LUK 13

Mulong Müthriang yungsho Ashebah

1Ju kim ching Pilatnü arünü laksah-a kingaünkhi lung thiyih düsahkhi Galileerü dünkheak Jisu ki tharü khürü lakheah. 2Jisunü alo, “Arü ha ruk thsümonü harü Galileerü ju Galileerü püpürü alala kheaknü aneakrü amütsübe lakheah de nüsanü lümcho shi? 3Inü nüsa ki thachoh, jude yung; tüshe nüsanü mulong mümüthrisho ju ruk nüsa alala dükheakbah. 4Yungsho Siloam ching rünchang arü 18 kheak keambah alaksahkhi, arübo ju Jirusalem ching larü püpürü mihtsürü alala kheaknü aneakrü amütsübe lakheah de nüsanü lümcho shi? 5Inü nüsa ki thachoh, ju yung; tüshe nüsanü mulong mümüthrisho, ju ruk nüsa alala dükheakbah.”

Masokhi Khubasodung Shihdanglimyu

6Apinü ha shihdanglimyu tha: “Mihtsürü khülangnü kurungasolu ching khubasodung khülang khima lakheah, tüsho apinü ju kheak sangaso yimde arübah müngü. 7Judüki apinü kurungasolu neakbuh ki tha, ‘Kheahang, kam mahsam inü ha khubasodung kheak sangaso kheahde arüdo tüshe müngü. Ju kiushakang; tümüde hanü alo kungabahshihchoh?’ 8Tüshe apinü anihbuh ki tha, ‘Atobuh, inü ju mükamde kiua alo thrümkihanü khihkam she ju lashang. 9Shikam hanü aso asosho tsülah. Tüshe jude yungsho, dunglim nünü akiushakpü kuklah.’ ”

Jisunü Amuni Aliberü Thsüngukhi

10Kheakü apinü Amuni sinagog khülang ching thsangyude alakheah. 11Tüsho ju ching aliberü khülang kam thürükheak tizheah menü jing kikshihkhi lakheah. Alibe ju kikabahbah masürükhukde alakheah. 12Tüshe küyimki Jisunü alibe ngükhea, apinü alibe ju api kilim jihbah tha, “Alibe, nü tukthsü chingnü nü zuzu kamdo.” 13Apinü anihbe kheak akhah nimkih tüsho judüchokinü alibe ju langakindo kam, tüsho Thrünpuh müretah. 14Tüshe sinagog yakzanshuhbuhnü bukakhiuk, tümütüsho Jisunü Amuni thsüngu; tüsho apinü boto ki tha, “Mihtsürübonü arhimopü nimung thuruk lah; jumonü arang tüsho jurü ching thsüngua lung, tüshe Amuni yung.” 15Judüki Atungpuhnü api ki alo tüsho tha, “Nüsa yiuhkhaprübo! Nüsa mihbüm abannü Amuni moshipung yungsho donki ayam chingnü trünkhia kemüyihjihpü bede müyücho de? 16Dale tüsho ha Abraham tsührübe, shepü arimrinü kam thürükheak tizheah rhüka zokheanü Amuni zuzu mükamshihbea de?” 17Küyimki apinü harü thakhea, api azhihrü alala achih ngüabah; tüsho apinü müretah rhimokhi alala dünkheaknü boto alalanü asühachih.

Woninji Shihdanglimyu

(Mt 13.31-32; Mk 4.30-32)

18Judüki apinü tha, “Thrünpuh kiulongthsü tümü kiphahla? Tüsho inü tümü kheak akeba? 19Haju mihtsürü khülangnü woninji lubah api wündo ching yukkhi kiphahlah; ha tochoh tüsho sangdung ato kamchoh, tüsho thüning wuhnubonü ju khahbo ching arü sapbo shuchoh.”

Phaüm Shihdanglimyu

(Mt 13.33)

20Kheaküshe apinü tha, “Thrünpuh kiulongthsü ju inü tümü kheak akeba? 21Haju aliberü khülangnü phaüm lubah aümdungkhi 3 adünkhi ching düsah-a mülamyi khiungde azokhi kiphahlah.”

Chipimurung Amütsümbe

(Mt 7.13-14,21-23)

22Tüsho apinü kiutobo le kiulongbo ching thsangyude Jirusalem lim yü. 23Judüki khülangnü api ki tha, “Atungpuh, akhümkhitrü nükla shi?” Tüsho apinü arü ki tha, 24“Chipimurung amütsümbe chingnü ayüzahpü mürangang, tümüde inü nüsa ki thachoh, ahihkhühnü ayüzahpü yimbah tüshe mukukde alabah. 25Küyimki thüyam putungrünü khülang ki asürübah khimdopü ju arihba, nüsanü wungdo zhipbah thrungde athabah, ‘Atungpuh, Atungpuh, isa thsungkheak khimshuhjang,’ tüsho apinü nüsa ki thabah, ‘Nüsa küchingnüanü inü nüsa mümükheah,’ 26judüki nüsanü athapü tankihbah, ‘Isa nü miki tsühyungkheah, tüsho nünü kiudunglimrobo ching isa thsangyukheah.’ 27Tüshe apinü athabah, ‘Inü nüsa ki thachoh, nüsa küchingnüanü inü mümükheah. Nüsa amülim rhimorü alala I kinü tsoang.’ 28#Mt 22.13; 25.30#Mt 8.11,12Nüsanü Abraham, Isak tüsho Jakob tüsho wukihrübo alala Thrünpuh kiulongthsü ching ngübah nüsa jipkhita bahchoki, ju ching atripkhi tüsho hü mütrütkhi labah. 29Mihtsürübo aniakhiuklim le aniyüzahlim, dukulim le düjinglimnü arübah tüsho Thrünpuh kiulongthsü ching binbah. 30#Mt 19.30; 20.16; Mk 10.31Tüsho ju ching ashurü ju akhuhrü, tüsho akhuhrü ju ashurü kampü lah.”

Jisunü Jirusalem Muzhokhi

(Mt 23.37-39)

31Ju nimung Pharisirü khürü arübah api ki tha, “Akhiukang tüsho ha chingnü tsoang, tümüde Herodnü nü laksahpü künlah.”

32Tüsho apinü arü ki tha, “Yübah shirung ki thaang, ‘Kheahang, inü khihni le shido amünean mebo yankhitde athsüngube rhimopü lah, tüsho asam nipü I rhimo akhik thsübah.’ 33Tütüshe I khihni, shido tüsho zhihdo I limro ching tsahpü lah; tümüde wukihrü khülang ju Jirusalem ching yungde püpü ching laksahpü yak müla.

34“O Jirusalem, Jirusalem, wukihrübo laksahbe tüsho anihbe kilim yüshihrübo rusahbe! Thunu dretonü ajipjipbo aghidükeang khüp bemukhungkhi nangde inü küdükhüh ki nü tsührübo bemukhungpü künkhea, tüshe nünü mümulongde alakheah! 35Kheahang! Nü yam zhikrangkhündo lah; tüsho atsütsü inü nü ki thachoh, ‘Shepü Atungpuh mung ching arüchonü api müngühmühi’ de nünü müthayi kim khiungde nünü I müngü.”

Currently Selected:

LUK 13: YIMCBSI

Highlight

Copy