MALAKI 1
1
1Müchityu khülang. Malaki hode Atungpuh yu Israel kilim arü.
Atungpuhnü Israel Muzhokhi
2Inü nü muzhodo, Atungpuhnü thachoh. Tüshe nünü thachoh, “ Küde thsah nünü isa muzhokhi?” Esau ju Jakob akhiung yung de? Atungpuhnü thachoh. Tütüshe inü Jakob muzhodo 3tüshe inü Esau thranean; inü api müzüngbo lomi ju azhik tüsho api yamrüplurüp ju shirungbo thsungkheak loshelo kamshih. 4Edomnü, “ Isa niukmüzüta lah tüshe isanü athsümünimkhi thsülobah” de thasho, Wuto Atungpuhnü thachoh: Arünü mihbukmuyuk lomi de müjiyi khiungde, Atungpuhnü lünnü abukakhiukkhi mihtsürü inü athokheambah. 5Nü mükbonü ha ngübah, tüsho nünü athabah, “ Israel aredungbo hobah she ato ju Atungpuh lah!”
Atungpuhnü Amükeamrübo Thürüh
6Tsührü khülangnü abuh, tüsho yamlarübonü arü putungrü wüntrechoh. Dale I abuh a sho, I ki wüntre jihkhi küching la? I aputungrü a sho, I akin jihkhi küching la? Wuto Atungpuhnü nüsa ki thachoh, O I mung mükhemürangkhi amükeamrübo. Nüsanü thachoh, “ Küde thsah isanü nü mung mükhemürangkhea?” 7Nüsanü amüneankhi tsühyungpü I kingaün sadam kheak zojih. Tüshe nüsanü thachoh, “ Küde thsah isanü ju müneanshihkhea?” Atungpuh dükhüm mükhemürangpü kuklah de lüm. 8Küyimki nüsanü amüktukkhi shiwüh laksah-a kingaünkhi ching jihbanü, ju amülim yung de? Tüsho küyimki nüsanü akikkhi yungsho tukthsükhi jihbanü, ju amülim yung de? Ju nü yo kovünor ki thsambah jih-a kheahang; apinü nü ki asühba de yungsho nü leangkhiba de? Wuto Atungpuhnü thachoh. 9Tüshe kheakü Thrünpuh amuzho mushuang, junangde apinü isa ki mihmuzho labah. Ha nüsa khahnü rhimoa lachoki, apinü nüsa ki muzhode aleangkhiba de? Wuto Atungpuhnü thachoh. 10O, nüsa khürünü arüngyam ripitbo rihkhülaa, junangde nüsanü akeangkeang ching I kingaün sadam kheak mo mütakkih! Inü nüsa kheak asühkhi müla, Wuto Atungpuhnü thachoh, tüsho inü nüsa khah chingnü kingaün müleangkhi. 11Tümüde ani akhiuknü ayüzah khiungde trükshih bolung I mung ato lah, tüsho dangpung aban ching I mung chingnü rhümthüneabe tüsho atsangkhit kingaün jihchoh; tümüde I mung ju trükshih bolung ato lah, Wuto Atungpuhnü thachoh. 12Tüshe nüsanü Atungpuh dükhüm müneana lah tüsho ha tsühyungbe mükhemükimkhi ah de thade nüsanü ju müneanjihchoh. 13Nüsanü thachoh, “Ha küdükhüh she akhikhi la,” tüsho nüsanü I ki nupung kokihchoh, Wuto Atungpuhnü thachoh. Nüsanü ahühkhi yungsho akikkhi yungsho tukthsükhi shiwüh kingaün hande arüchoh! Inü ju nüsa khah chingnü leangkhiba shi? Atungpuhnü thachoh. 14Shepü namfimihnu bolung pung la tüsho ju jihpü thiyuchihchimbah Atungpuh kilim lapha kihkhi laksah-a kingaünchonü, rük mütsükhi ju muthrumünean thsang; tümüde I ato kiulongthsürü ah, Wuto Atungpuhnü thachoh, tüsho trükshih bolung I mung wüntre jihchoh.
Currently Selected:
MALAKI 1: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
