RŌMA 8

Nômö In Ngam Ma-alaha

1Lökten yin töngamuh vē mi-in Kristū Yēsū nö rö-ö nö öt hakôlöngṙô. 2Pò ngam chöngö ngam Töhet Fanöinylö nômö in Kristū Yēsū, nö ṙānyen chu ṙā-ang im chöngö tökööl, kinpaha inrē. 3Pò ngam öt kanô-òṅ nö la-en ngam chöngö, nö kūö e nö öt kalēḵen lökngen ngam alaha, tīnhöti ngam Tēv tö ngam Kūönre nö sā inlahen tarik tö īnu tö tökööl ngaich öthakôlò ngam tökööl nö im alaha: 4Hòṅ ngam tö hachöngtu aṅ im chöngö nö hateūngi nö in hī, öi öt lamök im alaha, lamök im ma-alaha pöri. 5Pò cha vē lamök im alaha nö lōn tö nup aṅ im alaha: cha-a pöri yip lamök im ma-alaha nö lōn tö nup aṅ im ma-alaha. 6Pòn kinpaha kuilōn ngam alaha: nômö pöri kuilōn ngam ma-alaha, kumchikṙen inrē. 7Pò ngam kuilōn ngam alaha nö kumnyahṙen im Tēv; pò e nö öt elkatòh ngam chöngö ngam Tēv, kôḵngen angū-ö nö öt rēhĕn nö kô: 8Ngaich cha-a yip mi-im, alaha nö ötkô nö haṙāmlōn ngam Tēv.

9Rö-ö pöri yī-ö im alaha, tön im ma-alaha, yē ngam Töhet Fanöinylö nö iyöng in yīö. Yĕn tarīku pöri töt īnu tö ngam Töhet Fanöinylö Kristū, ngaich öt aṅ in Ò anga-aṅ. 10Ngaich yē Kristū nö in yīö, kapah ngam alaha kūö tökööl; ngam ma-alaha nômö pöri kūö lanöökö. 11Yē ngam Töhet Fanöinylö Ò pöri ngam mahachohlen Yēsū nö ṙā-ang i yip tö kapah nö iyöng in yīö ngaich anga-aṅ ngam mahachohlen Kristū Yēsū nö ṙā-ang yip tö kapah alaha yīö min nö, lökten im Töhet Fanöinylö ngam mi-iyöng in yīö.

12Kahōlö: tö höt ëhevö in, rö-ö nö im alaha, öi lök lōn ngam alaha. 13Pò yīö, yē yīö lök lōn ngam alaha, kapah takô min yī-ö; yē yīö pöri, lökten im Töhet Fanöinylö, fëlngö nup la-en ngam alaha, aṅ min yī-ö. 14I tumtak yip tö hachōḵo tö ngam Töhet Fanöinylö ngam Tēv, acha-a yip kūön ngam Tēv. 15Pò yīö öt kēḵ lōn ngam inkövö hēk, öi pa-ekūö; kēḵ ngam lōn kūön pöri yī-ö, löknyô yīö ngö ṙô, Appa, Kayöngö. 16Hol lōn hī an ngam Töhet Fanöinylö nö eū-a, tö hī kūön ngam Tēv; 17Ngaich yē hī kūön, ngaich tö amīnuvö: tö amīnuvö töm Tēv, hol Kristū tö amīnuvö, yē hī sā Ò kihngen, hòṅ hī inrē hapōilöngö hol Ò.

Ngam Kanòlò Tö Lā Unôich

18Öt kaheūktö në kanihngen chin töngamuh, nö hanṙongten min nö im kanôlò, ngam tö hameuktu min nö in hī. 19Pò në tö vīlöngö nö meūka takô, hökkö inmeuktö vē kūö ngam Tēv. 20Pò në tö vīlöngö nö öt teungten; öt kūö lōn u, tön kūö lōn Ò pöri ngam mahalēn. 21I mineūkkö ṙinānyö në tövīlöngö, nö ṙā-ang im inkövö öt kanôlò, nö im inkôlò ṙinānyö vē kūö ngam Tēv. 22Pò hī akahalōn tö në taṙòkhöre tövīlöngö nö ayôkö chanököre, söl ing töngamuh. 23Rö-ö nöng anū-ö; tön ayī-ö inrē öi tö īnu tö ranehlòng ngam Töhet Fanöinylö, ayī-ö inrē, ellōnre inyôṙö, hökkö inrūköre öi kūön Ò, ngam ṙinānyö në alaha hī. 24Pò hī hayöökaṙen lökten im mineūka; achīö ṙöng ap ṙung mameūkkö tömeūkö? 25Yē hī pöri meūkkö ngam töt meukö tö hī, ngaich ayī-ö holtö manöiyöre hökkö e.

26Ngatī inlahen an inrē ngam Töhet Fanöinylö nö holṙen öt kumlēḵ hī: pò hī öt akahalōn töp ṙôre ve-ekūötēv, sā hinôtö hī; ngaich pöri ngam Töhet Fanöinylö nö ve-elkui hī hol tö inlöinyöre, nup töt hankônyen nö ṙô. 27Ngaich ngam chamöh ellōn nö akahalōn tö kuilōn ngam Töhet Fanöinylö; pò Ò nö ve-elkui yip töhet nö asā lōn ngam Tēv. 28Akahalōn ayī-ö tö e nö in cha yip töhāngenlōn töm Tēv, holre nö ṙòkhöre nö vī tölöök, in cha inrē yip tö havëtu nö sā ap chööḵnyö Ò. 29Kūö cha Anga-aṅ nö urĕhten mikahlōn, ngaich urēhĕng tī nö halēnngen, nö hateungtu i insā-a ngam Kūön Ò, pòn hōtu Anga-aṅ nö lanòh yip tö maṙôngö holre: 30Yip mu-urĕhngö inlēnngen tö Ò, cha-a inrē tö havëtu tö Ò: yip tö havëtu tö ò, cha-a tö halööklöngö inrē tö Ò: yip tö halööklöngö, cha-a inrē tö hakôlöngṙô.

Hanāngenlōn Ngam Tēv Tö Kristū Yēsū

31Sitih ṙô öi pökeh min tö në? Chiāp lā-al hī yē ngam Tēv nö in hī? 32Anga-aṅ ngam töt ṙamā-al ngam Kūönre takô, kēḵngen Ò pöri nö pòkūö hī ṙòkhöre, röh ang min nö hol Ò nö öt maiṅtīre nö kē-ĕkūö hī tö taṙòkhöre? 33Achīö ap min mī-i vē katöllö ngam Tēv tī tö fālen? Ngam Tēv An mahalöökhölö. 34Achīö ang anga-aṅ min töt mahakôlò; Kristū Yēsū an ngam tö kapah; hôṅ ngam tö hachohlöngö nö ṙā-ang yip tö kapah, ngam lahāmö ngam Tēv, ngam vame-elkui hī inrē. 35Achīö min mahaköhngen hī tö ngam hanāngenlōn Kristū? Yöng kanihngen hòng, hēk miṙivlōn, hēk öt inkôlò, hēk inyāichö, hēk linchôyö, hēk kanihngen i pinlāḵngen, hēk sanët? 36Sā kinūichngö e nö ngö, Pòkūö meh in sumkāmu finëlngö; Kaheuktu in sā pököre tö ṙatnyu likeun. 37Hö-ö, mötlö in tö tömihôiṅ in u nö ṙòkhöre lökten in Ò ngam tö hāngen tö hī. 38Tön mikahtulōn chin tö e nö “ötrēhĕn ngam kinpaha, öt rēhĕn nômö, öt rēhĕn ma-ahanga, öt rēhĕn pūlngö, öt rēhĕn në töngamuh, öt rēhĕn nup yamih, öt rēhĕn minhôinyö.” 39Öt rēhĕn rò-òlòng, öt rēhĕn ṙū-uti, ötrēhĕn nup tahëng tö vīlöngö, nö kô min nö haköhngen hī tö ngam hanāngenlōn ngam Tēv, ngam in Kristū Yēsū ngam Mā hī.

Currently Selected:

RŌMA 8: CANIBSI

Highlight

Copy