; chatle mama ma tüikya a chix chasa ma. makhange mongmüi e awang, ilaxle chixe thüi: “O Apa! Ding-hi-hax Jowanpa! Hwontüi-jezaikyabu miksho ma nange pyenle thomkyabu chitsing-chiwan pomthoma ngaile aho koxkoxle kue nang mün achuakpu; changpu, Apa! Ile chang angkya nang mongtex changpu!

22 # Jhn 3.35; Jhn 10.15. “Apae ku ang pangnu li koxdaoa. Hopa boma Hosa owaechu münawan; üntoxle Hosa hia Hosae opang hato Hopa ngaile aho ang zünle koplaxpuix, hwom boma Hopa owaechu münawan.”

23Üntoxle wangshembu chito aküi laxle chixe hwom hama ahuxle thüi: “Hünzome chempang ngünpuix, ijabu ngün ang kopkya hünzom huanu shomüi mixbu changpu! 24Kue hünzom ang thüipu: Hünzome ngünkyabu ngünse le ajebu hia wanghombue tüle-tüle texkya ikoxchu hwome ibu chingüntsuak, ilaxle hünzome atatkyabu atatse le sunghukya, ikoxchu ibu hwome atat ang chikop.”

Müikya Samaria Kaxpan

25 # Mat 22.35-40; Mrk 12.28-34. Wanlom tsingpa tuita tüikya, chix hüi ilaxle Jisu tsünle atüi: “Nwotmix, oshuk chitüikya tsün atak ang kue chem moküi?”

26Jisu-e chix kax to lan: “Wanlom ma büle zale tüipuix? Ibu e laxle nange chemtsing?”

27 # Tsk 6.5; Liw 19.18. Ija mixsüne lan: “Nang mongtsange abakle, nang chamuae abakle, nang tsakzonge abakle, üntoxle nang khangkae abakle, Jowanpa nang Zang to mongkünlax; üntoxle nange ma tukux tomzi to künlax.”

28 # Liw 18.5. Jisu-e chix ang thüi: “Nang kaxlan changtomtale, ile moklax ikoxle nang ozün ma ngoüi.”

29Ikoxlechu Wanlom tsingpae chix lualua to chix supu le aho ang Jisu ma chatle ile atüi: “Ikoxle ku zongma tomzi owa?”

30Jisu-e lan: “Mixsün tuita Jerusalem tokya Jeriko to juüi lom ma ahamle tüikya; chix füi mixshix-mixmabu apong; hwome chix akhople kop; hwome chix to chiet-müilaxle nyiza pale lax; üntoxle hwome chix zün-zün-mang le danle tox. 31Chemthüiküma hexle ija lom makhange nguapa tuita lele asu. Ikoxle chixe ija mixsün ngünkya zuma, chix tüchi tokhange tsyakle le. 32Chix füima lüile Liwi sün tuitachu wüi ikha to hüile asu, chixechu ija mixsün ngünlaxle tüchi tokhange tsyakle le. 33#2 Pp 28.15.Ikoxle Samaria khünak wünham mix tuita ija lom ma hüile ngokya, chixchu ija mixsün nguakle ngokya hato ngui. Ija nguakle ngokya mixsün ngünlaxle chix mongto chingcha dongle hu. 34Chix ija mixsün hato hüi, chix mak to mün-nga hia ju-e pa ilaxle lople kox. Üntoxle chixe ija mixsün chix gatho tokma angatle lax, üntoxle wünpom nui to apüile chix to hume. 35Ofüi nyix chixe ngunhuak anyi syetle koxlaxle wünhom hopunu ang thüi: ‘Chix to humekox, ilaxle nange onüi chemtukux ashixpuix, ija ku chatle nguikya zuma nang ang thomüi.’

36“Jisu-e chix ma atüi, hwom mixhuak azom khama, thomzün apongkya mixsün zongma tomzi ningle opupue mokpuix?”

37Wanlom tsingpae lan: “Chix ang chingcha ahokya mixe.”

Jisu-e chix kax to lan: “Paolax üntoxle nangechu ile mokkox.”

Jisu-e Martha hia Meri nyi Wai

38 # Jhn 11.1. Jisu hia chix wangshembu lom to ahamle tüiponge, tingkhua tuita to ngui, üntoxle Martha le amünkya mixcha tuitae chix wün-pwonle pongkop. 39Üntoxle she ang Meri le amünkya honao tuita tüikya, she-e a Jowanpa chitong ma thung laxle chix kax apa. 40Ikoxle Martha a fongmok suisong angkyadu mwote ojaja chimokle apang, ikhoma she Jisu hato hüilaxle thüi: “Jowanpa, ku-naoe mwot ku tatae mok ang dantoxkya nange münawan hia? Ku to fongle laxkoxle she tsankox.”

41Ikoxle Jowanpa-e lanle thüi: “Mwot khoma abanle nang mongsikangün puixnyi; ikoxlechu laxli a tuita wüi changle. 42Meri-e wüi changkya lom zünle kopdaoa, ilaxle ija she angkya chipaoüi.”

Currently Selected:

LUK 10: WANCBSI

Highlight

Copy