ZEKARIA 13
13
1“Tilai nungh atao nou shi-e,” “David thsaosithsoso naiuso Yirusalem khaiunia nouso ngüso angei naiuso sotsom nouso ainou losioau haiungan tsak sopkiu-e, ta Apaou Akongting nou ngioji. 2Nungh taoko nung gohthang ainou sotsom nian nouso ngü moiane, naiuso loto nungso sauüh tsüyangsanshi-e. E-po tsak ta ngiotsün saulünou ngü wanane naiuso sotsom nouso tü amkhamau amongchio nou lowankiu-e. 3Naiuso ajantsoüh loüh tsülaokülu khapiam ngionai, apa posinyiuüh apa loatkü wanau apa hau chite-e, tiautenai apaüh Apaou ngio chiteji, lüko yaang chiteji. 4Tilai nungh atao nouso shi-e, e-po sauühtso apa atsangshei thaiutha tsübülome, tsüdekünai e-po tsakli tsüchhi-e, tsüdekünai khaiuniahoi kausaiat au e-po tsak ün sheitho tsütho-e. 5Nungliko apaüh, ‘Ngü e-po tsak tsüde ta ngio-e. Ngü eiu-a khaiunia tsak noin- ngü jü aakihlaiu chikü eiu-akü shin.’ 6Nungaih ajantsoüh, ‘A-onthong nai mou nouso nung ti in?’ ta apa tü sang naito, apaüh thala-e, ‘Ngü nung mou nouso paiuhai tsamai nai eplou.’”
Goa ün Onnemok Jimtsün Loatau Thoilutji
7 Apaou Akongting nou ngioji, “Oh salaiu, atsa, küta jü thaiutha chhikiutsün onnemok jimtsün tü lühe! Apa lüloat, naiuso onnemok hoi nouso pengpune, Ngü jü khaiunia tü pha poh-e, 8naiuso goumchi chikü nai khaiunia haoson süme nouko haoson nime loatkü wane. 9Naiuso haoson süme apoi nou tü ngü thelu-e, naiuso in tsangkü tangkason losangtsünli ngüso losange. Ngü ngüso tü chaiou lakkeng nou ta thelutsün khekkü thelu-e. Nungaih ngüsoüh ngütü misao-e, naiuso ngü ngüso tü thala-e. Ngüso jü khaiunia noin ta ngü ngüso hau chite-e, naiuso ngüsoüh Ngü ngüso Goa ta thalou-e.”
Currently Selected:
ZEKARIA 13: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
