MARK 12

Sainaoshep Eiu ai Chhitsünso Athatlu Ngio

(Mat 21:33-46; Luk 20:9-19)

1Nungai Yisuüh ngüso tü athatlu ngionai chite: “Atao tsak ko khaiunia tsaküh Sainaoshep eiu ah, nung lemkü ai nou ai kü taiu, naiuso anoipekao khan tsak thaiuküta, ajimao koilop tsak lahkü taiu. Küta apa nung sainaoshep eiu a-tsünso hao apaotsangao taiukiukü goumchi amao tsakai süme iuwan. 2Tilai sainaoshep panao atao saojikan, apaüh achhitsünso ainou sainaoshep apa ün be-eiuyam haoson luao ngüso dongai tsamki tsak hong. 3Achhitsünsoüh tsamki nou thaloukü thio, küta tsosa hongshian. 4Nai eiu-pao nou amao tsamki tsak hongshin; naiuso achhitsünsoüh apa khaiu ai thio, küta alomiam kiukü kankei. 5Eiu-pao nou loüh tsamki amao tsak hongshin, naiuso ngüsoüh apa loatkü wan; amaohai lüko piakü ngüsoüh ajantso da thio, naiuso ajantso loatkü nung khekkülu kankei. 6Tsak linlin poishitsün nung apaüh thatü tsüojintsün Thso nou noiküla. Aphiteng nai apaüh achhitsünso dongai apa thso hongkü ngiom, ‘Ngüsoüh jü thso hao asuhat noi-e ta ngo monglamji.’ 7Lüko achhitsünso ngüso si ngüso jetko chitekü ngiom, ‘Nung eiu-pao nou thso tengkam noin. Ashi, samüh apa loatko, küta tengkam nou samüh the-e!’ 8Nungtiphe ngüsoüh Thso nou thaloukü loatkü, apa miapem sainaoshep eiu ainou yakkan.

9“Naito, sainaoshep eiupao nou ti chhi-e?” ta Yisuüh sang. “Apa shikü achhitsünso loatküta nung sainaoshep eiu nou amao achhitsünso hao kiuwan-e. 10Asamüh asiongio nung velukü noi-e?

‘Tsamlahoi nou sübao lung atheao tsünoi ta wanan nung apem chiko tsamno kheam atengtingao iula.

11Nung Apaou nou chhikü noiküla;

nung athapao titi athanga tsak noin!’”

12Yihudahai aheihoi nousoüh Yisu thalouau yam, tiautenai athatlu ngio nou apaüh ngüso thako chiten ta ngüsoüh ngesan. Lüko ngüso hoi asong nou lun hat nou shioko, ngüsoüh apa wankü khuwan.

Liukim Kiutsün Thaiutha Ngiosang

(Mat 22:15-22; Luk 20:20-26)

13Farisihoi ajantso naiuso Herodhoi ongko mepem ajantso Yisu ngionai aphio thalouau ngiosang kankü apa dongai hong. 14Ngüso apa dongai shikü ngiom, “Atsandetsün, amao khaiuniahoi nousoüh ti yangji nung thaiutha ayangelat tsünoikü ni ngiotsüo ngioji ta samüh ngeji. Ni khaiunia kha tsüthapji, lüko ngiotsüo nai Goa nou mongchiotsün yam hanji. Romhai Nokpao Caesar hao liukim kiutsün nung sam Ngiokhem nai ayam noin süne tsünoi? Samüh kiu-e süne tsükiu-e?” sam hau achite.

15Lüko Yisuüh ngüso akaosai ngekü ngüso tü thalan, “Tiau asamüh ngo liluao koweji? Jü dongai son tangka tsak akanjikan, küta ngo nung tü thapko.”

16Ngüsoüh son tangka tsak kankü shin, naiuso apaüh ngüso tü sang, “Nung sau khasinio sotsom naiuso sau niansat?”

Ngüsoüh, “Nung Romhai Nokpao Caesar” sotsom ta thalan.

17Nungtiphe Yisuüh ngiom, “Naito mein, Ti Nokpao Caesar ün noin nung Nokpao Caesar hao lükiu, naiuso ti Goa ün noin nung Goa hao lükiu.”

Nai ngüso Yisu tü thatü ngawan.

E ainou Ahshitsün Thaiutha Ngiosang

(Mat 22:23-33; Luk 20:27-40)

18Nungai e ainou tsü ahshi-e ta ngiotsün Sadokihoi ajantso Yisu dongai shikü ngiom, 19“Atsandetsün, Mosaüh nung ngiokhem sam thaiutha satkiu: ‘Khaiunia tsak thsohai tsühakü tsammongnyiu poitaiukü eannai, nung anio nou tsamsigoh yange nungtiphe ngüne thso hanai nung adei nou thsoau noi-e.’ 20Atao tsak ko adeianio melo chinyat noiküla; petche nou menyiu tsak tsamsigoh yang, lüko thso tsühakü ean. 21Nai nime nou nung menyiu tsamsigoh yangshi, naiuso apa lüko thso tsühakü ean; naiuso süme nou lüko nungtilu. Thso süme nou tü lüko nungtilu thawao, 22naiuso amao apoi nouso tü lüko nungtilu thawao: Nung deisinio chinyat nouso apem nou nung menyiu tsamsigoh yang naiuso thso tsühakü ean. Aphiteng nai menyiu nou ean. 23Eanhai apem ahkü shitsün ajekhaiu konai nung menyiu sau tsammongnyiu noi-e? Tiautenai ngüso deisinio chinyat nousoüh nung menyiu tsamsigoh yang.”

24Yisuüh ngüso tü thalakü ngiom, “Asam titi tsüthakünai noin! Nung tiau asamüh ngemo? Tiautenai nung asamüh Asiongio tsüdekünai Goa oukong tsünge nou shioko noin. 25Tititenai tilai eanhai ahkü shi-e, ngüso aün nai aünhonghoi khekkü noi-e naiuso tsamsigoh tsüyang-e. 26Lo eanhai ahkü shiao thaiuthako, Mosa Thsam nai, pai-eng nai in nyaisantsün thaiutha ngiotaiutsün velukü tsünoi süne? Nungko ‘Ngo Abraham Goa, Isak Goa, naiuso Yakob Goa,’ ta Goa nou Mosa tü ngiom ta satkü noin. 27Apa eanhai Goa tsüde, aa noinso Goa noin. Asam thumkü tsüthakünai noin!”

Athoiluttsün Asong

(Mat 22:34-40; Luk 10:25-28)

28Ngiokhem tsandetsünso ongko tsak nungko ngüso sangetsün angkü noiküla. Yisuüh Sadokihoi hau athashitsün amei tsak kiutsün ep, nungtiphe apa Yisu dongai asangtsün tsak kankü shikü ngiom: “Apem chiko Athoilut atengting nou sübao?”

29Yisuüh thalakü ngiom, “Oh Israel, Anglu! ‘Apem chiko atengting tsak nou nung, Apaou sam Goalu Apaou noin. 30Apaou a-Goa tü among athum nou, a-onthso athum nou, amongyang athum nou, naiuso a-oukong athum nou, lütsüojin.’ 31Athoilut atengting nime nou nung noin: ‘Aphaosipo tü ni apim tü tsüojintsünli lütsüojin.’ Nungne chiai songkü athoilut atengting amao tsünoi.”

32Ngiokhem tsandetsün nou Yisu tü ngiom, “Atsandetsün, ni meikü chhi-iu! Ni ngiotsün nung atsüo noin, Apaou lu Goa noin naiuso nungai apa tü simkü amao Goa tsünoi. 33Naiuso khaiunia mong athum nou, mongyang athum nou, naiuso oukong athum nou, Goa tsüojinao noin; naiuso apaüh meshen pem tsüojintsünli apa phaosipohai tsüojinao noin. Goa hao thainian loatkü chaithio kiutsün konai nung athoiluttsün nime nou angio angtsün atengting.” 34Yisuüh apa mongthat meikü thalatsün ngekü Ngiokhem tsandetsün tü ngiom, “Ni Goa Nokshing ainou laiukü pungekü tsünoi.”

Nungphiai to khaiunia sauühtso Yisu tü tso sangao tsüsomshi.

Messia Thaiutha Ngiosang

(Mat 22:41-46; Luk 20:41-44)

35Yisuüh Amkham tsamnai tsandenai sang, “Messia nung David thsaosithso ta titi Ngiokhem tsandetsünsoüh ngioji? 36Asio Onthso nou David lotsüokü ngio-in:

‘Apaou nou jü Apaou tü ngiom:

Ngo a-ehso ahok khemai motaiukün lektso,

Ni nungko jü uai anoi.’

37David apa pemüh apa tü ‘Apaou’ ta jon, naito Messia nung titi David thsaosithso theau shio-e?”

Yisuüh Ngiokhem Tsandetsünso Thako Lotsüoji

(Mat 23:1-36; Luk 20:45-47)

Hoi asong nou Yisu tü monglingkü angkü noiküla. 38Apaüh tsandekü ngiom, “Sauhaiüh phakhut alaiu thokü chaikam thang nouso ai asuhat kiukü salam aiuji, nung Ngiokhem tsandetsünso thaiutha lütsüolo. 39Ngüsoüh Yihuda kamthang nouso ai naiuso nyungkam nai noikham ameiting nou aiuji. 40Ngüsoüh jihihoi thangmangji naiuso ngüso tsamai alum lowanji, naiuso akaosai nou ngioyak laiulaiukü misao saokü hanji!”

Jihi Chaithio

(Luk 21:1-4)

41Yisu amkham chaikamtaiutsün khako moknoi, apaüh khaiuniahoi nou titi chaikamtaiutsün nai tangka thioji nung thapkü noiküla. Memeihai piakü nou momoüh taiutsünli tangka piakü thio; 42nungai tsosilu jihi tsak shikü, apaüh taiutsün poisa nime nou chaikamtaiutsün nai thio. 43Nai Yisuüh apa sahoiso apa dongai jonkamkü ngüso tü ngiom, “Atsüoting ngü asam tü ngio-e, Chaikamtaiutsün paidan nai thiotsünso ongko, nung tsosilu jihi nou thiotsün chaithio tekkü piatso. 44Tititenai amao nouso apemüh momo thaiutha singtaiu loküta poisantsün thio, lüko apaüh meshen tsosilu ainou apa taiutsün apemapa aakih ko theau taiutsün apem kiuwan.”

Currently Selected:

MARK 12: KHIABSI

Highlight

Copy