Mumkahten 4
4
1Hēk chū-ö meuk nup inkihten tö harunkaṙen el katòh ngam tavūöi. Yĕh meuk, nup mak mat tö hakihtuṙen, ngaich cha-a nö öt hĕng tak mahaṙamkölōn! Lā in yip mahakihten cha ap kumlēḵ, ngaich öt hĕng tak umuh mahaṙamlōn cha. 2Ngaich chū-ö fēken tö kapah yik tö ha-ëhangen nö kapah nö ĕhten tö tö-aṅ yip tö ṙòngmö aṅ; 3Ĕhten pöri tö cha nyöre öp töt yamih, töt mameuk tötlöök la-en inrē nup tö kēkaṙen el katòh ngam tavūöi. 4Ngaich chū-ö meuk nup la-en nö ṙòkhöre nup la-en i kumnyah elmat tarik tö holre. Chanök alaha an inrē angū-ö kumlöön unôichrit ngam kuföt.
5Kirup këlre ngam tökulō-ovö, ngaich kāḵ alaha re.
6Ĕhten an ngam töhĕng më-el tī-i chanëven tö tö nët më-eltī-i la-en kumlöön unôichrit ngam kuföt.
7Hēk, meuk chanök alaha chū-ö el katòh ngam tavūöi: 8Hĕng taka öp tarik töt hĕng tak aṅ in, tö kikōnyö kūön hēk öt rēhĕn kikōnyö kūön hēk hanöng löknyö, sön pöri nö öt ṙanānguṙen nup la-en ò, nup mat ò inrē öt hētu nö tööḵngen tö kanôlò, lökten ò nö öt hētu nö hatön, chööḵnyen tö chīö öich lā-evṙen harööḵngenre inrē tö minyam? Angū-ö an inrē chanök alaha töt ṙanāmölōn lā-en.
9Ĕhten tö nët tak tö töhĕng tak, pò cha nö raneushuvö tö tölöök tökūö nup la-en cha. 10Pò cha yĕn fukngö, hĕngtak ngaich mahachohlö öp holre; tötkôlò pöri öp töng hĕng taka yē ò nö fukngö ngaich öt tahëngu mahachohlen ò. 11Hēk, yĕn nët tak holtöṙah re nö ṙōlhak, ṙāich acha-a; sitih kanô-òṅ pöri öp tö hĕng töṙah nö ṙāich? 12Pôrò inrē öp tarik nö mihôiṅ nö lā-al töhĕng tak öp töng hĕng töṙah, nët tak min tökô tö ò. Öp tö lūöi sāḵ tökuvaha öp töt hēṙen nö latòk.
13Ĕhten ngam yanāchö ngam tö akaha inrē ṙāl tarik tö öp tököiny tökulō-ov rācha, öp tö sōḵ nö kēḵ finë-elre, 14Pòrô anga-aṅ nö ngaich nö ṙamā-ang el kinlōngö nö chuh el kantēra rācha hēk ip pūlngö ò nö tö fötnyu nö yāich. 15Meuk yip tö aṅ chin mahavötköre el katòh ngam tavūöi, nö sā öp ṙāl tarik, öp tö hòṅ sökhaka nö i chūökre; 16Öt latôkaṙen yip tarik; i kui cha anga-aṅ nö ṙòkhöre, söönen yip mu-unôich tö yīhi min, nö öt ṙāmölōn nö in ò. Kô-en angū-ö inrē nöng chanök alaha kumlöön inrē unôichrit kuföt.
Currently Selected:
Mumkahten 4: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
