Sòlòmön 3

1El chamam tö hatööm chū-ö chöh ap hanāngenlōn re; chöhan chū-ö, öt kôtökūö pöri tö ò; havëken ò chū-ö, öt sapṙô

pöri anga-aṅ.

2Hòṅ chōholre chin ngaich öich kiröönngöre chuh elpanam, el talöökö el tölungāṅhaka inrē; hòṅ chöhan chin öp hanāngenlōn chu. Chöhan chū-ö, ötkôtökūö pöri tö ò.

3Kôtökūö tö chu yip amahati, i saha cha nö kiröön im elpanam, Meūkan öm me-eṅ öp hanāngenlōn chu?

4Öl chū-ö chööḵngen cha, hē chu kôtökūö tö ò öp hanāngenlōn chu. Haköpan chū-ö ngaich, öt halöngngen ò nö kiröönngöre hanöng saha chu kēten ò i patī öp yöng chu kikānö, el urôhò ò inrē öp kamyôḵnyen chu.

5Chūökuṙô chin in yīö, Ō yī-ö kikānö aṅ Yērusalem, i kāsĕl hēk hain nup el kahôyö, hòṅ meh öt halöinyköre öt rēhĕn ahëṅnö tī töp hanāngen hanöng saha kanahanglōn e.

Linūöyö Tinkökö

Kikānö

6Asuh ap umuh yamih löktö el tönyaṅlnyi, sā tinfūnlö lul, tumhuṅslöng tö mūr, lōpān inrē, sā tinhūsö töpaṙōnga tötahūsa mī-inyihkö chehen?

7Yĕh meuk, chūök tökeūnö Sòlòmön ap! I kaha e yip tö tafūöl anāi tökalēḵ tarik aṅ in yip tökalēḵ tarik Israĕl.

8Ṙòkhöre nö i ṙātre sanët töhuveū-en inrē nö i kinyūngö, kö i takeun re sanët, hanöng pinhë-eṅkūö tö hatööm.

9Vī chūökre öp rācha Sòlòmön nö keūnö tö chōn aṅ Lepanön.

10Vī rupīö anga-aṅ machööḵlö, uktö humlum, lingūṅ elmat öp anūchö; vāyö vinī-iṅ angū-ö nö lā-ël tö yip kikānö kūön Yērusalem.

11Kuṙòh Ō kikānö kūön Siyôn, ngëichkö öp rācha Sòlòmön nö sapīövu tö öp tö sumpīövlöng nö in ò töp kikānö yöng ò ik sakāmö inpīhö ò, ik sakāmö ṙanāmö ellōn ò.

Currently Selected:

Sòlòmön 3: CANIBSI

Highlight

Copy