LAIPAO 5

Ijip Nok Wanghompa Tuntho ma Mosa hia Arun Nyi

1Ifüima Mosa hia Arun nyi Ijip nok wanghompa hato nguilaxle thüi: “Jowanpa, Israel nok Zang-e ‘Hwome faokhato ku shwomle tö kox angkya hanpakma ku khünakbu pao ang laxkox’ le thüitüia.” 2Wanghompa-e atüi: “Jowanpa a owa? Kue büthüikoxle chix kax ma lax üntoxle Israel khünakbu danle apao angkya? Kue Jowanpa mün müntsing; ilaxle kue Israel khünaknu pao ang müntom.” Ile wanghompa ang mongtsak. 3Mosa hia Arun nyie lan: “Ibri nok Jowanpae chix lailai to kukhi hato ngaile ahodaoa. Jowanpa, chix kwom Khüthak Zang ang tö kox angkya hanpakma faokhato nyix azom lom to pao ang danhüi. Ile kwom chika thüiningle chixe kwom okak-olak chichangba chax-zan to max ang tomüi.” 4Wanghompa-e Mosa hia Arun nyi füi akax: “Khünakbue hwom mwot chimokle dantox angkya hünzome chem zang wünpu? Da ibu chatle mwot to süt ang tomkox! 5Hünzom khünak a kwom Ijip nok füi ngaxchu süluile tsale hüiüna. Ikoxle athax a hünzome mwot mokkya zakse texpuix nyi?” 6Ija nyix-nyix wüi wanghompa-e Ijip nok da humixbu hia Israel nok mwottsan tüichongbu ang kaxtom koxle thüi: 7“Haxhuak-long zing angkya hanpakma khünakbu ang tsaxsa koxkya athaxpi taxkox. Hwom lailai to paolaxle ma hanpak ang ibu mae alüile lomle naxlaxkox. 8Ikoxlechu haxhuak-long a, ami chemtukux zingle hüikya hex, ikha angkya tuita chu chithaile otyatya wüi zingle alai angkya atsangle amok angkya changle. Hwome mwot-e okho-münngui changa, ikhoma hwom Zang ang tö kox angkya hanpakma pao ang danhüile ku hato tsaiju-kaxju ang nguile ngole. 9Ibu khünakbu ang süchongkya mwot laxkox üntoxle hwom dangle ngo ang taxtom, ikoxle tix kaxthai zangwün to nathale apa ngo angkya chakba müntüiüi.” 10Dahu mixbu hia Israel nok mwottsan tüichongbu nguilaxle Israel khünakbu ang thüi: “Wanghompa-e akaxdaoa, athaxpi hünzom ang tsaxsa iwüi koxüi lüta. 11Hünzome ma hanpakma mae lomle atakle lax angkya changle lüta. Ile chang koxlechu haxhuak-long a amipongma chemtukuxle zingle hüipuix, ibukux zing angkya wüi lüta.” 12Ikhoma khünaknu a tsaxsa lom ang Ijip nok chaxwan faole aham. 13Hwom hato tsaxsa apüile koxpongma chemtukux zingle tsuak puix itukuxle haxhuak-long zing angkya hanpakma da humixbue hwom atsang ang süt. 14Ijip nok da humixbue Israel nok okho-lobu to fit, chemthüikoxle ibu a mwot akhi lax-ole kamkyabu changpu. Hwome atsang: “Hünzom khünakbue amipongkya ningle haxhuak-long büthüikoxle chizing thopu?” 15Ifüima okho-lobu wanghom hato nguilaxle khualople thüi: “Wanghompa, nange kwom to ija chem hwonpu? 16Kwom ang tsaxsa a chifa ikoxle haxhuak-long a otya ma wüi zing angkya le atsang tüi! Athax kwom to tüle fitdaoa ikoxle ija bama hünlit nange laxkoxle müiüi.” 17Ijama wanghompa-e lan: “Hünzom a müimamale zaxkakle ilaxle mwot mokse müntsu. Ikhoma hünzome hünzom Zang ang tö kox ang pao ang hünzom danhüile jupu. 18Athax chatlax ilaxle mwot to sütkox! Hünzom ang athax tsaxsa münfaüi, ikoxlechu hünzome haxhuak-long a amipongma zingle hüikya tukuxle zing angkya wüi changle.” 19Haxhuak-long amipongma zingkya tukuxkux wüi zing angkya changle le wanghompa-e akax pongma, hwom a zothup hato ahüipule awanle lax. 20Hwom chatüi füi ibue Mosa hia Arun nyi apong. Okhi a hwom tanle hungokya. 21Hwome Mosa hia Arun nyi ang thüi: “Jowanpae hünzom to hulaxle kaxfün naxfa! Hünzome kwom Farao hia chix wangshembu füi wonma ang tomdaoa ilaxle kwom lang angkya changlo hwom chak to atwonle koxdaoa.”

Mosa-e Jowanpa to Kaxthup-ngaotün#5.21: kaxthup-ngaotün: Ile büthüikoxle chang angkya le atwonkya kax.

22Ifüima Mosa-e Jowanpa chito hulaxle thüi: “Jowanpa, nange büthüikoxle nang khünakbu to chisumüile hwonpu? Nange ku ikhato chem hanpak ang tsanle ahüikyadai? 23Wanghom hato ku ang zangwün kaxho ang nguikya füi shemle hwome ibu chisumüile hwonle, ikoxle khose ang nange chemngaxchu chimok!”

Currently Selected:

LAIPAO 5: WANCBSI

Highlight

Copy