MATHI 7

Mührü Yukhapkhi

(Lk 6.37-38,41-42)

1“Mührü yudükhap, junangde nüsa yumükhap. 2#Mk 4.24Tümütüsho nüsanü mührü yukhapkhi yande nüsa yukhapbah, tüsho nüsanü akeara ahorikhi yande nüsa akearabah. 3Tüsho tümü thsükhi nü mük ching lakhi aneak mükheahde nü keoniorü mük ching lakhi aneak kheahcho? 4Yungsho nü mük ching aneak zobah inü nü mük ching lakhi aneak bahjihanü de nü keoniorü ki nünü küde athakhukba? 5Yiuhkhaprübo! Akhuhde nü mük ching lakhi aneak yihkhita bahang, tüsho jushu nü keoniorü mük ching lakhi aneak mütsande angübah.

6“Tümü amüsühanü khihnubo kilim düjih; yungsho nü yo sünsobo kheaknu miki düzojih, jude thsüsho arünü jurü arü jing khüp jungbah tüsho rholobah nü adütre kamde ayihthünakbah.

Kheangang, Yimang tüsho Damang

(Lk 11.9-13)

7“Kheangang, tüsho ju nüsa kilim jihbah; yimang, tüsho nüsanü angübah; damang, tüsho nüsa kilim khimshuhjihbah. 8Tümüde akheangrü abannü leangkhichoh, ayimrünü ngüchoh, tüsho adamrü kilim khimshuhjihchoh. 9Yungsho tsührünü yikhap kheangsho api kilim lung khülang jihpü nüsa bolung shepü mihtsürü la? 10Yungsho apinü thüngüh kheangsho api kilim phuruto jihba shi? 11Jumonü nüsa mütsüde zobah nüsa tsührübo kilim thsambahbo atsü jihpü mükheahlasho, yinmi ching nüsa Abuhnü api ki kheangrü kilim küdükhüh she atsübo müjihpü! 12#Lk 6.31Jumonü tümüpürü mihtsürübonü nü ki rhimoshihnelanü, arü ki she rhimoang, tümüde ha yakzan tüsho wukihrübonü thsangyukhibo lah.

Chipimurung Amütsümbe

(Lk 13.24)

13“Chipimurung amütsümbe chingnü yüzahang; tümüde chipimurung aküngküng tüsho amülih ju adükheakbe lim bekhi lah tüsho ju chingnü ayüzahrü hihlah. 14Tümütüsho rhangdung lim bekhi ju chipimurung amütsüm tüsho limro chaklah, tüsho ju ngürü nüklah.

Sangdung tüsho Ju Sangaso

(Lk 6.43-44)

15“Arükchih wukihrübo dünkheak kümkangang; arünü namfimihnu küp yihbah nüsa kilim arüchoh tüshe alung ching a arübo ju amütsü rimrebo ah. 16Arü sangaso hode nüsanü arü mükheahbah. Mihtsürübonü ayangrungbo kheaknü kurungasobo yungsho dütrüngyang kheaknü khubaso rhocho de? 17Junangde, sangdung atsü aban chingnü aso atsü asochoh, tüshe amütsü sangdungnü sangaso amütsü asochoh. 18Sangdung atsünü sangaso amütsü asopü mukuk, yungsho sangdung amütsünü sangaso atsü asopü mukuk. 19#Mt 3.10; Lk 3.9Sangaso amütsü asokhi sangdung aban kiushakbah mo ching jipyukchoh. 20#Mt 12.33Jumonü arü sangasobo hode nüsanü arü mükheahbah.

Inü Nüsa Küyimkishe Mümükheah

(Lk 13.25-27)

21“Yinmi ching labuh I Buh lümkhi rhimorü kheak hode I ki, ‘Atungpuh, Atungpuh,’ de ajirü abannü yinmi kiulongthsü ching müyüzah. 22Ju nimung ahihkhühnü I ki thabah, ‘Atungpuh, Atungpuh, isanü nü mung chingnü mümüchit de, nü mung chingnü amünean mebo müyankhit de, tüsho nü mung chingnü khinthiyinbebo ahihdo mürhimo de?’ 23Judüki inü arü ki khipkhitbah, ‘Inü nüsa küyimkishe mükheah-a müla; I kinü tsoang, nüsa amütsü rhimorübo!’

Thüyam Thsürü Mahne

(Lk 6.47-49)

24“Jumonü sherünü I yu harü sobah anide rhimochonü lung kheak api yam thsükhi nangde lah. 25Tsüng arü, ayungbo düchi arü, apungbo yün, tüsho ju yam kheak nim; tütüshe ju mükeam, tümütüsho ju khimtan lung kheak lakheah. 26Tüshe sherünü I yu harü sobah anide mürhimonü loyi kheak api yam thsükhi makha mihtsürü nangde lah. 27Tsüng arü, ayungbo düchi arü, apungbo yün tüsho ju yam kheak nim tüsho ju keamabah; ju lungkhi atrebe lakheah.”

Jisu Thiyukhüm-sühmüh

28 # Mk 1.22; Lk 4.32 Küyimki Jisunü harü yubo thakhamkhea, apinü thsangyukhi ching yimto atonü müyinsah, 29tümütüsho apinü arü yakzan thsangyurübo ruk yungde thiyukhüm-sühmüh larü khülang nangde arü ki thsangyu.

Currently Selected:

MATHI 7: YIMCBSI

Highlight

Copy