MATHI 6

Jihchungkhi dünkheak Thsangyukhi

1 # Mt 23.5 “Mihtsürübonü angüshihpü arü miki nüsanü thiyuro-lungki mürhimopü kümkangang. Nüsanü rhimosho, yinmi ching nüsa Abuh kilimnü nüsa thsambah müngü.

2Jumonü nüsanü müthsümülarü ki jihchungchoki, mihtsürübonü wüntre jihshihpü yiuhkhaprübonü sinagogbo tüsho kiudunglimrobo ching rhimokhi nangde hulipung-pungbo dükhung. Inü nüsa ki thiyuro thachoh, arü thsambah ngüabahdo. 3Tüshe nünü müthsümülarü ki jihchungchoki, nü khah tsülimnü arhimokhi nü khah huzulimnü dümükheahshih, 4junangde nünü jihchungkhi ju amümürang thsüde alabah. Judüki nünü ramde arhimokhi ngübuh nü Buhnü nü kilim thsambah jihbah.

Tamkhüntamnü dünkheak Thsangyukhi

(Lk 11.2-4)

5 # Lk 18.10-14 “Küyimki nüsanü tamkhüntamnübanü yiuhkhaprübo nangde düthsü, tümüde arünü mihtsürübonü angüshihpü sinagogbo ching le kiudunglimrobo kheak zhipbah tamkhüntamnüpü mürühchoh. Inü nüsa ki thiyuro thachoh, arü thsambah ngüabahdo. 6Tüshe küyimki nüsanü tamkhüntamnübanü nü yo khiungshak ching yüzahbah khimdopü rihang, tüsho amüngübuh nüsa Abuh ki tamkhüntamnüang. Judüki ramde arhimokhi ngübuh nüsa Abuhnü nüsa thsambah jihbah.

7“Tüsho küyimki nüsanü tamkhüntamnübanü, amükinrübo nangde akeangkeang yubo thalode dütha, tümüde arü yubo hihkhinü arü ki sojihbah de arünü lümchoh. 8Arü nangde düla, tümüde nüsanü api ki mükheangyide nüsa yihnüpü lakhi nüsa Abuhnü mükheahlah. 9Jumonü nüsanü hanangde tamkhüntamnüang:

Yinmi ching labuh isa Abuh, nü mung amüsüh thsang.

10Nü kiulongthsü arang, yinmi ching künangde la,

alomi ching junangde nü lümkhi thsang.

11Khihni isa kilim nimung aban tsühyungpü kü;

12isanü isa mahputungrü neak bahjihkhi nangde,

isa mah she bahjang;

13tüsho rükaki ching isa dübeshih,

tüshe amütsübe chingnü isa bekhitang.

Tümütüsho nü kiulongthsü,

wu tüsho müretah lünnü lah. Amen.

14 # Mk 11.25,26 “Tümüde nüsanü mihtsürübo neak bahjihsho, yinmi ching nüsa Abuhnü nüsa neak bahjihbah. 15Tüshe nüsanü mihtsürübo neak mübahjihsho, nüsa Abuhnü she nüsa neak mübahjih.

Khümkeak dünkheak Thsangyukhi

16“Küyimki nünü khümkeak thsübanü, yiuhkhaprübo nangde jak mitinga dühuh tümüde arünü mihtsürübo ki arü khümkeak thsükhi huhpü arü mirobo müneanchoh. Inü nüsa ki thiyuro thachoh, arü thsambah ngüabahdo. 17Tüshe küyimki nü khümkeak thsübanü, nü ku kheak müdangke yihkihang tüsho nü miro damang, 18junangde nü khümkeak thsükhi mihtsürübo ki yung, tüshe amüngükhi nü Buh ki lang amükheahshihbah; tüsho ramde arhimokhi ngübuh nü Buhnü nü thsambah jihbah.

Yinmi ching Lakhit

(Lk 12.33-34)

19 # Ja 5.2,3 “Ari le thrungnü atsühpung tüsho ahührünü chakashungde yüzahbah ahühpü lakhi alomi kheak nüsa lakhitbo dühanmukhung; 20tüshe ari le thrungnü tsühamübah yungsho ahührünü chakashungde yüzahbah mahühpü lakhi yinmi ching nüsa lakhitbo hanmukhungang. 21Tümütüsho küching nü lakhit labanü, ju ching nü mulong she alabah.

Pang ching Ayin

(Lk 11.34-36)

22“Mük ju pang yo tsün ah. Jumonü nü mük tsüde lasho, nü pang alala ayinnü mide alabah. 23Tüshe nü mük mütsüsho, nü pang alala amitingnü mide alabah. Jumonü nü kheak lakhi tsün ju amiting a sho, amiting ju küdükhüh ato laba!

Thrünpuh tüsho Lakhit

(Lk 16.13; 12.22-31)

24“Shenü she aputungrü mahne mütankihkhuk; tümüde apinü khülang athraneanbah tüsho püpü amuzhobah, yungsho apinü khülang ki thiyuro labah tüsho püpü ki mükhemükimbah. Nüsanü Thrünpuh tüsho lakhit chido mütankihkhuk.

25“Jumonü inü nüsa ki thachoh, nüsa tümü tsühba yungsho tümü yungba (yungsho nüsa pang kheak tümü phuyuba) de nüsa rhangdung thsungkheak mulong düsansan. Rhangdung ju tsühyungbe kheaknü adungtobe tüsho pang ju khimmih kheaknü adungtobe yung de? 26Thüning wuhnubo kheahang, arünü mümükhean yungsho müyimlu yungsho jakam ching mühanmukhungchoh; tütüshe yinmi ching nüsa Abuhnü arü akamchoh. Arü kheaknü nüsa alü adün lakhi yung de? 27Nüsa shepünü mulong rozhakkhinü anükhüh shangde#Yungsho zokihpü alapü kukla? 28Tüsho tümüde nüsanü khimmih thsungkheak mulong sansancho? Mütüm thrilung sangbünbo künangde tochonü kheahang. Arünü mürhimo yungsho müchiyim. 29Tüshe Solomonnü she api mungthu alala ching harü bolung khülang nangdü she muphuyu de inü nüsa ki thachoh. 30Khihni ha ching labah, shido mo ching jipyukbe mütüm sangrung Thrünpuhnü junangde phuyujihchosho, apinü nüsa alü thsüde müphuyujihba de, O nüsa akin anikhüh larübo? 31Jumonü mulong sansande dütha, ‘Isa tümü tsühba yungsho isa tümü phuyuba?’ 32Tümüde amükinrübonü harü alala dunglim müshamchoh, tüsho nüsa jurü yihnüpü lah de yinmi ching nüsa Abuhnü mükheahlah. 33Tüshe nünü akhuhde api kiulongthsü tüsho api thiyuro-lungki yimang, tüsho harü alala nü kilim jihbah. 34Jumonü shido thsungkheak mulong düsansan, tümüde shidonü shido thsungkheak mulong sansanbah. Nimung aban küpkhuk suhde lah.

Currently Selected:

MATHI 6: YIMCBSI

Highlight

Copy