LAIPAO 14
14
Tütsak Tinu Tale Lekya
1Ifüima Jowanpae Mosa ang thüi: 2“Israel khünakbu füi, tamchatlaxle Pi Hahiroth tunthoma, Migdol hia Tütsak-tinu nyi zo ma, Bal Zefon zui ma pom zaile athong angkya akaxkox. 3Israel khünakbu a faolom to samle aham ngolaxle sak-hax alop-hax khakha ma tüiangpu, le wanghompa mongto ajangle laxüi. 4Kue chix ang mongtsak ang tomüi ilaxle chixe hünzom to achuaüi, ilaxle kue wanghompa hia chix süpahibu to anaole changkya zuma ku achuaküi. Ijama Ijip nokbue ku a Jowanpa changpule awan ang kopüi.” Israel khünaknue hwom füi akaxkya ningle mok.
5Chemtue Ijip nok wanghompa hama Israel khünaknu paole azangkya kax koxpuix, chix tamchu chix wangshembue hwom mong alüix ilaxle thüi: “Keme chem hwonpu? Keme Israel khünakbu paole azang ang tomlaxle kemepi kem dabu asamdaoa!” 6Wanghompa-e chix zankat man-kanlin#14.6: man-kanlin: Mane linkya zyen. hia chix süpahibu achwon. 7Chixe zünlaxle man-kanlin 600 ilaxle Ijip nok man-kanlin pangwüi, ibu zop angkya khünakbu laxlaxle pao. 8Jowanpae Ijip nok wanghompa Farao mong tsak ang tom, ilaxle sungdün-ngadong#14.8: sungdün-ngadong; chichangba Jowanpa ziakop mong ma. Israel khünakbu achuale zik. 9Ijip nok süpahibu man füi, man-kanlin#14.9: man-kanlin: Mane linkya zyen. hia ibu zopmixbu füi, Israel khünaknu achuale zikkya, ibue Tütsak-tinu kax ma Bal Zefon zui angkya Pi Hahiroth ma pomzaile athong ngoponge alop.
10Ijip nok wanghompa hia chix süpahibue hwom achuale hüingokya chemtue Israel khünaknue ngünle laxpuix, hwom tüle za ilaxle hwom khosün angkya hanpakma Jowanpa nyakle akhong. 11Hwome Mosa ang thüi: “Ijip nok to kwom ang zukting müntüi dai hia? Nange kwom ija sak-hax to azik ang alaile paokya hia? Hulax, nange kwom Ijip nok chak tokya alaile paolaxle chem hwonkya hex? 12Kwome nang füi: kwom mo taxwün-ngo, kwompi ikhato Ijip nok da ang wüi ngoüihexle münthüidaimi? Ija sak-hax to zikya füi ikhato da ang ngonuikya wüi kwom zongto müikya ang changse!”
13Mosa-e lan: “Hünzom ojao taxza! Hünzom mongchongle ajonglax ilaxle hünzom khosün ang Jowanpae chemle mokpuix ngün ang kopüi. Hünzome Ijip nok ibu tamchatle ngün ang kopüi münchang. 14Hünzom hanpakma Jowanpa, chix azan lax angpu. Hünzome mok angkya oli chemchu müntüi.”
15 Jowanpae Mosa ang thüi: “Nange fonghüile chemthüikoxle akhongpu? Khünaknu ang zakle chingole achex angkya kax laxkox. 16Nang kiathox dingchi to ahakox ilaxle nang chak tinu ding to thüikox. Tinu anyi ang ahanüi ilaxle Israel khünaknu a haxzan to tinu mong akaile le ang thoüi. 17Kue Ijip nok mong tsakle chang ang tomüi ilaxle hwome ibu mantole azuiüi. Wanghompa hia chix süpahibu, chix man-kanlin hia ibu zopkya khünakbu, ibu pangnu to anaokya tokhange kue achuak-achenkya kopüi. 18Chemtue kue hwom to lütüihex, Ijip noke ku a Jowanpa changle le awan ang kopüi.”
19 Jowanpa kaxtaimix, owa Israel süpahibu tunthoma tüikya hex, ikha angkya achexle hwom tokfüi chito chat. 20Thong lailaikya zangfwom chuwüi Israel nok hia Ijip nok nyi tantiwa ma atsyenle machang machangle füichi to chat. Ija zangfwome tukle Ijip nok hato zangnak ang tom, ikoxle Israel#14.20: Changkoxlaxle Aokya Laitong ma Ija zangfwome…wünzung kox; Ibri ma müntsao. hato wünzung kox. Ikhoma süpahibu wünta tungle tata füi asao ang chikop.
21Mosa-e tinu ding to chix chak thüi. Ifüima Jowanpae handünchi winjep ang tinu jeple achat ang tom. Ija winjepe wüntungtale tüle zongle jep ilaxle tinu mongto haxkozan alai, ile tinu anyi ang achangle ahan. 22#1 Ko 10.1,2; Ibr 11.29.Israel khünakbu tinu atatle ija haxkozan makhange le. Hwom tale lepongma tinu a pangnyi chima katuk lailaile tüikya. 23Ijip nokbu chuwüi hwom achuale, man-kanlin hia ibu zopmixbu füi tinu mongto ju. 24Anopningle swomsa ma Jowanpae thong lailaikya zangfwom hia wün makhange hwom to hu. Ija a abütle Ijip nok süpahibu ang chabüt-lasün ang tom. 25Chixe hwom man-kanlin ochabu man ang tom. Ile hwom a sikngün ashukle mik max ang tom. Ijip noke thüi: “Jowanpa a Israel nok chikao ma selaxle kem füi azankya changa. Kem ikha angkya paohax!”
26 Jowanpae Mosa ang thüi: “Tinu ding to nang chak thüikox. Nange chak thuikya füi tomle Ijip nok hia hwom man-kanlin#14.26: man-kanlin: Mane linkya zyen. zopmixbu hato ti chatüi.” 27Ikhoma Mosa-e tinu ding to chix chak thüi: ilaxle zangngai füi tomle tinu amipongkya ningle tuita ang achangle ajit. Ikha angkya manbu tinu chak tokya paole azang ang azong ikoxlechu Jowanpae hwom a tinu khato wüi tswonle awüt. 28Tinu tamchatle apongle jenkyae man-kanlinbu tamchu ibu zopmixbu hia Ijip nok süpahibu, tinu mongto Israel nok achuale zikkya pangnusa to tie ule hüikyae hwom tuita ngaxchu azang ang chikop. 29Ikoxlechu Israel khünakbu a tinu tale haxzan to ahamle le. Hwom ta pongma tinu a pangnyi chima katuk lailaile tüikya.
30Ija nyix Jowanpae Israel khünakbu Ijip nok chak tokya azün. Ofüima Israel khünakbue ibu mang tinukax to ngünle lax. 31Chemtue Jowanpae Ijip nok to lüt ang chix tsak-zong chongkya ahokya Israel noke ngünle laxpuix, hwom a Jowanpa thuaza. Hwome Jowanpa hia chix dapa Mosa hokhi to mongong.
Currently Selected:
LAIPAO 14: WANCBSI
Highlight
Share
Copy
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
