T. MĀKÖS 15

Kētu Yēsū Nö I Kūö Pailět

(Mt 27.1-2,11-14; Lk 23.1-5; Jn 18.28-38)

1Ngaich ka-euilökūö im peuheū yik mākūö kūönṙô, nö hol tö yik yöngṙen, yik kamūich inrē, ṙòkhöre yik kamhôṅka nö ve-ekūöre; ngaich nyëkö Yēsū; kēḵngen Ò ngaich, ngaich kēten Ò nö in Pailĕt. 2Ngaich hatönan Pailĕt, nö ngö ṙô, Rāchakūö Yahūti Öm Me-eṅ? Ngaich ngö ṙô Anga-aṅ nö sapṙô ò, Kô-ò ṙô man. 3Ngaich yik mākūö kūönṙô nö pōyen vahë-eny tö fālen Ò. 4Ngaich hēk Pailĕt nö hatönan, nö ngö ṙô Öt sahāpu Ömeh? Yĕh meuk, iṙôken ṙô aich nö ve-eny fālen Meh. 5Ngaich pöri Yēsū nöng öt ṙô-òv; ngaich pingangkūö ang Pailĕt.

Hōtu Kinpāhangvah Ang Yēsū

(Mt 27.15-26; Lk 23.13-25; Jn 18.39—19.16)

6Tö hĕng tak ṙahānyi Pailĕt tö tökē-ĕ, hē el paratīn, öp töng havëkö cha nö in ò. 7Ngaich hĕng tak ök umuh, Pārapas minënyi, tönyëki; nö hol yik tumṙōlkenre, yik famël tarik nö ik tinṙōlen. 8Ngaich yik tömaṙôngö nö yòhlö, kaknyöre ngaich nö ve-ekūö ò nö sā tīre i töṙung nö in cha. 9Ngaich ngö ṙô Pailĕt tö cha, Hōḵ öyih, töich ṙānyö ngòh Rāchakūö Yahūti nö in yīö. 10Pòn akahalōn anga-aṅ tö yik mākūö kūönṙô, nö kūö kumnyahelmatre, nö kēten Ò nö in ò. 11Ṙuhöl alaha yik tömaṙôngö pöri yik mākūö kūönṙô, nö hōten ò nö ṙānyen Pārapas nö in cha. 12Ngaich hēk Pailĕt nö ngö ṙô tö cha, Sitih tī öich pökeh, tö ngòh Rāchakūö Yahūti, tö ṙô yīö? 13Harāten Ò, ngö cha-a, nö hēk, 14Ngaich Pailĕt nö ngö ṙô tö cha, Kūöyòh? Asuh ap tötlöök fālen Ò? Ṙūönyôre pöri cha-a nö ngö ṙô, nö hūḵa, Harāten Ò. 15Ngaich Pailĕt nö ṙānyen Pārapas nö in cha, pò ò nö hòṅ hakô-ònglōn yik tömaṙôngö; ngaich kēten Yēsū nö harātu, tö kinheūṅtö tī ò nö fōhan.

Hayëngen Yēsū Yik Kumyung

(Mt 27.27-31; Jn 19.2-3)

16Ngaich yik kumyung nö hachōḵngen Ò nö latuhēt, el chūök mahayöng; ngaich havëtu yik kumyung tö hĕng kiteūm. 17Hayūtan cha-a ngaich tö töngāvö mat. Sāt sapīöv Ò inrē, tö töchökhukūö; ngaich sumpīövlö e cha-a, nö i kui Ò. 18Kētöre ngaich nö salāman, nö ngö ṙô, Salām, Rāchakūö Yahūti. 19Fohtö kui Ò cha-a ngaich, nö aṅtītö ök tafūyö, kösngö elmat Ò inrē, simtö kuikinmônöre, nö salāman. 20Keuheūthëṙen ngaich cha-a nö hayëḵngen Ò, ngaich luhngö ök töngāvömat inyut Ò, ngaich hayutlen Ò tö nuk inyut Ò. Hachōḵngen Ò cha-a ngaich, nö harātu.

Harātu Ang Yēsū

(Mt 27.32-44; Lk 23.26-43; Jn 19.17-27)

21Ngaich cha-a nö līpten ök tö hĕng tak chamööḵngöre nö in cha, nö keun ök töhakālö Ò, ang Sīmōn aṅ Kurēnī, ṙamā-ang tavat, yöng nāṅ Aleksantör, nāṅ Rūfös. 22Ngaich kēten Ò cha-a nö i Kòlkòta, (ngam töngö manah, chūök kui kupah). 23Ngaich kē-ĕkūö Ò cha-a tö vāin, tö katēhĕ tö mūr, öt hōḵo e pöri Anga-aṅ. 24Harāten Ò ngaich cha-a; ngaich katölöre tö nuk hilā Ò, kalah taneūngenre tö u, tö kahëḵ ngòh tö hĕng tak. 25Machūötöre köṅny ṙô angu-ö tö peuheū, hē cha nö harāten Ò. 26Ngaich kūichiyö nö i kui Ò, nuk vine-eny fālen Ò, nö ngö Ngam Rāchakūö Yahūti. 27Nët tak nak tötūmu hol Ò nö harātu, hĕng tak lahāmö, hĕng tak latavē inrē. 28Ngaich keuheūtiṙen ṙô ngam töhet līpöre, töngö, Ngaich kaheuktu Anga-aṅ nö i tötlöök. 29Ngaich yik chamööḵöng nö ötlēkôre tö Ò, kileung kuire nö ngö ṙô, Ā, Me-eṅ tumṙōlngö ngam töhet chūök ngaich vi-il e Öm höng lūöi sumkam; 30Hayöökenre Man yēḵ; yônti, ṙā-ang rōi ngam töhakālö. 31Ngaich inrē yik mākūö kūönṙô nö hayëḵngen Ò, nö in re, tö yik kamūich; nö ngö ṙô, Hayööken tahëng An; öt kô Anga-aṅ nö hayöökenre! 32Hökngen Kristū, ngam Rāchakūö Israĕl, nö yônti töngamuh, nö ṙā-ang rōi ngam töhakālö; hòṅ hī meuk, ṙātö ellōnre inrē. Sumrōngngökūö Ò inrē nak töharātu nö hol Ò.

Kapah Ang Yēsū

(Mt 27.45-56; Lk 23.44-49; Jn 19.28-30)

33Hē ngam tö nët sīön köṅny ṙô, söl im tö lūöi köṅny ṙô ök sinngūlö nö keuheūtngöre chūök nö ip panam. 34Ngaich im tö lūöi köṅny ṙô Yēsū nö pōitô, nö ngö ṙô, Ēli, Ēli, lāma sapaktānī; ngam tö ngö manah, Tēv Chu, Tēv Chu, kūöyòh Öm ṙāngen Chu? 35Rēvre yik mi-i yik töng sökhaka, tö ngö ṙô, hē cha nö hāngö e, Yĕh meuk, havëken Ēlaicha An. 36Ngaich hĕng tak ök famaltöre, ngaich kasumtö ök ṙòng ihong nö ik töhikīölhu vāin; ngaich lòktö e nö i kūö ök tafūyö; ngaich kē-ĕkūö Ò nö ôkö e, nö ngö ṙô, Ngösin, töi ngëcha yē Ēliaicha min nö yih, nö kēten Ò. 37Ngaich Yēsū nö pōitô, ngaich kēngö nômöre. 38Ngaich ök tananglö ël ök töhet chūök nö nët tit nö takaich, löktökūö lātulöng, söl lātaṙeūḵ. 39Ngaich hē ök yöngṙen kumyung nö meūkan nö ngatī kinpaha, ök töng samökhak nö ranghen Ò; ngaich ngö ṙô anga-an, Kô Ön ngòh tarik nö Kūön ngam Tēv. 40Kikānö yik umuh inrē, töng marôvat nö meuk; in cha hēḵ Mariā aṅ Mektelā, Mariā ök yöng Yāköp tökūöṅnö, yöng Yôsĕs inrē, hēḵ Salōmī. 41Yik tamömrit Ò, hē Ò nö i Kelelī, meukṙen Ò inrē; maṙôngö yik tahëng kikānö, hamòlröön Ò nö yih nö i Yerūsalem.

Inulngö Yēsū

(Mt 27.57-61; Lk 23.50-56; Jn 19.38-42)

42Hē e nö ngaich nö harap, pò e nö inlēnken nö sakāmö, urēhĕkūö ngam töhet sakāmö; 43Hĕng taka ök yamihtöre, ang Yôsĕf aṅ Arimataya, kamhôṅka ök nö tökôlò, mameūkkö ngam pūlngö ngam Tēv inrē, chuh in Pailĕt anga-aṅ, nöng öt pa-ekūö; ngaich havëkö ök alaha Yēsū. 44Uṙeh alaha ang Pailĕt tö Ò nö ngaich nö kapah; ngaich havëtö ök yöngṙen kumyung, hatönan ngaich, yē Ò nö rĕh rô-angen nö kapah. 45Ngaich hē ò nö akahalōn tö e, kūö ṙô ök yöngṙen kumyung; kētö ök alaha anga-aṅ ngaich, nö in Yôsĕf. 46Ngaich anga-aṅ nö havah hilā; kēten Ò ngaich, ngaich haṙūngan nö el hilā; ṙāten Ò ngaich nö el anūlö, ök töhulhötvö nö el ihong. Pilëôngtö ihong anga-aṅ nö i kūö ök anūlö. 47Meuk chūök ṙinātö Ò, nāṅ Mariā aṅ Meketelā, nāṅ Mariā yöng Yôsĕf inrē.

Currently Selected:

T. MĀKÖS 15: CANIBSI

Highlight

Copy