Sòlòmön 4
4
Kikōnyö
1Yĕh meuk, hanāngen chu vai man, yĕh meuk, vai man! Pumpa nun minë mat meh nö ël kinṙul kūö meh. Sā töhĕng kiteūm pököre minë keūyö meh kahōya nö i paneūti i Kilīöt.
2Minë kanap meh sā tö hĕng kiteūm tö kamöpi kan sīṅp nup yamôklö nö ṙā-ang i vinôkö, ṙòkhöre nö tönët nòng kūön, ngaich öt hĕng nòng in u tö miṙīvlōn.
3Minë minuh meh sā laturë ta-īö, vāyö elvāng me-eṅ inrē. Minë arëkūö meh sā tö hĕng tāk anār kinṙul kūö meh.
4Sā chūök chamônga in Tāvit ngam likeun meh, vīlöng nö chūök vinī-iṅ aṅtī kumyung, in e, nö seūhaka köinyu lanaklö, ṙòkhöre anū-ö nö lanaklö kumyung.
5Minë teh meh sā tö nët nòng kūön, tö nët nòng kūön kāsöl, nup nyamā nö i nup lilī.
6Hanöng saha yanīhi sakāmö falngöre inrē nup nyat, falngöre chin min im rôngö mūr im rung lōpan inrē.
7Hanāngen chu, keuheūtlöre vanāyö man; öt chanôchu in meh.
8Tā-a in chu ṙā-ang Lepanön, pīhö chu; tā-a in chu ṙā-ang Lepanön. Kiröönngöre ṙā-ang kui Amanā, ṙā-ang kui Sēnir Harmòn inrē, ṙā-ang i nup kinlūhu lāyön, ṙā-ang minë rôngö lepöt.
9Kē-ĕ öp ellōn chu tö meh, kanānö chu, pīhö chu, ngaich man kēḵ ellōn chu öm höng hēngö yanöṅtö tö ngam hanūöt meh. 10Yöng pinchākö ngam hanāngen meh, kanānö chu, pīhö chu. Mötlö ngam hanāngen meh tö vāin, tinhūsö tavī-i meh inrē tö tötahūsa! 11Vī töpachāka nun minë minuh meh, pīhö chu; hönī aṅteh inrē elkatòh litāk meh; öp tinhūsö mat inyut meh sā tinhūsö Lepanön.
12Tö hachāpikūö panô-òṅ kanānö chu, pīhö chu, panô-òṅ tö hachāpikūö, löklö mak tö hapānikūö.
13Panô-òṅ anār nup tö meunylö in meh holtö tö atölka ṙòng chōn, hennā holtö nāt,
14Nāt, manūlö, kalimas uk chōn inrē tötahūsa, holtö nup chōn lōpān, mūr alō inrē, holtö nup yöngkūö tötahūsa 15Panô-òṅ töhëmlö mak, tö-ūlö mak tö-aṅ, töhëm kun mak inrē ṙā-ang lepanön.
Kikānö
16Aṅhen, Ō kuföt lā kapā, yih inrē, Ō kuföt lòhngö! Fööngö kui ngam panô-òṅ chu, hökngen öp tinhūsö e nö parāti nö heūingö. Hökngen öp hanāngen chu nö el panô-òṅre nö yih, nyā nup tö-atöllöng ṙòng chōn inrē.
Currently Selected:
Sòlòmön 4: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
