LUK 9
9
Jisu-e Wangshem Bün anyi Tsanle Apao
(Mat 10.5-15; Mrk 6.7-13)
1Jisu-e wangshem bün anyi nyak üntoxle haxshix jwon angkya hia kaklak amüi angkya tsakzong kox. 2Ilaxle Zang Wangting bama kaxho apuk ang hia kaklak amüi ang ibibi kaxtom füi hwom apao: 3“Hamlom bama hünzome chemchu taxkop; kaithoxchu taxkop, nyitsongchu taxkop, sütchu taxkop, ngunsyenchu taxkop, nyiza ngaxchu onüi taxkop. 4Ojong khato hünzom pongle koppuix, ija tingsho angkya mapaopaoba pongle kopkya kako ma athong laxle ikha makhange ahamkox; 5#Mwt 13.51.#Luk 10.4-11. Ojong khato khünaknue hünzom pongle chikop üihex, ija tingsho dantoxdao, ilaxle hwom nak-khünlax ang hünzom cha angkya labu ngaxchu hongle toxdao.”
6Wangshembu pao üntoxle pangnu tingsho towüi aham, Zang Wangting bama Kaxho Müikya apuk ilaxle pangnu khato wüi kakmixbu amüi.
Jisu Ma Herod Khosam
(Mat 14.1-12; Mrk 6.14-29)
7 #
Mat 16.14; Mrk 8.28; Luk 9.19. Otue Galili apünkya Herod-e ile changkyabu zing atatlaxpuix, chix ang huanuma khosam, chemthüikoxle züizüibue Baptikya mix Juhan azangle zoüna le akax. 8Mamabue Elija laiüna le akax, üntoxle kaipongkya aje tüta thüichu laiüna le akaxkya mixchu lai. 9Herod-e thüi: “Juhan nang kue dingsomle langdao; ile changkyabu zing kue atat ang kopkya chix owa?” Ilaxle chixe Jisu ngünse le lomle ngo.
Jisu-e Hajat Aga Khünaknu Tux
(Mat 14.13-21; Mrk 6.30-44; Jhn 6.1-14)
10Wangshembu chat üntoxle hwome mokkyabu pangnu Jisu hama wün. Chixe hwom chix füito laxlaxle Bethsaida ting to pao. 11Otue khünaknue ija zing atatpuix, hwome chix man to. Chixe hwom mongmüi le pongle kop, hwom hama Zang Wangting bama akax; ilaxle amüi ang lomkyabu ang kak amüile kox.
12Zanghan düt ang thüile tüiponge wangshembu chix hato hüi üntoxle thüi: “Hoxhoxle tüikya tingkhuabu to paolaxle hwome sütling hia jipnui pomnui atak tsuak angkya zongma khünaknu fan ang laxkox, chemthüikoxle ikha a owa ngax chitüikya wandangja kya faokha changle.”
13Jisu-e hwom ang thüi: “Hünzome hwom ang saxling küli laxkox.” Hwome lan: “Kwom ma tüikya ashukle an khao aga hia nyax jang anyi wüi. Kwom pao üntoxle khünaknu hanpakma süt shaklax lekya kax hia?” 14(Ikhama khünak mixmüimüi hajat aga tukux tüikya)
Jisu-e chix wangshembu ang thüi: “Khünaknu punyibün pong athomthom le ngo ang laxkox.”
15Wangshembue ile mokkya füima; 16Jisu-e an khao aga hia nyax jang anyi kop, ding to angakle hu, ibu hanpakma Zang ang münchong fa, ibu akhix, ilaxle khünaknu ang ahanle laxkoxle wangshembu chak to kox. 17Hwom pangnue wüi okhongui le sax, ilaxle ota-otua toxkya wangshembue sang bün anyi tswonle kop.
Jisu bama Pitar-e Ngaikya
(Mat 16.13-19; Mrk 8.27-29)
18Nyixta Jisu, chix tatae jople ngoponge wangshembu chix hato ngui. Chixe hwom ma atüi: “Khünaknue ku ang owa le thüipuix?”
19 #
Mat 14.1,2; Mrk 6.14,15; Luk 9.7,8. Hwome lan: “Züizüi e nang Baptikya mix Juhan changpule, züizüi e Elija changpule üntoxle mamabue a kaipongkya ajepa tüta thüichu chatkya changüi le thüile.”
20 #
Jhn 6.68,69. Chixe hwom ma atüi: “Ikoxle hünzome büle tex? Hünzome ku ang owa le thüipu?”
Pitar-e lan: “Nang a Zang tokhange nguikya Messaiah changle!”
Jisu-e chix Sikngün hia Zik bama Akax
(Mat 16.20-28; Mrk 8.30—9.1)
21Ifüima Jisu-e ija kax owa hamachu chiwün angkya hwom füi kaxshing kople akax. 22Chixe ilechu wüi thüi: “Khünak Hosa sik huanuma ngün angkya jao, üntoxle mixpa tüichongbue, nguapa akhokyabue ilaxle Wanlom nwotmixbue chix chilaxle awütüi. Chix langüi ikoxlechu nyix azom lekya to chatle azangle zoüi.”
23 #
Mat 10.38; Luk 14.27. Üntoxle chixe hwom pangnu ang thüi: “Owawae ku füito hüise jangtsuba, chixe ma alak angkya changle, nyixfole chixe ma pünsak kop laxle tix ku füito hüi angkya changle. 24#Mat 10.39; Luk 17.33; Jhn 12.25.Chemthüikoxle matsün khosünse le texkyabue ija amütüi, ikoxle ku khoma owae matsün amüt laxüihex, chixe ija sünle kopüi. 25Khünake chaxwannu pangnu kople tsuak ikoxlechu ma khüzün amütle thom chichangba mixe lüt ang koxle changkoxle, chix ang lap tüiangcha mi? Müntüi! 26Khünak tuita ku hanpakma hia ku kax hanpakma jangazak thüiba, Khünak Hosa-echu Hopa fuazang ma kaxtaimixbu füi nguikya zuma chix hanpakma azaküi. 27Kue thüipu, Zang Wangting mangün tanto chizi angkya atsingsho le ikhama züizüi tüile.”
Sün Lüikya
(Mat 17.1-8; Mrk 9.2-8)
28Chixe ile akaxkya hatdang tuita füima, Jisu-e, Pitar, Juhan hia Jakop hwom kop laxle haxnu kho to zangjop ang dong. 29Chixe zangjople ngoponge, chixsün-chixjo jei üntoxle nyiza jikjyeple nyanle tse. 30Allele mixhuak anyi chix hato lai laxle zangwünle ngo. Okhi a Mosa hia Elija nyi changkya. 31Okhi Zangkangting fuazang ma lai, ilaxle aluile chingo homle chix Jerusalem ma zikya makhange Jowanpa mongtex mwottho büle otok to ngaile aho üihex, ibu bama Jisu füi zangwün. 32Pitar hozui hwom a mikngüt müile jip ngo, ikoxle hwom zolaxle Jisu fuazangkya hia chix hama ajongle ngokya mixsün anyi ngün. 33Ija mixsün nyie Jisu dantoxlaxle pao, iponge Pitar-e chix ang thüi: “Nwotmix, kem ikhama ngokya müihule! Kwome nyihom azom zingüi; tuita a nang hanpakma, tuita a Mosa hanpakma, ilaxle tuita a Elija hanpakma.” (Chixe chem akaxpuix ija chixe chiawan).
34Chatlechu chixe akaxle ngoponge, zangfwom thwomta hüilaxle ochaxbae hwom to khung; ilaxle hwom khangkho ma zangfwom hüikya zuma wangshembu za. 35#Isa 42.1; Mat 3.17; 12.18; Mrk 1.11; Luk 3.22.#2 Pit 1.17,18. Zangfwom angkya kaxzing laile akax: “Ija a Kue kamle kopkya Ku Sasün changle; chix kax ma laxlax!”
36Otue ija kax ashukpuix, ikhama Jisu chix tata bang. Wangshembue idubu pangnu hanpakma dangle ngo, ilaxle iponge hwome ngünkya tütachu owa hamachu chiwün.
Jisu-e Haxshix Chasa füikya Lükasa tuita Amüi
(Mat 17.14-18; Mrk 9.14-27)
37Ofüinyix Jisu hia chix wangshem hwom azom haxnukho tokya ju, üntoxle khünaknu othom chongkya tuita Jisu füi apong. 38Othom kha angkya mixsün tuita akhong: “Nwotmix, chingchalaxle kusa lükasa, chix tata wüi tüikya to shonghufa. 39Haxshix chasa tuitae kop laxle chix abütsünsün le akhong-khongle, ilaxle tsünle zi ang kox üntoxle wikha ma thuakbuak lai ang koxle. Ile chix tsangtsa thule asyep le machang-changba chix angkya jao laile münpao. 40Kue nang wangshembu ang shongapaofa thüikoxle hwome münapaotho.”
41Jisu-e lan: “Hünzom mongong chitüikya üntoxle thaikya khünakbu changle! Ku hünzom füi tomle otukux tomta naxngole? Hünzom füi athongle ku otukux ngoüi?” Ifüima chixe ija mixsün ang thüi: “Hünsa ikha to apüihüi.”
42Naosa hüile ngoponge haxshixe chix haxkha to tswonle awütle tsünle azik. Jisu-e haxshix chasa ang kaxkox, naosa amüi, üntoxle hopa ang achatle kox. 43Pangnu tsuak kya Zang tsakzong ngünlaxle khünaknu nok wüi abüt.
Anaolechu Jisu-e chix Zik bama Akax
(Mat 17.22-23; Mrk 9.30-32)
Chixe mokkyabu hanpakma pangnu wüi abüt-abanle ngoponge, chixe chix wangshembu ang thüi: 44“Ijabu zangwün hünzome na ma awünle koplax, chemthüikoxle Khünak Hosa khünaknu chak to owüiole kox angkya changle.” 45Ikoxlechu wangshembue ija kax chem hanpakhex chiawan; hwome awan ang chikoxle ija zangwün pyenle thom, üntoxle ija bama chix ma atüi ang hwom za.
Achongkya Owahex?
(Mat 18.1-5; Mrk 9.33-37)
46 #
Luk 22.24. Hwom achongkya opupuhex le wangshembu khama zangwün tsa. 47Jisu-e hwom mongjang awan, idaile chixe naosa tuita kop, ilaxle chixe ija nao chix zui ma ajong; 48#Mat 10.40; Luk 10.16; Jhn 13.20.ilaxle hwom ang thüi: “Ku mün ma ija nao owae pongle kopüihex, ku pongle kopkya changpu; üntoxle owae ku pongle koppuix chixe ku tsanle apaokya mixchu pongle koppu; chemthüikoxle hünzom khama ahixkya opupu hex, pangnu füi achongkya chix changpu.”
Nang zongma Zan chichangkya a Nang Zuikhui
(Mrk 9.38-40)
49Juhan-e akax: “Nwotmix, nang mün ma haxshix jwonle apaokya mixsün tuita kwome ngünle, ilaxle kwome chix ang zakün le akaxdaoa, chemthüikoxle chix a kem othom kha angkya münchang.”
50Jisu-e Juhan üntoxlechu wangshem mamabu ang thüi: “Chix taxabaxkox, chemthüikoxle kem füi zan chichangba chixchu kem hanpak hex.”
Samaria Noke Jisu Pongle Chikop
51Chix zangkang to dün angkya hanpak nguile hüikya zuma, chix mongto ajang ilaxle Jerusalem to pao ang lai. 52Chixe achale kaxho mixbu apao. Hwom Samaria angkya ting tuita to chix hanpakma pangnu achwon ang ngui. 53Ikoxle ikha tokya khünaknue chix pongle chikop, chemthüikoxle chix a atsingsho le Jerusalem to pao angkya chang. 54#2 Wa 1.9-16.Wangshem Juhan hia Jakop nyie ija ngünkya zuma, hokhie thüi: “Jowanpa, hwom tha ama ang kwome ding tokya wün se ang nang mong tsucha hex?”#9.54: Züizüi laiza ma thüile Elija-e mokkya ningle.
55Jisu-e aküi laxle hokhi to sa.#9.55: Züizüi laiza ma obo ang ilaxle thüi: “Hünzom chemningkya chasa kuxhex, hünzome müntsing; chemthüikoxle Khünak Hosa a khünak amüt angkya hanpakmale münchang ikoxle azün angkya hanpakmale nguipu.” 56Ifüima Jisu hia chix wangshembu mama nok to pao.
Jisu Wangshem ang Achangtsuak angkya Mix
(Mat 8.19-22)
57Hwom lom to ahamle ngoponge, mixsün tuitae Jisu ang thüi: “Nang apaopao khato ku nang füito azuiüi.”
58Jisu-e chix ang thüi: “Hijanbu ang olua tüipu, üntoxle osabu ang ozop tüipu, ikoxle Khünak Hosa ang shuile nazak angkya kha onui jaojao chitüi.”
59Chixe mama mix ang thüi: “Ku füito oman”. Ikoxle ija mixsüne thüi: “Nwotmix, ku hom to chatlaxle owangole apa mang zule toxhüiang.”
60Jisu-e lan: “Zikyabu ma zuk-zuk to zu ang toxdao. Nang paokox ilaxle Zang Wangting bama apukkox.”
61 #
1 Wa 19.20. Mama mixe thüi: “Nwotmix, ku nang füito azuiüi, ikoxle owangole ku hom to chatlaxle kakonu füi wünzua kax akax toxhüi ang.”
62Jisu-e chix ang thüi: “Khünake hanbai ang sütfüima füichi to aküile hukya mix Zang Wangting hanpakma mwot münthap”.
Currently Selected:
LUK 9: WANCBSI
Highlight
Share
Copy
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
