MATHI 1

Jisu Khrista Jipürübo

(Lk 3.23-38)

1Abraham tsührü, David tsührü Jisu Khrista jipürübo yukhean: 2Abraham kheaknü Isak trükkhit, Isak kheaknü Jakob trükkhit, tüsho Jakob kheaknü Juda le api keoniorübo trükkhit. 3Juda kheaknü Tamar hode Perez tüsho Zera trükkhit, Perez kheaknü Hezron trükkhit, tüsho Hezron kheaknü Ram trükkhit. 4Ram kheaknü Amminadab trükkhit, Amminadab kheaknü Nashon trükkhit, tüsho Nashon kheaknü Salmon trükkhit. 5Salmon kheaknü Rahab hode Boaz trükkhit, Boaz kheaknü Ruth hode Obed trükkhit, Obed kheaknü Jesse trükkhit, 6tüsho Jesse kheaknü kiulongthsüpuh David trükkhit.

David kheaknü Uria niube hode Solomon trükkhit. 7Solomon kheaknü Rehoboam trükkhit, Rehoboam kheaknü Abija trükkhit, tüsho Abija kheaknü Asa trükkhit. 8Asa kheaknü Jehoshaphat trükkhit, Jehoshaphat kheaknü Joram trükkhit, tüsho Joram kheaknü Uzzia trükkhit. 9Uzzia kheaknü Jotham trükkhit, Jotham kheaknü Ahaz trükkhit, tüsho Ahaz kheaknü Hezekia trükkhit. 10Hezekia kheaknü Manase trükkhit, Manase kheaknü Amon trükkhit, tüsho Amon kheaknü Josia trükkhit. 11Arü Babilon ramtso ching lachoki Josia kheaknü Jekonia#Ju Jehoiakin; athürün 12 ching she ah. tüsho api keoniorübo trükkhit.

12Tüsho Babilon ramtso dunglim, Jekonia kheaknü Shealtiel trükkhit, tüsho Shealtiel kheaknü Zerubbabel trükkhit. 13Zerubbabel kheaknü Abiud trükkhit, Abiud kheaknü Eliakim trükkhit, tüsho Eliakim kheaknü Azor trükkhit. 14Azor kheaknü Zadok trükkhit, Zadok kheaknü Akim trükkhit, tüsho Akim kheaknü Eliud trükkhit. 15Eliud kheaknü Eleazar trükkhit, Eleazar kheaknü Matthan trükkhit tüsho Matthan kheaknü Jakob trükkhit. 16Tüsho Jakob kheaknü Jisu Khrista#Yungsho Messia.Greek-Khrist tüsho Ibri-Messia, ane chido amütsan: Mujude-mokhitkhi Khülang. zübejihkhi Mari yamkhünbuh Josep trükkhit. 17Junangde Abraham kheaknü David khiungde lün alalanü 14, David kheaknü Babilon ramtso khiungde lün 14, tüsho Babilon ramtso chingnü Khrista khiungde lün 14.

Jisu Khrista Zübekhi

(Lk 2.1-7)

18 # Lk 1.27 Jisu Khrista zübekhi hanangde alakheah: Abe Mari ju Josep ki rhangpü thiyu zoa lachoki, ane mülayide, Amüsüh Me hode alibe mübünkeangde kam. 19Josep ju thiyuro mihtsürü lakheah, jumonü boto ki Mari mungchih müngüshihpü aramlimnü thiyu bahloachihpü lüm. 20Tüshe api harü lümde alachoki, Atungpuh yunirü khülang milim ching api ki akhiukbah tha, “David tsührü Josep, nü niube thsüpü Mari lupü dütre, tümüde Amüsüh Me hode alibe mübünkeangde lah. 21#Lk 1.31Alibenü tsührü khülang zübebah, tüsho nünü api mung Jisu#Jisu ju Greek yu chingnü Jihusua jipü dün ah, amütsan Atungpuhnü khümkhitchoh. de ajibah, tümüde apinü anihbuh mihtsürü arü neakbo chingnü khümkhitbah.”

22Ha alala wukihrü hode Atungpuhnü athakhi dünjipü lakheah: 23Kheahang, atsangkhitkhi khülang mübünkeangde akambah tüsho tsührü khülang zübebah, tüsho arünü api mung Immanuel de ajibah, ju amütsan, “Thrünpuh isa lung lah.” 24Judüki Josepnü ayapkhi chingnü asürü tüsho Atungpuhnü api ki thiyukhüm jihkhi nangde aniube Mari lu. 25#Lk 2.21Tüshe alibenü tsührü müzübeyikia apinü anihbe mümükheahde alakheah. Tüsho apinü amung Jisu de ji.

Currently Selected:

MATHI 1: YIMCBSI

Highlight

Copy