ROM 11
11
Israel kheak Thrünpuh Mihmüthsüm
1 #
Fil 3.5
Dale tüsho inü keokhichoh: Thrünpuhnü api mihtsürü bahyukdü de? Jude yung! I she Israelrü, Abraham tsühsoniuso, Benjamin trük kheyukrü ah. 2Apinü mükheahjunga lakhi api mihtsürü Thrünpuhnü mübahyuk, Elijanü Israel azhihde Thrünpuh ki mushukhi dünkheak amüsühyunü athakhi nüsanü mümükheah de? 3“Atungpuh, arünü nü yo wukihrübo laksahdo, arünü nü kingaün sadambo thsümünimdo, I lang aninga lah, tüsho arünü I rhangdung yimchoh.” 4Tüshe Thrünpuhnü api ki alokhi tümü a? “Inü I thsungkheak Baal ki mukhukningrü mihtsürü 7000 zodo.” 5Jumonü kheakü kim ching she amüthsüm hode mokhitkhi aningkhi lah. 6Tüshe ju amüthsüm hode a sho, kheaküa rhimo hode müla; jude yungsho amüthsüm ju atsütsü amüthsüm yungde alabah.
7Dale tüsho tümü a? Israelnü ayimkhi müngüdebahdo. Amokhitrünü ju ngü, tüshe aningkhi a mulong müküpabah, 8ha thrüta lah, “Thrünpuhnü arü lümkhi tüsho mulong zhazhaabahshih; khihni khiungde arünü müngükhuk yungsho muso.”
9Tüsho Davidnü thachoh,
“Arü dükhüm ju qimürip tüsho azheang,
arü angakpung tüsho thsümüchipü kamshang;
10Arünü müngükhukpü thsüde arü mükbo tukshang,
tüsho lünnü arü düthsün hünshang.”
11Jumonü inü keokhichoh, arü angakpü jingmükhedü de? Jude yung! Tüshe Israel mükthsüshihpü thsüde arünü alakmihkhi hode khiungkerü kilim akhümkhit arü. 12Kheakü arünü alakmihkhi alomi thsungkheak lakhitbo kamsho tüsho arü mukukzamkhi khiungkerü lakhitbo kamsho, arü alala kheyuksho küdükhüh alü laba!
Khiungkerü Akhümkhit
13Kheakü inü nüsa khiungkerü ki thachoh. I khiungkerü kilim amüsüh-thsangyurü thsü khiungdüa inü I tankihkhi müretahshihbah. 14Junangde inü I mihtsürü Jihudarü mükthsüde akamshihbah, tüsho arü khürü khümkhitbah. 15Arü bahyukkhi ju alomi tsüarihkhi a sho, arü leangkhikhi ju a ashe chingnü rhangdung laba shi? 16Akhuhbe yikhap khülang Thrünpuh kilim jihsho, anungkhi abümnü api yo ah; tüsho sangdung yingbo Thrünpuh kilim jihsho, akhahbo she api yo ah.
17Akhimkhi oliv-dung khürü akhah yihshak, tüsho ju ching mütüm oliv-dung khah müchin. Nüsa khiungkerü ju mütüm oliv-dung kiphahlah, tüsho kheakü nüsanü Jihudarü rhangdung me düküngkhi ching shihcham luchoh. 18Jumonü sangkhahbo nangde ayihshakrü nüsanü mükhemükim düthsü. Nüsanü lülüshishisho, nüsanü aying muduhlo tüshe ayingnü nüsa duhlolah de lümkhitang. 19Nüsanü athabah, “Ju ching I müchinkihpü thsüde sangkhahbo zhak.” 20Ju thiyuro. Arünü mükinmonü arübo yihshak, tüshe nüsanü akin hode düküngde zhip. Jumonü dükükheang, tüshe trede zhipang. 21Thrünpuhnü sangkhah tsütsü maningshihkhülaa, apinü nüsa aningshihbah de nüsanü lümcho de? 22Jumonü Thrünpuh mihmuzho tüsho amüküpkhi mütsanang: angaka larü kilim müküplah tüsho nüsanü api amuzho ching mutuklode lasho nüsa kilim mihmuzho lah; jude yungsho nüsa she lipkhia bahbah. 23Tüsho Jihudarünü arü mükinkhi bahyuksho amüchinkihlobah, tümüde Thrünpuhnü ju rhimopü kuklah. 24Nüsa ju mütüm oliv-dung kheaknü lipkhibah ashih mayeye she akhimkhi olivdung kheak müchinsho, ju sangkhahbo oliv-dung kheak müchinpü küdükhüh athülihbe laba!
Alala kheak Thrünpuh Mihmüthsüm
25I keoniorübo, nüsa küdahnü shia mulushihpü thsüde rama lakhi thiyuro nüsanü mükheahshihnelah. Israel mihtsürü mulong müküpkhi lün thsungkheak yung, tüshe khiungkerü khekhi alala Thrünpuh ki arükhi khiungdü lang ah. 26Junangde Israel alala khümkhitbah. Amüsühyunü thachoh,
“Zion chingnü abekhitrü arübah,
apinü Jakob chingnü amükinrü alala yankhitbah”;
27“tüsho küyimki inü arü neakbo lude atsobanü ha inü arü ki tangzüngkhi labah.”
28Tümütüsho arünü thiyusheak atsü bahyukkhinü nüsa khiungkerü dünlimnü Jihudarü ju Thrünpuh riribo. Tüshe Thrünpuhnü amokhitkhi, arü jipürübo dünlimnü api müyamrübo ah. 29Tümüde Thrünpuh thsambahbo tüsho ajikhibo mululokhukbe ah. 30Khülangki nüsanü Thrünpuh ki mihyumanide lado tüshe kheakü arünü mihyumanikhi hode nüsanü mihmüthsüm leangkhido, 31arünü mihyumanide la, junangde nüsa ki mihmüthsüm huhkhi hode arü she mihmüthsüm leangkhipü lakheah. 32Tümüde Thrünpuhnü mihyumanipü mihtsürü alala ram, junangde api mihmüthsüm alala kheak labah.
Thrünpuh Shiang
33Thrünpuh lakhitbo küdükhüh ato a! Api lümlung tüsho mükheahmudu küdükhüh sükla? Shepünü api limrobo anikhitkhukba? 34Amüsühyunü thachoh,
“Shepünü Atungpuh lümkhi mükheahkhea,
yungsho shepü api athsunganahrü lakhea?”
35“Yungsho anihbuh ngülopü thsüde shepünü api kilim thsambah jihkhea?”
36 #
1 Kor 8.6
Tümüde lüpdükhi api kilimnü, api hode tüsho api kilim lah. Lünnü api müretahshang. Amen.
Currently Selected:
ROM 11: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
