Mumkahten 3

Ṙētaka Nup Taṙòkhöre

1Ṙētakvö an i tö keuheūttöre, kö ṙētakvö inrē el katòh ngam halīöngö!

2Ṙētakvö kayônyu, ṙētakvö inrē kapah; ṙētakvö teūich, ṙētakvö inrē teuklö ngam tö teūichtu;

3ṙētakvö kumpah, ṙētakvö halanken; ṙētakvö tiṙölhanga, ṙētakvö inrē mānhölö;

4Ṙētakvö peuiny, ṙētakvö inrē hayīölkūö; ṙētakvö haṙivlōn, ṙētakvö inrē kiṙīöm;

5Ṙētakvö kavalngö ihong, ṙētakvö inrē hamūl ihong, ṙētakvö fūöl, ṙētakvö inrē ṙā-angtīre fūöl;

6Ṙētakvö chöh, ṙētakvö inrē chatngentī; ṙētakvö halinhangen, ṙētakvö inrē kavalhanga;

7Ṙētakvö tikaichhanga, ṙētakvö inrē chōk; ṙētakvö öt ṙô-òvö, ṙētakvö inrē ṙô-òvö;

8Ṙētakvö hāngenlōn, ṙētakvö inrē surīkhanga; ṙētakvö kinyungö, ṙētakvö inrē lanāmö.

9Suh ap taneūngen ngòh tö lā-evṙen nö i nup lā-en ò?

10Meuk la-en chin kahë tö ngam Tēv nö in vē kūön tarik nö hōtu nö vīken u. 11Vāyö tī anga-aṅ nö i tö keuheūttöre ik hē e; chaphöt tö örheūheu inrē anga-aṅ nö ellōn tarik, ngaich sönen anga-aṅ nö öt kôtökūö tö nuk tö ngaich tī ngam Tēv löktökūö ik raneh söl manā-aṅ. 12Akahalōn chū-ö tö tö rö-ö tö ĕhten nö in cha tö ngam töng ṙanāmölōn kumchikṙen cha inrē isaha cha nö aṅ; 13Tö e inrē nö inlōntö tarik nö aṅ im Tēv tö ò nöng nyamā-avkūö-òk inrē kumchikngenre inrē nö i nup la-en re. 14Akahalōn chin tö nup töng vahīṙen ngam Tēv nö tö örheūheu nö köp; ötkô nö örūheūheu nö köp; ötkô nö ṙūötuṙen, öt rēhĕn nö kanëngen aṅ in; ngatī vinī-i an tö ngam Tēv, hinôtö tarik nö pa-ekūö nö i kūö ò. 15Angū-ö, tö ha-ëhelen nö ngaich; öp tö mòkngöre, ngaich nö tö keuheūten; ngaich ngam Tēv nö chöh nuk tö ahōṙiyö.

Öt Lanöökö Nö Ing Panam

16Hēk chū-ö inrē meuk el katòh ngam tavūöi tö e nö i chūök kinṙôka töt michūḵṙen, uroh nö in e ap öt lanöökö, i chūök lanöökö inrē, uroh nö in e ap öt lanöökö. 17Ellōn re ṙô chū-ö ngaich ngö ṙô, Akah fālen tölöök an min ngam Tēv tötlöök inrē, pò ò nö halēnngö ṙētak tökeuheūttöre, la-en inrē. 18Ngö ṙô chū-ö ngaich ellōn re tö inlahen vē kūön tarik tö ngam Tēv nö kalaha cha nö hameukhö mat cha tö cha nöng töṙeūla. 19Pò ngam chanūhu vē kūön tarik nö hĕngren tö chanūhu töṙeūla; sā ngam tö hĕng tak nö kapah, ngatī nö kapah ngam tahëng. Hĕngren unhômö cha-a nö ṙòkhöre, öt ĕhten ngam tarik tö në töṙeūla; pòn ṙòkhöre nöng chanök alaha. 20Ṙòkhöre nö chuh im töhĕng chūök, ṙòkhöre nö ṙameū-eung el pitung, ṙòkhöre inrē nö hēk nö havanngöre nö pitung. 21Chiāp tö akahalōn yē öp ma-alaha ngam tarik nö lā tulöng kū-ö ane inrē öp ma-alaha töṙeūla nö chuh lā taṙeū el tumlat? 22Ngaich chū-ö meuk tö tö rö-övö tö ĕhten nö umuh tö ngam tarik nöng i nup la-en re tölngö nö kumchikngen re, pòn angū-ö lumnööṙö ò; achiāp tökô nö kēten ò nö meuk öp mu-unôich min tö ò?

Currently Selected:

Mumkahten 3: CANIBSI

Highlight

Copy