INLAHEN 27

Hatēhĕngre Pôl Nö Chuh Rōm

1Ngaich hē ih hōtu öi chuh Italī, ngaich kētu ang Pôl, tö yik rēvre tökē-ĕ tahëng, nö ik yöngṙen tö hēngòng kumyung, Yūli minënyö, aṅ i yik amahten Òköstös invëka. 2Yôklö ihö ngaich el ök chōng aṅ Etramutti, ök chamuh i nup panam i kūö mai i Asi; ngaich elmai ihö. Hol ih Aristakös ök aṅ Tösalònikē. 3Sökngöre ihö i Sītōn im huṙöich; ngaich Yūli nö ṙūötökūö tö Pôl; halöngten ò nö kuhēt nö in yik holre, ngaich meūken tö cha. 4Ṙā-ang umuh ihö hēk elmai, ngaich lökngö elkatòh Saiprös/Kuprös ihö, pò ngam kuföt nö asaha ih. 5Ngaich hē ih havāngngö el ap mai Kiliki, Pampuli inrē, yih ihö ngaich i Mūra, ap tö kiröng elpanam i Lūki. 6In e ök yöngṙen tö hēngòng kumyung nö kôtökūö tök chōng aṅ Aleksanri, chamuh Itali; ngaich hayôklen ih anga-aṅ ël ò.

7Ngaich ṙōl sumkam īhö höng öt yih; höng pītnyöre ihö öi kamtö Nitös; öt halöngtuṙen tö ngam kuföt, ngaich lökngö elkatòh Krĕtē ihö, kamtö Salmôni. 8Ngaich höng pītnyöre öi haröshötre, ngaich yihtöre öi i Tölöök Chūök Chōng; röhta angū-ö nö ip panam Lasīa. 9Marô-òten ihö, kihngen kinröönngö; pò ngam Inhīkö nö ngaich nö keuheūten. Ngaich ve-ekūö cha Pôl, nö ngö ṙô, 10Mah! Akahalōn chin tö hī min palā-aiṙen; ngaich pōihangen yanëḵngen inrē, öt höng ngòh chōng; tön nup aṅ ò inrē, ayī-ö inrē tarik. 11Ök yöngkūö chōng pöri, ök töchōngu inrē, ahang ṙô, ök yöngṙen tö hēngòng kumyung, nö mötlö tö nup ṙô Pôl. 12Ngaich pöri ngam chūök chōng nö öt tölöök nö chūök innyatlö hē el sūng, ṙōl tak yik hamôten ih, ṙā-ang umuh, öi hōtu tö cha tölngö Fòinik, yēi kô; ngaich in e höngngöh hē ngam sūng; ök chūök chōng i Krĕtē, tö kū-ötö kapā chuhöt, lòhngö chuhöt inrē.

Chanôichö El Mai

13Ngaich hē ök tölahööṙa kuföt. Löklö lā lòhngö, ngaich teūngen cha-a, tö lōnre; tūöklö sanumti kirap cha-a ngaich; ngaich hatēhĕre, nö haröshötre nö i Krĕtē. 14Rĕh rô-òten ngaich ök yöng kuföt, ök lamöklö kapā chuhöt, töng chavīṙa. 15Ngaich ngam chōng nö kô-òngvah; öt kô tö ngam kuföt; ngaich höng hökngenre ihö, ngaich heuingö. 16Lökngö elkatòh öp kun panam ihö, Kôtā minënyö; ngaich haköpngö ök kupòk ihö, öi höng pītnyöre. 17Ngaich hē cha nö hatūöilen ò; ip tölngö kanô-òṅre cha-a nö nyëkṙat ök chōng. Ngaich pa-ekūö cha-a tö lanönhötre nö i Surtis, hatūöitö nuk intĕhre cha-a, ngaich höng heuingö. 18Kilöönö ihö tök yöng chanôchö; ngaich im tahëng sakāmö cha-a nö kavalngö aṅre. 19Ngaich im linūöi sumkam cha-a nö hakôtö tīre nö sukngö nuk chehen ngam chōng. 20Öt tavūöiyu, öt taneūsuvö mat nö rēhĕn nö ṙōl hang sumkam; ngaich ngam yöng chanôchö nöng in ih; öt lōnuvö ihö ngaich, töre, öi tö aṅ.

21Hē cha nö ngaich nö marô-angen nö öt nyā, söklöre ngaich Pôl nö ellōn cha, ngaich ngö ṙô; Mah! Hang ṙô chu yin öre ngaich, ui ṙāngö Krĕtē, ngaich yih töngamuh öi palā-aiṙen, yëḵngen inrē. 22Hōten yīö pöri chu-ö, öt pa-ekūö, öt hĕng tak min nö in yīö töpalā-aiṙen, höng ngòh chōng. 23Pòn hĕng tak, amòh tö hatööm; ök ma-ahānga aṅ im Tēv, nö sökhaka nö in chu, ngam tö īnu tö chu, ngam lahök la-en chu inrē. 24Ngaich ngö ṙô ök ma-ahānga. Um pa-ekūö, Pôl; hòṅ sökhak man I kūö Kaisöör; kē-ĕkūö meh An inrē ngam Tēv, tö yip hol aṅ meh. 25Lökten ui pa-ekūö; tön ṙātö ellōnre chin im Tēv, tö e min nö ngatī, sā ṙô Ò tö chu. 26Höng lönhöt in min, ip tö hĕng kun panam.

27Finënsīön mitööm ngam chanôchö, ngaich im chūöl hatööm yik yōm chōng nö röhta nö i panam, tö lōnre, hē ih ël ap mai Atriā, öi höng kalūka. 28Ngaich kalah kūö panam cha-a; ngaich kôtökūö tö e nö nët anāi tum tasöm. Rĕh rô-òten, hēk cha-a nö kalah kūö panam; ngaich taneui sīön tasöm. 29Ngaich pa-ekūö īhö tö lanönhötre, öi lökhöt kui ihong; fënö sahumngö cha-a ngaich tö sanumti nö lā rit; ngaich rūttö peuheū. 30Ngaich hē yik yōm chōng nö hòṅ ṙāngö ök chōng; ngaich hatūöitö kupòk nö el mai, nö hanyatkölōn re nö sā tö hòṅ sumngö sanumti nö lā kuilö; 31Ngaich ngö ṙô Pôl tö ök yöngṙen tö hēngòng kumyung, yik kumyung inrē, yē vē nö öt ngöh nö el ngòh chōng, öt aṅ min ayī-ö. 32Ngaich yik kumyung nö rökngö ök pisik ök kupòk; ngaich hökngen ò nö suktöre.

33Ngaich hòṅ peuheū-eulre ngam peuheū, ngaich ve-ekūö cha Pôl, nö hōten cha nö nya-aṅvkūö, nö ngö ṙô, Finën sīön sumkam yīö ön ngih, öi höng öl nya-aṅvkūö. 34Lökten chin hōten yīö nyā; angū-ö an anāhaṅ yīö. Öt hĕng hang milöichö keūyö yin min tö töpalā-aiṙen. 35Keuheūthëṙô anga-aṅ tö e; ngaich kēḵ ròti, ngaich ha-öiny ngam Tēv nö i kūö cha nö ṙòkhöre; fôkö e ngaich, ngaich kētöre nö nyā. 36Ngaich cha-a nö ĕhten nö öt pa-ekūö, ngaich nya-aṅvkūö cha-a inrē. 37Nëtòng sat anāi tafūöl tak īhö el ök chōn, öi ṙòkhöre. 38Keuheūthëkūö cha-a nö nyā, ahöhlö ngam chōngcha-a ngaich nö sukngö nuk sāiny nö el mai.

Sayööḵ Ök Chōng

39Ngaich hē e nö ngaich nö hat; öt akahakūö cha-a tök panam; meuk ök tö hĕng pöri cha-a, tö kilūhötre nö i kuyāyö; ngaich ve-ekūöre cha-a, yē cha nö kô nö lökhöt in e tī tök chōng. 40Ngaich rökngö nuk sanumti cha-a; ngaich nö ṙāngö u nö el mai; luhlö nyanëk nuk kanëḵritlö cha-a inrē; ngaich kū-ötö kuyāyö. 41Lökhöt ök chūök nuk mai pöri cha-a, nö fatahhen höö kūö; ngaich aseūtlö ök chōng; ngaich köp ök kuilö öt hanlöinyken; ngaich pöri ök ritlö nö oh tökūö kumlēḵ mahūṅvö.

42Ngaich ve-ekūöre yik kumyung, nö hòṅ fëlngö yik tökē-ĕ; pòn sōten cha nö yööhöt, ngaich meutngö. 43Sōtu pöri cha-a tö ök yöngṙen kumyung; pò ò nö ma-iṅ nômö Pôl; ngaich hōtö yik tökô anga-aṅ, nö yöö, nö sūḵungre nö el mai; ngaich urēhöt nö el tanyô. 44Ngaich yik tahëng, rēvre nö el savaich, rēvre yik el nuk töng aṅ ök chōng. Ngatī inlahen cha-a, ngaich ṙòkhöre nö el tanyô.

Currently Selected:

INLAHEN 27: CANIBSI

Highlight

Copy