THRÜNTAN 20

Abraham tüsho Abimelek

1Kheakü Abraham ju chingnü hantsahde Negeb lomi lim yü, tüsho Kadesh le Shur dükeak la; tüsho Gerar ching lacholade alakheah. 2Abrahamnü aniube Sara dünkheak tha, “Alibe I niurü ah.” Tüsho Gerar kiulongthsüpuh Abimeleknü thiyia yüshihbah Sara bea lu. 3Tüshe azhing milim ching Thrünpuh Abimelek kilim arü, tüsho tha, “Nü ashebah, tümütüsho nünü ha liberü ludo; anihbe arhangkhi liberü ah.” 4Tüshe Abimeleknü alibe müthünin; tüsho apinü tha, “Atungpuh , nünü amülim mülakhi trükshih she adükheakshihba de? 5Apinü, ‘I niurü ah’ de athakhi yung de? Tüsho alibenü she aküdah thsüde tha, ‘Api I khiung ah.’ Ha inü I lümkhi müsühde tüsho I khah müsühde arhimokheah.” 6Thrünpuhnü milim ching api ki tha, “Am, nü lümkhi müsühde arhimokheah de inü amükheahmonü, I azhihde inü nü neak müyihbeakshih. Jumonü inü nünü alibe müqiushih. 7Kheakü jumonü mihtsürü niube jihloang; tümüde api wukihrü ah, tüsho apinü nü thsungkheak tamkhüntamnüjihbah tüsho nü alabah. Tüshe nünü anihbe müjihlosho, tsükjide nü le nü mihtsürü alala shebah de mükheahang.”

8Jumonü Abimeleknü yapsu mükikde asürübah api yamlarübo alala ji tüsho arünü sode harü alala tha; tüsho mihtsürübo khide tre. 9Abimeleknü Abraham ji tüsho api ki tha, “Nünü isa ki tümü rhimokhea? Inü nü ki tümü amülim rhimokhi nünü I tüsho I kiulongthsü kheak neak ato hande arükhea? Nünü I ki amürhimobe rhimodo.” 10Abimeleknü Abraham ki tha, “Amütsan tümü labah nünü ha rhimokhea?” 11Tüsho Abrahamnü alo, “Tümütüsho atsütsünü ha dangpung ching Thrünpuh trekhi müla, tüsho arünü I niube dünkheaknü I laksahbah de inü lüm. 12Tüshe atsütsü anihbe I niurü ah. Alibe I buh tsührü ah, tüshe I be tsührü yung; tüsho anihbe I niube kamkheah. 13Tüsho küyimki I buh yam chingnü I Thrünpuhnü I tsahkhitshihkhea, inü alibe ki tha, ‘Nünü ha I ki amuzho huhang: isa yükhi dangpung aban ching, “Api I khiung ah” de thaang.’” 14Judüki Abimeleknü namfimihnu, moshipungbo, tüsho athrürü le aliberü yamlarübo Abraham kilim jih; tüsho apinü aniube Sara anihbuh kilim jihlo. 15Tüsho Abimeleknü tha, “Kheahang, I lo nü müngüh lah; nünü akünkhi ching laang.” 16Jushu Sara ki apinü tha, “Kheahang, nü lung lakhi alala miki nü amülim müla de mütsanpü inü nü khiung kilim shotoyinchi 1000 jihchoh; nünü amülim tümü mürhimo de alalanü amükheahbah.” 17Abrahamnü Thrünpuh ki tamkhüntamnü, tüsho Thrünpuhnü Abimelek, aniube le azhorü liberübo thsüngu, junangde arübo tsührü lalokhuk, 18tümüde Atungpuhnü Abraham niube Sara dünkheaknü Abimelek yamkhün ching nuyam aban yihdojih-a lakheah.

Currently Selected:

THRÜNTAN 20: YIMCBSI

Highlight

Copy