LAIPAO 6

1Ifüima Jowanpae Mosa ang thüi: “Athaxpi kue wanghom to chemle moküihex nange ija ngüntu nguipu. Ku khünaknu danle apao angkya kue chix atsangüi. Otsingtomtata ma ija haxtok angkya hwom paoünle tom angkya kue chix atsangüi.”

Zange Mosa Nyak

2 # Pon 17.1; 28.3; 35.11; Lai 3.13-15. Jowanpae Mosa füi akaxle thüi: “Ku a Jowanpa changle. 3Abraham, Isak hia Jakop hwom hato, ku tuita Khüthak Zang changpule ngaile ahopu, ikoxle kue Jowanpa ku otsao mün hwom ang awan ang chitom. 4Kue hwom füi tsaotsüt zingle, ami hwom mixnok wünpa ningle ngole hüikya Kanan haxtok hwom ang koxüihex-ole tsaosaxpu. 5Athaxpi kue Israel khünaknu, Ijip noke da mwot amokle sikangünkya zoshune wotkya zing kue atatdaoa ilaxle kue ku Tsaotsüt texle atakpu. 6Ija daile Israel khünaknu ang, kue hwom ang thüile le thüikox, ‘Ku a Jowanpa changpu. Hünzom Ijip nok da ang achangle ngokya chak tokya kue danüi. Kue tüle tsak-zong füikya ku chak makhange hwom hato khomtsikya sikngün apüiüi ilaxle kue hünzom khosünüi. 7Kue hünzom ku khünaknu ang achangüi ilaxle ku a hünzom Zang ang ngoüi. Chemtue kue hünzom Ijip nok da ang ngokya chak tokya danle changüihex, ipongma hünzome ku a Jowanpa hünzom Zang changpule awan ang kopüi. 8Abraham, Isak hia Jakop hwom ang koxüihex-ole tsaokya haxtok to kue hünzom apüiüi; ilaxle kue ijakha ma haxtok ang lax ang hünzom chak to koxüi. Ku a Jowanpa changle.’” 9Mosa-e ibibi zangwün Israel nok hama ngai, ikoxlechu chix kax to hwome ojao chiapa, chemthüikoxle atsangle da mwot mok angkya tomkya makhange hwom ang khangkho sam. 10Ifüima Jowanpae Mosa ang thüi: 11“Ijip nok wanghompa hato paolaxle, chixe chix chaxwan angkya Israel khünaknu danle apao angkya wüi changle, le akaxkox.” 12Ikoxle Mosa-e lan: “Israel khünaknue ngaxchu ku kax to na müntha, wanghompa-e ning chem apa angkya? Ku a zangwün chimankya mix tuita namchang.” 13Jowanpae Mosa hia Arun nyi ang thüi: “Israel khünaknu tamchu wanghompa hama, hünzom a kue Ijip nok haxtok angkya Israel khünakbu alaile pao angkya lompa ang kamdaoale thüikox.”

Mosa hia Arun Nyi Homkha Mowün

14Reuben, Jakop sasün tüichongpa ang sasün hwom ali tüikya: Hanok, Pallu, Hezron, ilaxle Karmi hwom bibi. Ibu a hwom mün laxle tüikya homjen hwom putong changkya. 15Simeon ang sasün hwom azok tüikya: Jemuel, Jamin, Ohad, Jakin, Zohar, üntoxle Kanancha sasün Shaul hwom bibi. Ibu a hwom mün laxle tüikya homjen hwom putongbu changkya. 16#Huak 3.17-20; 26.57,58; 1 Pp 6.16-19.Liwi ang sasün hwom azom tüikya: Gershon, Kohath, ilaxle Merari; ibu a hwom mün laxle tüikya homjen hwom putong changkya. Liwi a zanglao 137 tsünlo-khothole ngo. 17Gershon ang sasün anyi tüikya: Libni hia Shimei nyi, ilaxle hwom ang sixlibu huanuma tüikya. 18Kohath ang sasün hwom ali tüikya: Amram, Izhar, Hebron, üntoxle Uzziel. Kohath a 133 zanglao tsünlo-khothole ngo. 19Merari ang sasün anyi tüikya: Mahli hia Mushi nyi. Ibu a Liwi hia hwom sixlibu putong changle.

20Amram-e hopa nanao füi tuiju-nasomle chang. She-e Amram ang Arun hia Mosa nyi puxle kox. Amram a 137 zanglao tsünlo-khothole ngo. 21Izhar ang sasün azom tüikya: Korah, Nefeg, üntoxle Zikri hwom bibi. 22Uzziel ang chuwüi sasün azom tüikya: Mishael, Elzafan, üntoxle Sithri hwom bibi.

23Arun-e Elishebah lax. She a Nahshon nanao Aminadab sasün changkya. She-e chix ang Nadap, Abihu, Eliazar hia Ethamar hwom bibi puxle kox. 24Korah ang sasün azom tüikya: Assir, Elkanah, üntoxle Abiasaf hwom bibi. Hwom a Korah makhange hüikya ma saxthomthom putong hwom changkya. 25Arun sasün Eliazar-e Putiel sacha lax. She-e chix ang Finehas puxle kox. Ibibi a Liwi saxthom hia homjenbu konu tüichong homkha changkya. 26Jowanpae Ijip nok tokya Israel khünaknu alaile pao ang akaxkya mixsün anyi a Arun hia Mosa nyi changkya. 27Okhi a Ijip nok wanghompa hato nguilaxle Israel khünakbu dan angkya kax koxkya nyi changkya.

Mosa hia Arun Nyi ang Jowanpa Kaxtom#6.27: kaxtom: Tsiakle tox ang chimüikya Zang tokhange hüikya kaxhua.

28Chemtue Ijip nok to Jowanpae Mosa füi zangwünle changpuix, 29ijama chixe thüi: “Ku a Jowanpa changle. Nang füi kue akax daokyabu pangwüi nange chix hama wünle laxkox.” 30Ikoxlechu Mosa-e lan: “Ku a tsaidong-kaxdongkya mix münchangle nange awan ngopu. Wanghompa-e ku kax to chemle apaüi?”

Currently Selected:

LAIPAO 6: WANCBSI

Highlight

Copy