LAIPAO 13

Pongwang ma Puxkyakya Atsaokya

1 Jowanpae Mosa ang thüi: 2#Huak 3.13; Luk 2.23.“Owang ma puxkya olala ku mün ma atsaohüi, chemthüikoxle owang ma puxkya, Israel khünak wüi changlax, müi wüi changlax, olala a ku tsyen changle.”

Twonkhax Chiawonkya Anthut Pangpwon

3Mosa-e khünaknu ang thüi: “Anyixkya hanpak texle ataklax. Ija nyix kha, Ijip nok to da angkya danle toxlaxle hünzom laile paopu. Ija a Jowanpae chongkya chixtsak-chixzong makhange hünzom alaile paokya din changle. Ija nyix twonkhax awonkya an owaechu chisax angkya changle. 4Ija nyix kha, pongwang angkya lyetnu owang nyix kha, Ahit lyet ma hünzome Ijip danle toxpu. 5Kanan nok, Hit nok, Amon nok, Hip nok, üntoxle Jebu nok, ibu ngokya haxtok hünzom ang koxüihex-ole Jowanpae hünzom pupa hwom füi tsaosax daokya changle. Chemtue chixe hünzom, ija tüinangkya hia haxzao füikya haxtok to apüile changüihex, hünzome zangpua to owang angkya lyetnu ma ija pangpwon nui angkya changpu. 6Nyix anüt hünzome twonkhax chiawonkya an saxüi, ilaxle anüt nyix kha Jowanpa achuakle Kaitox Pangpwon fongkhale püntuxüi. 7Nyix anüt mong ma hünzome twonkhax füi zingkya an ojao chisaxüi, ilaxle itukma twonkhax hia ju ang achangdaokya an hünzom haxtok ma chithomüi. 8Pangpwon owang wangkya zuma, Ijip nok angkya hünzom alaile pao angkya hanpakma Jowanpae tüle ohünotün mwotbu mokle changdaokya khoma, ija chialak angkya hanpakma ija pangpwon nuipule hünzome masu-masa hwom hama apua angkya changle. 9Ija pangpwon a tuita mongto texle atak ang tom angkya hanpakma changle; ija a oli tuita nang chak ma chichangba nang khangpong ma khale thomkya münwan ningle changpu. Imakhange nang ang ija mo wün angkya tamchu Jowanpa Wanlom tole chang angkya mongto texle atak ang tomüi; chemthüikoxle Jowanpae hünzom a Ijip nok tokya chongkya chix tsak-zong füi alaile paokya changpu. 10Idaile hanpak tyale thomkya nyix zangfo to ija pangpwon nuilax.

Owangma Puxkya

11“Jowanpae hünzom Kanan haxtok to apüiüi; ija a hünzom ang tamchu hünzom sixlibu ang koxüihex-ole tsaole thomkya chaxwan changpu. 12#Lai 34.19,20; Luk 2.23.Chemtue ija haxtok chixe hünzom ang koxüihex, hünzome pongwang ma puxkya olala Jowanpa ang kox angkya changle. Hünzom tsom-pom pongwang ma puxkyakya komle Jowanpa kux changle. 13Ile changdaobachu nange chix ma chatle shakle lax ang tsuak. Pongwang ma puxkya mantsak hosabu pangwüi chun hosa füi alüix ang tsuak. Nange ija mantsak hosa chatle shakle laxse chitsuba, ija ang ongom apakkox. Hünzome pongwang ma puxkya sasün shakle lax angkya changle. 14Athax füichi ma hünzom naosombue ija olom twonkya a chem hanpakhex le atüikya zuma, hünzome hwom kax to lan angkya changle, ‘Jowanpae chongkya chix tsak-zong makhange Ijip chaxwan tokya kem laile pao ang tomkya changpu. Ikhato kem a dan ang ngole tüikya. 15Chemtue Ijip nok wanghompa ang mongtsak üntoxle kem laile pao ang chitomle changpuix, Jowanpae hwom chaxwan angkya pongwang ma puxkya olala komle lang; ijama khünak-o müi-ole wom. Ikhoma kwome owang ma puxkya olala Jowanpa ang tö koxpu, ikoxlechu pongwang ma puxkya sasün hwom a shakle tuipu. 16Ija pangpwon a tuita hünzom chak ma langle chichangba khangpong ma sünle kopkya ningle münwan ang changpu. Ijae kem ang, chix tsak-zong chongkya makhange Jowanpae Ijip nok tokya kem alaile paokya texle atak ang tomüi.’”

Thong ningkya Zangfwom hia Wün

17Chemtue Ijip nok wanghompa-e Israel nok pao ang danpuix, ija amoxkya lom chang koxlechu tinukax Filistia chito khange lekya lomnu tole hwom le angkya Jowanpae chitom. Zang-e thüi: “Chemtue hwome azan angkya ziama apongle changüihex, izuma Ijip nok towüi chat-sele khünaknu ang mong jangalop thüiningle münmüi angkya changle.” 18Idaile chixe sak-hax akaile anguile le angkya tütsak-tinu#13.18: tütsak-tinu: Ibri kax ma ija a “Acha tüikya Tinu” mikngün zongma ija a (1) Suiz hia Mediterenian tinu shinthuk nyi zo ma tüikya shinthuk jinu obiobi tüikya hia tütsakbu tüikya, Huake 13 ma wünle tüikya wankam, (2) Suiz angkya tinu shinthuk ziasyen, tamchu (3) Agaba angkya tinu shinthuk ziasyen, ija changle. chito lomlo to alyet. Israel khünakbu a azan ang akhyep-adi laxle tüikya.

19 # Pon 50.25; Jih 24.32. Jusep zatua Mosa-e chix füi tomle kop, chemthüikoxle chix mang hwom chaxwan towüi chat angkya bama Jusep-e khünaknu füi kaxshing kople “Chemtue hünzom Zang-e khosünle changüihex, ipongma hünzome ikhatokya ku zatua laxlaxle tox angkya wüi changle”, le akax toxkya tüikoxle ile mok.

20Israel khünakbue Sukkoth angkya achexle sak-hax alop-haxkhakha ma Itham ma pom zaile athong. 21Anyix ningle a thong lailaikya zangfwom ma amua laxle Jowanpae hwom ang lom awanle koxle hwom thothoma aham. Awünningle chix a thong lailaikya wün ma amua laxle hwom to nyanle thothoma le, ile hwom a zangnak zangngaile tomwüi aham ang tho. 22Anyixningle a thong lailaikya zangfwom ilaxle awünningle a thong lailaikya wün ojao chipaole khünaknu khangkho ma hwom thothoma ahamle tüikya.

Currently Selected:

LAIPAO 13: WANCBSI

Highlight

Copy