MARKA 8

Mipi Sang li A Vâkna

(Mat 15.32-39)

1Zia hun lai ah chun, mipi tam tak a hung khawm kit ua, nêk ding bangma a nei puau ah, a nungzuite a ko ah, a kiang un,

2“Mipite hi ka kiang ah tu’hin ni thum a um tau in, nêk ding bangma a neilo ziak un ka lungsiat ma ma hi.

3An ne lo in a In lam un sawl leng la lamkâl ah basam khan tiu in; a hungnau hi la gamla tak tak ahi ngal in,” a tia.

4A nungzuite chun, “Zia gamthip ah hin mi zia jat jat nêk ding vaithum khoi ah vala ding ka hiu em?” a tiu a.

5Ama chun, “Vaithum bang jat la nei awm?” ti’n a dong a. Amau chun, “Sagi,” a tiu a.

6Ziaphatchun, mipi chu leitual ah kichu dingin thu a pia; vaithum pasagi chu a la, kipak thu a gen ah, a phelsua ah, a nungzuite kiang in a hawm ding un a pia; amau chun mipite lak ah chun a hawm tau hi.

7Chuleh, sanga tawmcha le a nei un; ziate chule mal a jawl ah, a lak ua hawm dingin thu a pia kit a.

8A ne vâ chiat tau a; chuleh, a nêkbang themnên uh chu a hun luak khawm ua, bawm sagi a pha nalai hi.

9A ne zosia chu sang li ding vêl a hiu a. Ziazaw chun, amau chu a chiasak tai.

10Chuleh, ama chu a nungzuite tawh kuang in a chuang ngal un, Dalmanutha gam chu a zuan tau hi.

Tepte’na A Dotnau

(Mat 16.1-4)

11 # Mat 12.38; Luk 11.16 Pharisaite a hung un, ama ze-etna dingin van ah kipat tepte’na don in, a hung nial ua.

12 # Mat 12.39; Luk 11.29 Ama chu a lungthim gil tak ah nasa tak in a hung thûm ah, “Bangatia tu’lai khangthakte hin tepte’na hawl a hiu em? Titakzet in ka hil la hiu, Tu’lai khangthakte kiang ah hin tepte’na him him piak hipua’n a,” a tia.

13Tichun, amau chu nusia in, kuang ah chun a chuang ah, gâl langkhat lam in a chia tai.

Pharisaite leh Herod Thawi

(Mat 16.5-12)

14A nungzuite chun vaithum a keng hemil un, vaithum tangkhat beplo ngal chu kuang ah chun vaithum dang a nei ta puau a.

15 # Luk 12.1 Ama chun a kiang un, “Pharisaite thawi leh Herod thawi lak in kivêng unla, chingthei un,” a tia.

16Amau chun, “Vaithum I neilo ziak uh ahi,” a kitiu a.

17Jesu’n zia chu a la het phat in a kiang un, “Bangatia vaithum la neilo ziak ua lungkham la hiu em? Tu’tiang hinle hethei nai lo ah, hethiam nai lo la hiu maw? La lung uh tâksak ah um a hita em?

18 # Jer 5.21; Ezk 12.2; Mar 4.12 Mit nei ngal ah mu lo la hiu em? Bil nei ngal in he lo la hiu em? La hezing puau em?

19Sang nga lak ah vaithum panga ka phelsua lai khan, a vâl bawm bang jat la luak dim uh em? a tia. Amau chun, chûn, ‘Sawm leh ni,’ a tiu a.

20‘Ahileh, sang li lak ah vaithum pasagi ka phelsua lai khan, a vâl bawm bang jat la luak dim awm?’ a tia. Amau chun, ‘Sagi,’ a tiu a.

21Aleh, zia tiang ah chule hethei nai lo maw?” a tia.

Bethsaida ah Jesu’n Mitthûm A Hi’vakna

22Ziazaw chun, Bethsaida khua a hung tung tau a; zia tak ah chun mitthûm pakhat a kiang in a hun pui ua, a khoi dingin a hung don ua.

23Mitthûmpa chu a khut in a kaibât ah, khawpi pâm lam ah chun a puidok ah; a mit ah a chil a sek ah, a chung ah a khut a ngak zaw in, “Thil la muthei em?” ti’n a dong a.

24A hung dakdok ah, “Mihing ka mu hen, ahi’n la thing chia gual in ka mui,” a tia

25A khut in a mit chu a khoi piak kit ah, khua a etsak kit ah; a hung pha ta mai ah; thil zosia kichian tak in a hun muthei tai.

26Ziaphatchun, a In lam in a sawl ah, “Khaw sung lut kin la, kuamale hil kin,” a tia.

Peter in Jesu A Puandawna

(Mat 16.13-20; Luk 9.18-21)

27Ziazaw chun, Jesu chu a nungzuite tawh a pawtdok ua, Kaisaria Philippi bial ah khuate chun a chiau a, lampi’n a nungzuite chu a dong a: “Mite’n kua ahi ei tiu em?” a tia.

28 # Mar 6.14,15; Luk 9.7,8 Amau chun, “Khenkhat in, ‘Baptispa Johan ahi,’ a hun tiu in, khenkhat in, ‘Elijah ahi,’ a hun tiu in, midang khenkhatte chun, ‘Jawlneite lak ah pakhat ahi,’ a hun tiu hi,” a tiu a.

29 # Joh 6.68,69 Ama chun a kiang un, “Aleh, nang un kua ahi lei tiu em?” ti’n a dong a. Peter chun a dawnhu a, “Messiah chu la hi,” a tia.

30Ziaphatchun, a chanchin chu kuama hil lo dingin a khâm chak kei tai.

Jesu’n A thi ding leh A thawkit Ding A Genlawkna

(Mat 16.21-28; Luk 9.22-27)

31Ziaphatchun, “Mihing Chapa hin thil tam tak thuak intin, upate leh thiampu lalte leh, lekhazikte doi lo in um intin; himaleh, ni thum zaw leh tho kit ding ahi,” a tia.

32Zia thute chu kichian tak in a gen a. Peter in ama chu a pui chuam ah, a hilgai a.

33Himaleh, ama chu a kihei ah, a nungzuite chu a en ah, Peter chu a vau ah, “Setan, ka nung ah chia in, Pathian thilte ngaitua lo in, mihing thilte la ngaitua zaw ahi,” ti in.

34 # Mat 10.38; Luk 14.27 Tichun, mipite leh a nungzuite chu a ko khawm ah, a kiang un, “Kua’nle ka nung a zui nop chun, ama kihemil in, ama kros kiput in ei zui hen.

35 # Mat 10.39; Luk 17.33; Joh 12.25 Kuale a hinna humbit chun chân intin, kuale keima leh chanchinpha ziak ah a hinna chân chun humbit ngei in a.

36Min khawvel hi a pum in nei hen la, a hinna chân taleh, ama â dingin bang a phachuam diam?

37Min a hinna thasâng in bang a pia thei diam?

38Kuale tu’lai khangthak ângkawm leh gilo lak ah, keima leh ka thu japi tapo, Mihing chapa’n vansawlchâk thiangthote tawh, a Pa lopina kivan ah a hung phat leh, zia mi ngei chu hun japi thuk in a,” a tia.

Currently Selected:

MARKA 8: VAIPBSI

Highlight

Copy