ROM 12

Thrünpuh Tankihkhi ching Rhangdung

1Jumonü keoniorübo, Thrünpuh mihmüthsüm hode inü nüsa ki tuthsukchoh: Api tankihkhi ching tsangkhitde tüsho api asühshihde Thrünpuh kilim nüsa rhangdung kingaün jihang. Ha nüsanü ajihpü lakhi thiyuro kingaün ah. 2Ha lomi yakli yande düla tüshe nüsa lümkhi aso kamde thsüphuloang, junangde nüsanü Thrünpuh lümkhi tümü atsü a, aleangkhikhukbe a tüsho khiukdahkhi lanü amütsanbah.

3Tümütüsho I kilim jih-a lakhi amüthsüm hode inü nüsa aban ki thachoh: Nü thülünkhi kheaknü nü küdahnü khide changde dülüm, tüshe Thrünpuhnü nü kilim jihkhi akin ayannü athülün atsüngalimnü lümang. 4#1 Kor 12.12Pang khülang ching isa achamnak hihde lah, tüsho achamnak alala rhimo rukhüh yung, 5junangde isa ahihdo thsüa lalashe Khrista ching khülang ah, tüsho khülangnü khülang kheak chingkihlah. 6#1 Kor 12.4-11Amüthsüm yande isa kilim jihkhi thsambah büthsüthsü ju isanü rhimoanü: müchitpü a sho akin ayannü; 7tankihpü a sho, isanü tankihpü ching; shepünü thsangyuchonü api thsangyupü ching; 8shepünü tuthsukchonü, apinü atuthsukkhi ching; shepünü rungzürungdochonü, salakhi ching; shepünü limbechonü, jinjihde; shepünü mihmüthsüm huhchonü, asühsahdo rhimoang.

9Amuzho ju thiyuro lashang; tümü amütsüanü thraneanang, tümü atsüanü düngde ramrihang; 10keoniorü amuzhonü khülangnü khülang muzhoachihang; khülangnü khülang wüntre jihang. 11Küyimkishe mükünmuthsung düthsü, Me ching düküngde Atungpuh tankihang. 12Nüsa mulonglam ching asühachihang, thsümütsü ching arümang, mutukzhakde tamkhüntamnüang. 13Amüsührü yihnüpü lakhi arung jihang, hanrü akamang.

14 # Mt 5.44; Lk 6.28 Nü thsümüchirü müngühjang; müngühjang tüsho arü dümuthrumünean. 15Asühachihrü lung asühachihang, atriprü lung tripang. 16Khülangnü khülang ki arihakokhi ching laang; dükükheang, tüshe abobe kuhi mihtsürü lung arihpü mulongang. Nü küdahnü lümlung larü ah de dülüm. 17She ki she amütsü dün amütsü düjihlo, tüshe alala miki tümü atsüanü lümang. 18Kuksho, nünü alala ki mungtsü laang. 19I müyamrübo, küyimkishe nüsanü rodüyim, tüshe Thrünpuh bukakhiukkhi aleangang; tümüde ha thrüta lah, “Royimpü ju I yo, inü ajihlobah, Atungpuhnü thachoh.” 20Ju müthri, “Nü riri khümsho, api yimkipang; api kethürisho, ke duhang; tümüde jude athsükhinü nünü api ku kheak mokhih lamlam thsukkihjihbah.” 21Amütsünü dükukshih, tüshe atsünü amütsü kukshang.

Currently Selected:

ROM 12: YIMCBSI

Highlight

Copy