MARK 11
11
Ashio Epkü Yirusalem nai Naptsün
(Mat 21:1-11; Luk 19:28-40; Yhn 12:12-19)
1Ngüso Betfage naiuso Bethani noksong shimkü Yirusalem shisaonai, ngüso Olip King ai shin. Nai Yisuüh apa sahoi nime khaai 2nung ayamhan kiukü hong: “Aje khako noitsün nokai lünap. Aje nungai napsao nai, ajeüh khaiunia sau tilaitso tsümoknoitingkü nou gado thso tsak, phantaiukü eppe. Nung sokthamküta nungai nialokü ashi. 3Ajantsoüh aje tü ajeüh nung tiau chhiji ta ngionai, Apaou nou nung poukü noin küta shakta laokü hongshi-e ta apa tü lüngio.”
4Nungtiphe ngüne khunai sonkeng nai, gado thso tsak tsam tsak tü phankü ep. Ngüneüh sokthamtsün taoko, 5nungko tsakü noitsün ajantsoüh, “Ajeüh gado thso sokthamkü ti chhiji?” ta ngüne tü sang.
6Ngüneüh ngüne tü Yisuüh ngiotsünli ngüso hao chiten, naiuso nung khaiunia nousoüh ngüne khu-in. 7Ngüneüh gado thso nou Yisu dongai niakü shinai ngüso ne nung gado chiai patlutkiu, naiuso Yisu nung chiai moknoi. 8Piakü nou momo neh yamai sakiu, naiuso amaohaiüh liutsa ainou paithsam helukü sakiu. 9Khaiuniahoi khaai si phiai hoilutkü khutsünsoüh, “Goa lülomsan! Apaou nianko shitsün Goa nou lü-oukkiu! ta wen. 10Goa nou sam po Nokpao David nokshing shitsün oukkiu! Goa lülomsan!”
11Yisu Yirusalemai shinai, Amkham Tsamai napkü apemai lemkü thaplu. Lüko loto nung ah-nou shamankü tsanganphe, apa sahoi chekü nime nouso hakü Bethani ai khuwan.
Yisuüh Latpai tü Athesan Kiuji
(Mat 21:18-19)
12Nungthan ajekhaiu nai ngüso Bethani ainou laokü shi taoko Yisu naiukü noiküla. 13Nai apaüh laiukü ai latpai tsak ashah pokü epkü, nung da latshep epao shio-e ta yangkü nungai khu. Lüko tilai apa nungai shin, apaüh ashah noulu pokü ep, tiautenai nung latshep eiutsün tao tsüdekü noiküla. 14Apaüh latpai tü ngiom, “Lo ainou yakü ni da sauühtso latshep nou tsühe-e!”
Naiuso nung apa sahoisoüh lulan.
Yisu Amkham Tsamai Khuji
(Mat 21:12-17; Luk 19:45-48; Yhn 2:13-22)
15Tilai ngüso Yirusalemai shisaom, Yisu Amkham Tsamai khuküta, nungko chai janhoi nouso naiuso atuhlotsünso apem kengchiai komshian. Apaüh tangka he-elutsünso pou, naiuso mükham jantsünso noikham thoiloikü lopengankiu, 16naiuso apaüh sauhao amkham tsam keng ainou kengchiai yankü ti jengtsaiutso kankü tsükhu-i. 17Küta Apaüh khaiuniahoi nouso tü nung tsandekü ngiom, “Goa nou ngiotaiutsün nung Asiongio nai satkü taim, ‘Jü Tsam tü shingkhan chikü ün khaiuniahoi thaiutha misao tsam ta jone.’ Lüko asamüh nung kaohoi thaiutha asolutsün athang tsak iula-iji!”
18Atengting mesonhoi naiuso Ngiokhem tsandetsünsoüh nung lulakü, ngüsoüh apa loatkü wannau yam yamau tsalo. Ngüsoüh apa lun hat, tiautenai hoi athum nou apaüh tsandetsün ko ngawan.
19Ah-sham shinai, Yisu naiuso apa sahoisoüh noknio nou wankü khu.
Latpai Alat ainou Ngeloau
(Mat 21:20-22)
20Nungthan nyap beta ngüso nung yamai laokü yashinai, ngüsoüh nung latpai nou eiu saokü wonkü eankü ep. 21Peterüh ti thawaokü shin nung yangshikü Yisu tü ngiom, “Atsandetsün, Athaplu, ni athesan kiutsün latpai nou eaniu!”
22Yisuüh thalakü ngüso tü ngiom, “Goa da amonglam lünoi. 23Atsüoting ngü asam tü ngioji, sauhaiüh nung king nou tü ni loksanküta khiamnok nai lüsalian ta mongai ehenyi tsünoikü monglame, apaüh ti ngiom nung thawao-e, nung apa thaiutha chhi-e. 24Nung shioko ngü asam tü ngioji, asamüh tilai misaokü tso tsak thaiutha sang-e, asamüh nung epiu ta lüyang, naiuso asamüh tilüsong thaiutha sangji nung asam hau kiu-e. 25Naiuso tilai asamüh tsakü misao-e, ajantsoüh asam thako tso phiokü noinai nung lüwankiu, naito aün nai noitsün asam poüh asam aphio wankiu-e.” 26Asamüh amaohai aphio tsüwankiu naito, asam Po aün ainou lüko asam aphio tsüwan kiu-e.
Yisu ün Oukong thaiutha Ngiosang
(Mat 21:23-27; Luk 20:1-8)
27Ngüso loühjam Yirusalemai shisaom. Yisu Amkham Tsamai tsakeikü noinai, atengting mesonhoi, Ngiokhem tsandetsünso, naiuso petchehoi nouso apa dongai shikü 28apa tü sangkü ngiom, “Ni nung chhiau ti ayam noin? Ni hao nung chhiau ayam nou sauüh kium?”
29Yisuüh ngüso tü thalakü ngiom, “Ngü asam tü ngio tsaklu sangko, asamüh ngü hao nung athashi kiunaito, ti oukong nou ngü nung chhiji ngü asam hao chite-e. 30Yohanüh limkiutsün ayam nou ti ainou shin: Goa ainou süne tsüdekünai khaiunia ainou?” ngü hao achite.
31Ngüso ongko tsak si tsak khako sei-ekü ngiom: “Samüh ti ngio-e? Samüh ‘Aün ainou’ ta thashinai, apaüh, ‘Naito asamüh, Yohan da tiau tsümonglam?’ ta ngio-e. 32Naiuso samüh ‘Khaiunia ainou’” ta ngionai, (Ngüso khaiuniahoi lun hat, tiautenai apem nou Yohan nung e-po tsak noiküla ta monglamkü noiküla.) 33Nungtiphe ngüsoüh Yisu tü, “Samüh tsünge” ta thalan.
Yisuüh ngüso tü ngioji, “Ngü lüko ti ayam tsangkü nou nung chhiji asam hao tsüchite-e.”
Currently Selected:
MARK 11: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
