INLAHEN 26

Laklöre Pôl Nö In Akripā

1Ngaich ngö ṙô Akrippā tö Pôl, Halöngtuṙen man kahngôre. 2Hateutnyö këlre ngaich Pôl, ngaich ṙô lanaklöre: Rācha Akrippā; ṙāmölōn chin, ṙô lanaklöre: i kūö meh, töngamuh, i inlahen nup taṙòkhöre fālen, vinënyö chu tö yip Yahūti. 3Pò meh öm tö-akahalōn takô tö nup kui i yip Yahūti, inhôṅngô inrē. 4Lökten chin hōten meh aṙē-ĕlōn hang ṙô chu. Ngam inlahen chu hēten tö nyinī-öṅ chu, urĕh sin nö i vē tarik chu, i Yerūsalem inrē, akahalōn yin vē Yahūti nö ṙòkhöre. 5Akahalōn yin tö chu hēten tö raneh, yē cha öre nö hòṅ hameukhöti, tö chu öt hanāṅtuṙen inlahen i ngam kui ih, öich sā Feresī. 6Ngaich chin yih sökhak töngamuh, kahòkkaṙen pò kūö mineūkkö ngam kinlēḵngô ngam Tēv nö i yik muvöhngö ih. 7Ngam kinlēḵngô maheūṅkkö inteungten yik tö nët sīön miyöngö, kalēḵĕlōn nö lök la-en ngam Tēv, nö peuheū harap. Kūö ngih mineūka chin vënyu tö yip Yahūti; me-eṅ rācha. 8Kūö yòh öi öt kô ṙātö ellōnre, yē ngam Tēv nö hachohlö tökapah.

9Tö ngö lōn chin chū-ö inrē, öich hòṅ pōihölö lā-al ngam Mine-eny Yēsū aṅ Nāsaret. 10Ngatī tī chin i Yerūsalem; maṙôngö kalonghöt chū-ö tö yip töhet, i chöngö yip mākūö kūönṙô, ngaich yē cha nö kumpaha, höng hōḵ-o e chū-ö inrē. 11Ṙōl heuh chū-ö hakôlò cha el nup chūök vine-eṅkūötēv. Hōḵngen cha nö töt lamëkôre; ngaich öich tainy tö cha, öt hakôlò cha öich i tahëng pumnāmö.

Vënyö Ök Invöötö-ellōnre Ang Pôl

(Act 9.1-19; 22.6-16)

12Ngaich angū-ö la-en chu, kiröönngöre i Tāmöskös, öich chönguvö, tölô inrē tö yik mākūö kūönṙô. 13Me-eṅ rācha; ik sakāmö chū-ö el talöökö, öich meuk ök töyang aṅ el halīöngö, yang nö havīlen chu, yik hol chu inrē kumröönngöre. 14Ngaich hē ih fukngö el tumlat, ngaich hang ök ṙô chū-ö tö ngö ṙô tö chu, i ëlô Heprāi, Sôl Sôl, kūöyòh öm öt hakôlò Chu? Chök man, röönngö kūö ngam töchökhukūö. 15Ngaich ngö ṙô chu-ö, Mā! Achīö Öm Me-eṅ? Ngaich ngam Mā nö ngö ṙô, Yēsū Chin, Öich töt hakôlöngṙô tö meh. 16Choholre pöri me-eṅ, söklöre; tön ngih ön lökten Chu meūkö tö meh, Öich vamīlen meh mameukṙen, ameūkö në inrē, minë maheuṅk meh ngaich nup mineūkö Chu min inrē tö meh. 17Katöllen meh Chin, ṙā-ang i yip tarik meh, ṙā-ang i Yip Tahëng Mihëṅṙö inrē yip chūök meh tīntu tö Chu; 18Löpnyökūö mat cha inrē, im hanātö, ṙā-ang im sinngūlö, havöötökūö cha inrē im Tēv, ṙā-ang ngam minhôiṅyö Sātan; hòṅ cha nö teūngen tö inṙē-ĕl tökööl, ngaich amīnu nö i yip tö-ahetlöngö lökten im mikah in Chu.

Vënyö Nuk La-en Re Ang Pôl

19Lökten chin, me-eṅ rācha Akrippā, öich öt kô öthang ṙô ngam tömeūkö aṅ el halīöngö. 20Ngaich öich ahangkö yip aṅ Tāmāskös urĕh, i Yerūsalem, keuheūtngöre chūök i panam Yūtā, i yip Tahëng Mihëṅṙö inrē; hòṅ cha nö havöötö ellōnre, havöötö kūöre inrē nö im Tēv; la-evṙen inrē tö nup la-en invöötö ellōn. 21Angū-ö an lökten yip Yahūti nö kē-ĕ chu, el ap töhet chūök; ngaich hòṅ fëlngen chu. 22Hōluṙen pöri chū-ö tö ngam Tēv öich sökhaka töngamuh, hameukhömat tökūöṅnö, töpōyö inrē, öt inrēṙu ṙô, höng nup ṙô yik pròfĕt, Môsös inrē, 23Tö Kristū nö tö hòṅ kihngen, tö Ò inrē nö urĕh, lökten im invanlö tökapah, nö ahangkö ngam hanātö i yip tarik ih, yip Tahëng Mihëṅṙö inrē.

24Ngaich hē Pôl nö ngati ṙô, nö laklöre; ngaich pōitô Festös nö ngö ṙô, Pôl; kulō-ov man; tökūö ṙôken haköpre. 25Ngaich ngö ṙô anga-aṅ, Rö-ö chin kulō-ov; me-eṅ tölngö tö-akaha Festös; ṙô tö tökô-en chin, öt hapōiluvö. 26Akahalōn an ngam rācha tö u tö nup tö hayunngöre tö lōn chu, nö in ò; pò u nö töthayunkaṙen kinëken. 27Me-eṅ rācha Akrippā,, ṙātö ellōnre ömeh, i nup ṙô yip pròfĕt? Akahalōn chin tö meh ṙātö ellōnre. 28Ngaich ngö ṙô Akrippā tö Pôl, Rahëchyen ṙô man hōten chu vītuṙen Kristīön. 29Ngaich ngö ṙô ang Pôl, Rö-ö man höng me-eṅ, rahūtten chu i kūö ngam Tēv, tön ṙòkhöre inrē vē hamang ṙô chu töngamuh, yĕn rahëchyen, yĕn pōyen nup ṙô, öi sā chu, uh pöri nyëkö. 30Choholre ngaich ök rācha, tök mahayöng, Pörnikē inrē, ṙòkhöre yik hamòl cha nö ūichhaka inrē. 31Hē cha nö ngaich nö kiröönngöre, ngaich ve-ekūöre nö ngö ṙô, Öt fāluṙen ön ngòh tarik, töp lökten kinpaha, hēk nyinëkö. 32Ngaich ngö ṙô Akrippā tö Festös, Ṙā-ayö an öre ngam tarik, yĕn öt hòṅ asöltöre ang nö in Kaisöör.

Currently Selected:

INLAHEN 26: CANIBSI

Highlight

Copy