INCHŌḴ-OṘÔ 31
31
Inlēnö Ök Rācha
1Në ṙô Lēmiĕl ök rācha aṅ Masā, në inköptö ò tök yöng ò kikānö:
2Asuh, kūön chu kikōnyö? Asuh, aṅ el kanūönö kūön chu kikōnyö? Asuh, kūön chu kikōnyö im töchūöku kinlēḵngô?
3Um kētö kumlēḵre i kikānö nup talöökö meh in cha yip fāmëlngö rācha.
4Hangihtöre me-eṅ Lemi-ĕl, öt nya-aṅkūö rācha an ngam, kin-eūtö vain hēk öt mī-i mahayöng ngam lōn tö tökalēḵ ka-eūt;
5Hòṅ cha nö öthöng ka-eūt vaichngö ngaich tö öp tö kētu chöngö, ngaich vaichngö tö nup hanakten yip tarik.
6Kum-eūtan tö tökalēḵ öp chamuh im nganaichngenre, vāin inrē in cha yip më-el tökiröng kanihngen;
7Hökngen cha nö ka-eūt hòn vaichngö tö öt kanôlòre, ngaich öt ōtre kanöpölōn tö kanihngen re.
8Vā-anykūöre man im töthuveū-euṙô, kahòklö kui yip tö-ōtre nö im öt kanôlò.
9Vā-anykūöre man, chīpen kahôka, ve-elkui yāich töhāṅten inrē.
Tö Kò-òre Nö Pīhö
10Chiāp tökô nö kôtökūö tö tö-akaha inpīhö? Mötlö ana tö töpōi yanöṅtö.
11In ò inyönglen ellōn öp pīhö ò, öt hanātuṙen min anga-aṅ inrē tö taneūngenre.
12Kôlò tī an tö ò, öt chökhuṙen inrē, i rô-òten ò nö aṅ.
13Chöh sanôi sīṅp ap flek inrē, hakôtö kuntī re inrē nö vī-i u.
14Sā nup chōng mī-inyihkö chehen an, ṙā-ang tömarôvat nö kumtö nyā-aṅkūö.
15Choholre an yĕn pòrô nö hatööm meukṙen nyā-aṅkūö yip aṅ patī re inrē la-en yip tarik ò inrē kikānö.
16Ngëichkö taṙeū an ngaich havaha e; aṅtī tö nup ṙòng eltī ò anga-aṅ nö teūich panô-òṅ vāin.
17Nyëkṙat re an pôn hòṅ kalēḵ vī këlre inrē nö ngëḵ.
18Meuk nup chehen inyihköre nö kôlò tī tö ò. Öt nyangngö kūö öp ëāṅvö ò tö el hatööm.
19Kētö tīre an nö im vanön yanòh, ṙapkö ngam kinpāt inrē minë kël ò.
20Hatahtö eltī re an nö i yāich, silôtö tī re nö i töhāṅten.
21Öt pa-ekūö an tö tacham tökënngöre in yip aṅ patī ò, pòn ṙòkhöre in yip aṅ patī ò nö hayūtö tö töngāṅvömat.
22Vī hīlā re anga-aṅ; tövai linen nup hilā ò töhuṙing tö-amëla mat inrē.
23Akaha öp pīhö ò nö i kūö inkūp, yē ò nö ūichhaka nö in yip mā aṅ ngam panam.
24Vī linen hilā anga-aṅ inyihken u inrē; kētö nyanëk ṙat anga-aṅ nö in yip mī-inyih.
25Hinlāṙö tö kumlēḵ anga-aṅ minā-aṅ inrē, hayīölkūö anga-aṅ i saha öp ṙētak nö öl nö yih.
26Ṙôtö mikah anga-aṅ nö vā-any kūöre, i rōi litāk ò inrē öp inköp tö neūkölōn.
27Milētṙen anga-aṅ nö meūk el talöökö yip aṅ patī re, öt nyā-aṅvkūö inrē tö nyā-aṅkūö ṙanāhata.
28Choholre yip kūön ò ngaich havëken ò nö tölöök, öp pīhö ò inrē, ha-öinyan inrē anga-aṅ:
29Maṙôngö yip kikānö tövāyen la-en, saṙaklöng pöri me-eṅ tö cha nö ṙòkhöre.
30Inchīl ngih vanāyö, tötöl inrē ngam lanöökö, töhòṅ eū-eu pöri ngòh kikānö töpa-ekūö töm Mā Tēv.
31Kē-ĕkūö ò tö nup ṙòng kuntī ò, hökngen nup la-en ò nö ha-öinyan nö i kūö inkūp.
Currently Selected:
INCHŌḴ-OṘÔ 31: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
