INLAHEN 24

Vīka Fālen Pôl Tö Yik Yahūti

1Unôichrit tö taneui sumkam, ök mākūö kūönṙô, Ananī, nö yih, nö holtö yik mā hĕng taka inrē ök töhuveū-eu ṙô nö kahôka, Tertulös minënyö. 2Ngaich cha-a nö ve-eny nang ök mahayöng tö fālen Pôl. 3Ngaich hē ò nö havëtu, kaknyöre ngaich Tĕrtulös nö ve-eny fālen ò, nö ngö ṙô; Tī meh in öi kuchīken takô; kūö ngam inlēnö tī meh inrē nö pōyen në töhalöökö, i vē tarik; örheūheu in hōḵo u, ha-öinyö u inrē, keuheūtngöre chūök; me-eṅ tölngö tö-akaha Filik. 4Sōḵ pöri chū-ö marô-òtö ṙô in meh; hōten meh chin öm hangihtöre tö në töharoh tum milôhò ṙô ih. 5Kôtökūö in tö ngòh tarik öt mahakôlò tömaṙôngö, maharunnyö tinṙōllen i yip Yahūti, keuheūtngöre chūök nö ing panam; yöngkūö yip tötkô-en ṙamātö ellōnre, yip Nāsarīn. 6Ngòh tö hòṅ hachōichngö ap töhet chūök; ngam tö kē-ĕ tö ih, ngaich hòṅ kahòkken ò lang, öi asā kuire. 7Ngaich pöri ngam mākūö kumyung, Lusīös, nö yihtöre nö in ih; ngaich kēḵngen ò, nö kësen, filinyngen ò nö eltī ih. 8Ngaich hōtö yip vamënyen ò nö yih nö in meh. Kô-òren man mīnö akahalōn tö u, yē meh hatönan, tö lökten ih vënyen ò. 9Hanôltö ṙôre inrē yik Yahūti, hôṅṙuṙô tö u nö ngatī.

Laklöre Pôl Nö I Kūö Filik

10Ngaich hē ök mahayöng nö fëikökūö Pôl hōten ò nö ṙô-òv; kaknyöre ngaich Pôl, nö ngö rô. Pò chu akahalōn tö meh, öm ngaich töṙōl samyeūheu kamhôṅka i vē tarik; ṙāmölōn chin, öich ṙô lanaklöre. 11Ka-òren man akahalōn tö e nö öt saṙaklöngkūö tö tö nët sīön sumkam, hē chu chuh Yerūsalem, öich ve-ekūötēv. 12Öt rēhĕn cha-a nö kôtökūö tö chu el ap töhet chūök, öich kilṙô tarik; hēk haruhlö alaha tömaṙôngö, öt rēhĕn el nup tahëng chūök vine-eṅkūötēv, öt rēhĕn im panam. 13Öt rēhĕn yin nö kô nö hameukhömat meh tö nup lökten cha nö vënyen chu. 14Halööknyôre chin in meh, tö chu sā ngam Talöökö ngam tökô-en inköphöti, tö ṙô cha, öich lök la-en ngam Tēv yik muvöhngö ih. Ṙātö ellōnre i nup taṙòkhöre aṅ im chöngö, nup tökūichi inrē tö yik pròfĕt. 15Meūka inrē im Tēv, ngam maheūṅkkö cha cha-a inrē, ngam invanlö tökapah min, tölöök, tötlöök inrē. 16Lökten chin kalah öich halöök elkuilōnre, im Tēv, i tarik inrē, örheūheu.

17Ṙōl hang samyeūheu chin yih, öich kumtö inlōnti vē tarikre, nup tökētu inrē nö im Tēv. 18Ṙònghöichṙen chū-ö ngatī, ngaich kôtökūö cha-a tö chu, halööklöre, el ap töhet chūök; öt hōlu tö tömaṙôngö, öt rēhĕn taṙōlaṙen. 19Rēvre yip Yahūti aṅ Asī, yip mī-ihih öre nö i kūö meh, nö ve-eny; yē cha nö vahënyu tö fālen chu. 20Hēk hökngöṙô vē tarik tö nup kanôtökūö cha töchōich la-en chu, hē chu öich sökhaka i kūö kamhôṅka, 21Höng hĕng ön ngih ṙô chu, öich hūḵa, sökhaka in cha. Ṙôtö invanlö tökapah, ngam kinṙòkken chu töngamuh, i kūö yīö.

22Hē Filik nö hāngö u, ngaich akahalōn anga-aṅ tö Inlahen ngam māṅ; ngaich ngö ṙô, Yē öp mākūö kumyung min nö yih, ang Lusiös, ngaich chū-ö min hatönken ngam inlahen yīö. 23Ngaich tölṙô ök yöngṙen tö hēngòng kumyung anga-aṅ nö aṅten ò, nöng öt halökö, sōtu inrē nö tāhayö yik hol ò nö meukṙen ò.

I kūö Filik Nāṅ Trusilla Ang Pôl

24Haroh tum hang sumkam, yih ngaich Filik nö holten Trusilla, ök Yahūti pihö ò; ngaich tīnngö mahavëken Pôl; ngaich hang ṙô ò tö ngam mikah in Kristū Yēsū. 25Ngaich hē Pôl nö ve-ekūö ò tö lanöökö, ṙināpöre, ngam tömòkngöre kinṙôka inrē; ngaich pa-ekūö Filik, ngaich ngö ṙô, Kuṙòh ngaich man sin; havëken meh chin min hēk, ip lanöökö ṙētak. 26Meūkkenre inrē anga-aṅ, nö hòṅ kē-ĕvkūö tö rupīö tö Pôl, pòn hòṅ luhlen ò; lökten ò nö ṙöpen nö tīnngö mahavëken ò, nö ve-ekūö ò. 27Keuheūthë nuk tö nët samyeūheu, ngaich haṙëniṙen ang Filik tö Pòrki Festös; ngaich hòṅ hanghuṙen tö yik Yahūti, lökten ò nö ṙānyen Pôl nö el kinlōngö.

Currently Selected:

INLAHEN 24: CANIBSI

Highlight

Copy