INLAHEN 28

I Maltā

1Hē ih ngaich ṙòkhötre, ngaich möl öi akahakūö tök kun panam nö Malta invëka. 2Ngaich yik aṅ ök kun panam nö aheūkölōn tö ih, hameuilökūö tameūyö cha-a, ngaich kē-ĕ ih öi ṙòkhöre, kūö ök kumṙah, laneūchö inrē. 3Hē Pôl nö hamūl ngòh, ngaich chaphöt u nö i kūö tameūyö; hĕng nòng ök pēch mameutlö, tökūö ṙanācha; nöng köp nö i kël Pôl. 4Ngaich hē yik aṅ ngam panam nö meūkan nö kilölhaka nö i kël Pôl; ngö ṙô cha-a tö höö, Kô ön ngòh tarik ngòh, nö famël tarik. Öt kô-òngvah lang anga-aṅ nö el mai; sön nö öt halöngtuṙen nö aṅ, tö ngam kinṙôka. 5Kichenyngö ök pēch pöri ang Pôl, nö i kūö tameūyö; ngaich nöng öt chök. 6Ngaich anga-aṅ nö tö-aṅhaṅ alaha, tö lōn cha; hēk hönglūk nöng fukngö nö kapah. Hē cha pöri nö ngaich nö marô-òten nö hatīönken ò, nöng öt fehevṙen; ngaich haṙī-ing ellōnre cha-a, tö ò nö tēv, tö ṙô cha.

7Röhta nö in e, ök panam ök mākūö ök kun panam, Pupliös ök minënyö ò, ök kamëḵeṅ ih, ngaich lūöi sumkam nö haṙūötken ih, nö aheūkölōn. 8Ngaich ök yöng ò nö vahavö, vūöi, sôḵòiny sāṙen inrē. Yihtöre ang Pôl nö in ò, ngaich löökentī tö ò. 9Keuheūthëṙen angū-ö, ngaich yik tahëng aṅ ök kun panam, nö kētö yik tövahavö nö in Pôl, ngaich lööken cha-a. 10Yik tö pōyen tī nö hakôlò ih; ngaich hē ih chuh, ngaich chaplö aṅ ih cha-a, tö nuk hanāṅten ih.

Ṙāngö Maltā Nö Chuh Rōm

11Unôichrit tö lūöi chumngëṅtö īhö, öi chuh, lökngö ël ök chōng aṅ Aleksanri, ök mu-umuh hē ök sūng; ök töminkahnguvö tö Tumnëtö. 12Sökngöre īhö i Surakūsa; ngaich lūöi sumkam öi höngngöh. 13Ngaich ṙā-ang in e ihö, öi hatô-òre; ngaich yihtöre i Rēkīöm. Hĕng hang sumkam; ngaich ök kuföt nö löklö lā lòhngö; ngaich im innët sumkam ihö yih i Putīöli. 14In e ihö kôtökūö tö yik māṅ; ngaich hōten ih cha-a, öi sat sumkam höngngöh in cha; ngaich chuh Rōma ihö. 15Ngaich in e yik māṅ, hē cha nö hāngö ih, nö yihtöre nö höngkūö ih; nö tölngö ök Chūök Mi-inyih Appi, i nuk Tölūöi Talīkö inrē. Ngaich ha-öiny ngam Tēv ang Pôl, hē ò nö meukkūö cha, ngaich ṙūölöre alaha anga-aṅ.

I Rōm

16Chalô ihö i Rōma, ngaich Pôl, nöng hökiṙen nöng kahngenre, höng ök kumyung amahten ò mi-in ò.

17Unôichrit tö lūöi sumkam anga-aṅ nö havëtö yik mā Yahūti nö in ò. Ngaich hē cha nö yih, ngaich ngö ṙô anga-aṅ tö cha; Kahōlö; pòrô chin öt fāluṙen i yip tarik hī, hēk i nup kui yik muvöhngö hī, ngaich öich kētu, öich tö kē-ĕ, ṙā-ang Yerūsalem, eltī vē aṅ Rōma. 18Vē kamhòṅkken chu nö hòṅ ṙāngen chu lang; pò cha nö öt kanôtukūö tö kinpaha nö in chu. 19Hē yik Yahūti pöri nö sōtö e, ngaich hòṅ asöltöre chū-ö in Kaisöör; öt kūö chu vahënyuvö tö fālen yip tarikre. 20Angū-ö an lökten chu havëten yīö, pò chu hòṅ meukkūö yīö, ve-ekūö yīö inrē. Pò chu kūö ngih maheūṅkkö Israĕl, öich nyëkö tö ngih sayōk. 21Ngaich ngö ṙô cha-a tö ò, Öt rēhĕn yip yamih nö ihih nö vahënyuvö tö tötlöök in meh. 22Hòṅ hang ṙô meh pöri ihö, yē ap lōn meh. Akahlōn inri ṙòkhöre, tö ngam māṅ nö keuheūtngöre chūök nö chōchö vinënyö.

23Ngaich hē cha nö sakāmu ṙô tö ò, yihtöre cha-a nö in ò, nö el ök chūök ò, nö maṙôngö. Mikahtu elmat cha-a tö ò, eūkö ngam pūlngö ngam Tēv; löknyö im chöngö Môsös ṙô i nup ṙô yik pròfĕt inrē, anga-aṅ nö löktökūö peuheū, söl hatööm. 24Rēvre yik ṙamātö ellōnre tö ṙô ò; rēvre yik tö sōḵ. 25Ngaich hē cha nö öt hōḵen höö, ngaich kiröönngöre cha-a, ngaich ngö ṙô Pôl nö unôich, kô-òṙô an ngam Töhet Fanöinylö, nö lökten in Isayā, ök pròfĕt, nö i yik muvöhngö yīö, nö ngö ṙô, 26Kuṙòh, yihtöre man i vē tarik, ngö ṙô, I hināngö yin min hang; öt akaha elnang pöri. I mineūkö yin min meuk, öt akaha elmat pöri. 27Pò vē tarik, nö kufëilöre ellōn; ṙahata elnang cha-a inrē; pòn sōḵ nö akaha elmat nö meuk, sōḵ nö hāngö elnang inrē, ngaich havöötökūöre; ngaich halanken cha Chu-ö. 28Akahalōn yin yēḵ, lökten tö e, ngih inyööken aṅ im Tēv, nö söömi nö i Tahëng Mihëṅṙö tarik; ngaich cha-a min nö hang. 29Keuheūthë ṙô anga-aṅ tö u, ngaich kiröönngöre yik Yahūti, nöng kil ṙô höö.

30Nët samyeūheuhöre ang Pôl nö iyöng el ök chūök töhaṙāyö tö ò; ngaich höktö yik taṙòkhöre tö hòṅ yihtöre nö in ò. 31Ahangkö ngam pūlngö ngam Tēv, haköphöti inrē i nuk inlahen ngam Mā Yēsū Kristū, nöng öt pa-ekūö; öt hĕng tak tamahngö inrē.

Currently Selected:

INLAHEN 28: CANIBSI

Highlight

Copy