THRÜNTAN 19

Sodom Neak

1Yunirü 2 arelim Sodom ching arü, tüsho Lot ju Sodom chipiripit ki zhipde alakheah. Küyimki Lotnü ane ngükheanü, apinü ane shorupü wusu, tüsho amiro alo lim kheahbah khukning. 2Tüsho apinü tha, “Kheakü aniang, O I tungrübo, muzhobah nüsa yamlarü yam ching arang tüsho azhing ching binkheambah nüsa jing müsühang; jushu nüsa mükikde asürang tüsho nüsa limro ching yüang.” Tüsho arünü tha, “Muh, isa azhing ching wungdophulung binbah.” 3Tüshe apinü reangkih; jumonü arünü api kilim rholo tüsho anihbuh yam ching yüzah. Jushu apinü arü khilim tsühyungpü mozümodojih, phaüm muyukkhi yikhap nung tüsho arünü tsüh. 4Arü ayappü müngüh Sodom kiuto amühit aban chingnü athunurü tüsho azorü mihtsürü alalanü thüyam zündo. 5Arünü Lot ki ji, “Khihre nü yam ching arükhi mihtsürübo kükheak la? Arübo isa kilim bede akhiukang, junangde isanü arü kheak müzammürambah.” 6Jumonü Lotnü ripit limronü arü kilim wukhiukbah adunglimnü khimdopü rih, 7tüsho tha, “I keoniorübo, muzhobah mihbukmuyukde dürhimo! 8Kheakü kheahang, athrürü mübetsühkhi I tsührübe mahne lah; inü ane nüsa kilim bede akhiukanü tüsho nüsanü ane kheak nüsa künkhi rhimoang; harü mihtsürü kheak tümü düthsü, tümütüsho arü I yamme khüp azahdo.” 9Tüsho arünü tha, “Isa limro chingnü akhinang.” Arünü tha, “Habuh tsotsahde arü, tüsho apinü mahkhaprü thsüchoh; kheakü isanü arü kheaknü api ki amütsübe rhimobah.” Jumonü arünü Lot kheak müküpde nimkih, tüsho khimdopü thsümünimpü thüninde arü. 10Tüshe mihtsürübonü arü khah chunga yüshih tüsho arü kilim Lot thoa lu, tüsho khimdopü rih. 11Tüsho arünü thüyam ripit limro kheak larü anini tüsho ato chido mük tukshihpünü shik, junangde arünü khimdopü müyimkhit.

Lotnü Sodom bahbah Atsokhi

12Judüki mihtsürübonü Lot ki tha, “Nü lung ha ching khürü la shi? Tsühmeakrü, nü tsührübo, nü tsührübebo, yungsho ha kiuto ching betsührü khürü lasho, arübo ha dangpung chingnü bekhitang! 13Tümüde isanü ha dangpung dükheakshihbah, tümütüsho arü azhihde azhikhi Atungpuh miki tode kamdo, tüsho Atungpuhnü ju dükheakshihpü ike arüshihkheah.” 14Jumonü Lotnü wukhiuk tüsho atsührübebo lurü api tsühmeakrübo ki tha, “Asürang, ha dangpung chingnü wukhiukang; tümüde Atungpuhnü ha kiuto dükheakshihbah!” Tüshe apinü keangrüchoh de atsühmeakbonü lüm.

15Küyimki ayinkhikheanü, yunirübonü Lot ki niokheampü tha, “Asürang, nü niube le nü tsührübe mahne ha ching lakhi bea lung, jude yungsho kiuto thsümüchikhi ching nüsa aniuabahbah.” 16Api nihnihde alachoki, mihtsürünenü api khah, aniube khah, tüsho atsührübe mahne khahbo kheak, Atungpuhnü api ki amüthsüm lade tholo, tüsho anenü api bekhit tüsho kiuto aleanglim zojih. 17Anenü arü bekhit akede, khülangnü api ki tha, “Nü rhangdung thsungkheak tsokhiang! Nü dunglim rholoa dükheah yungsho adükhün küching she dütuklo. Awungbo ching tsokhide yüang, jude yungsho nü dükheakbah.” 18Lotnü ane ki tha, “Muzhobah düh, I tungrübo! 19Kheakü nüsa yamlarü nüsa miki amuzho ngüdo, tüsho I rhangdung khümkhitkhi huhde nüsanü amüthsüm alü kamshihdo; inü awungbo ching tsokhide müyükhuk; ha thsümütsünü I yanphuhbah tüsho I ashebah. 20Kheahang, ha kiuto tsokhide ayüpü phünide lah tüsho ju aninikhüh ah; muzhobah I ju ching tsokhide yüanü (ju aninikhüh yung de?) tüsho I rhangdung labah.” 21Tüsho apinü anihbuh ki tha, “Khide tsülah, inü ha she amülüjihbah; nünü athakhi kiuto inü müdükheakshih. 22Niokheamang, ju ching tsokhide yüang. Tümüde nü ju mukhiungyikia inü tümü she müthsükhuk.” Jumonü kiuto ki ju Zoar de ajikheah.

Sodom tüsho Gomorra Dükheakkhi

23Lot Zoar khiungchoki alomi kheak ani akhiuka lakheah. 24Judüki Atungpuhnü molung tüsho mo thüning chingnü Sodom tüsho Gomorra kheak akishih. 25Hanangde apinü kiutobo, adükhün alala, kiuto ching larü alala, tüsho alo kheak mukhuhkhi yüngthrüm. 26Tüshe Lot niubenü dunglim rholoa kheah, tüsho alibe thimi dungto kamabah. 27Yapsu mükikde Abraham asürü tüsho Atungpuh miki zhipkhi dangpung api yülo. 28Apinü Sodom tüsho Gomorra adükhün lomi alala lim abina kheah, tüsho morimoto chingnü mokhüh akhiukkhi nangde alomi chingnü mokhüh alükde ayükihkhi ngü. 29Junangde küyimki Thrünpuhnü adükhün kiutobo alala thsümünimkheanü, apinü Abraham, tüsho kiutobo yüngthrümkhi chingnü abekhitkhi Lot lümkhit.

Lot Tsühsoniusobo

30Lot tüsho atsührübe mahne Zoar bahbah tso, tüsho awungbo ching la, tümüde apinü Zoar ching lapü tre. Api le atsührübe mahne lungkhün ching la. 31Nimung khülang atsührü adüjibenü akheambe ki tha, “Ike abuh shina lah, tüsho alomi alala ching yakli lakhi nangde ike kheak müyambah tsührü lapü thsüde athrürü she müla. 32Arang, ikenü ike abuh yukhu yungshihanü tüsho api ki yapanü, junangde api mung jimulopü tsührü labah.” 33Jumonü anenü ane abuh ju re yukhu duh. Tüsho adüjibenü yübah abuh lung yap, tüsho alibe küyimki yapkhea tüsho küyimki wusukheanü apinü mümükheah. 34Ashidopü adüjibenü akheambe ki tha, “Yishih I buh lung I yapkheah; ikenü khihre she api yukhu yungshihanü, tüsho nü yübah api lung yapang, junangde ikenü ike abuh mung jimulopü lashihbah.” 35Jumonü anenü ju re she ane abuh yukhu duh, tüsho akheambe yübah api lung yap, tüsho alibe küyimki yapkhea tüsho küyimki wusukheanü apinü mümükheah. 36Junangde Lot tsührübe ane chido ane abuh hode khungarü lakheah. 37Adüjibenü athrürü zübe tüsho api mung Moab de ji; khihni khiungde api ju Moabrü abuh ah. 38Akheambenü she athrürü zübe tüsho api mung Ben-ammi de ji; khihni khiungde api ju Amon mihtsürü abuh ah.

Currently Selected:

THRÜNTAN 19: YIMCBSI

Highlight

Copy